Kompanııanyń ınfraqurylymdyq jelisi keń ekeni belgili. Olar shalǵaıdaǵy aýdan ortalyqtary men aýyldardy da qamtıdy. Kompanııanyń baspasóz qyzmeti usynǵan aqparatqa sensek, aýyl men aýdandardaǵy poshta bólimsheleri 12 myńnan asa memlekettik jáne áleýmettik qyzmet túrlerin usynǵan. Jańa qyzmet túri halyq tarapynan úlken suranysqa ıe. Onyń ishinde Shyǵys Qazaqstan men Qyzylorda oblysy kósh bastap keledi: tıisinshe 5,3 myń jáne 2,8 myń qyzmet kórsetildi.
Bıylǵy kóktemde Qazposhta Shyǵys Qazaqstan oblysynda «Memlekettik jáne áleýmettik qyzmetter usynatyn ámbebap agent» qanatqaqty jobasyn qolǵa alǵan. Osy joba aıasynda shildeniń 1-inen beri Qazaqstannyń búkil aýmaǵy boıynsha test rejiminde aýyl men aýdan turǵyndaryna memlekettik jáne áleýmettik qyzmetter elektrondy formatta usynylyp jatyr. Bul shalǵaıda turatyn jurtshylyqtyń kóńilin serpiltken bolar. Sebebi ýaqyt pen qarjyny shyǵyndap, qalaǵa jol tartý esh qajet emes.
«Shilde aıynda eldi meken turǵyndary ulttyq poshta operatorynyń jańa qyzmetine 6,5 myń ret júgingen. Shalǵaı aýyldar men aýdandardyń turǵyndary oblys ortalyǵyna barmaı-aq, ózderine qajetti qyzmetterdi jergilikti poshta bólimshelerinen alý múmkindigine ıe boldy», deıdi Qazposhta ókilderi.
Jalpy, Qazposhta ulttyq operator retinde aýyl turǵyndaryna barynsha qolaıly jaǵdaı jasaý úshin dál osy ispetti áleýmettik mańyzdy jobany qolǵa alǵan. Eldi mekenderde Qazposhta kóbine turǵyndarǵa qyzmet kórsetetin jalǵyz mekeme ekeni belgili. Kompanııanyń keń fılıaldyq jelisi bar ekenin eskere otyryp, aýyl turǵyndaryna memlekettik jáne áleýmettik qyzmetterge qoljetimdilikti qamtamasyz etý – mańyzdy áleýmettik mindet.
Elimizdiń barlyq óńirindegi poshta bólimshelerinde 628 memlekettik jáne áleýmettik qyzmetti alýǵa bolady. Onyń ishinde egov.kz portaly arqyly elektrondyq-sandyq qoltańba alý jáne onlaın qyzmetterge (jumyspen qamtý, bilim, densaýlyq, jyljymaıtyn múlik jáne t.b. boıynsha anyqtamalar, ótinishter) tapsyrys berý, kópbalaly jáne az qamtylǵan otbasylardyń 1-den 6 jasqa deıingi balalarǵa kepildendirilgen áleýmettik paketti alýǵa, sonymen qatar aleumet.egov.kz portalynda múmkindigi shekteýli jandar tarapynan ońaltý boıynsha tehnıkalyq quraldardy alýǵa jáne sanatorlyq-kýrorttyq emdelýge joldamalardy rásimdeýge ótinish berý qarastyrylǵan.
Ulttyq poshta operatorynyń júzege asyratyn jobalary aýdan ortalyqtarynda jáne aýyldarda turatyn jurttyń qajettilikterin óteýge baǵyttalǵan. Búginde eldi mekenderdegi poshta bólimshelerinde depozıtter men kredıtter rásimdeýge, kommýnaldyq tólemderdi tóleýge, temir jol bıletterin satyp alýǵa, kosmetıkalyq buıymdarǵa tapsyrys berýge bolady. Sondaı-aq aldaǵy ýaqytta smartfondar men gadjetterdiń aqysyn tóleý úshin qolma-qol aqsha jáne bólip tóleý múmkindigi usynylady. Bul qyzmetter aýyl turǵyndary tarapynan suranysqa ıe jáne qalalarǵa barýdy qajet etpeıdi.
