Qasym-Jomart Toqaev qazaq-koreı isker toptarynyń dóńgelek ústeline qatysty

Qazaqstan Prezıdenti jıynǵa qatysýshylarǵa Prezıdent Mýn Chje Inmen ótken memleketaralyq kelissózderdiń negizgi qorytyndylary týraly aıtyp berdi. Qasym-Jomart Toqaev Ońtústik Koreıanyń Qazaqstan úshin asa mańyzdy strategııalyq áriptes ekenine toqtaldy.

«Sońǵy 15 jylda Sizdiń elińizden keletin tikeleı ınvestısııa kólemi 6 mıllıard dollardan asty. Qazaqstanda koreıalyq kapıtal salynǵan 550-den astam kásiporyn tabysty jumys istep jatyr. Olardyń qatarynda Samsung, Hyundai, Lotte, Posco, KNOC jáne basqa da jetekshi korporasııalar bar. Osy kompanııalardyń qatysýymen jalpy quny 2,5 mıllıard dollardan asatyn 24 iri joba júzege asyryldy. Ásirese, koreıalyq SK Engineering & Construction kompanııasynyń qatysýymen júzege asyrylyp jatqan Úlken Almaty aınalma tasjolynyń (BAKAD) qurylysyn aıtýǵa bolady», dedi Qasym-Jomart Toqaev.

Sonymen qatar Memleket basshysy avtomobıl jasaý, turǵyn úı qurylysy, metallýrgııa jáne aýylsharýashylyǵy sııaqty salalarda jalpy quny 1,5 mıllard dollardan asatyn keleshegi zor úmit kúttiretin 16 ınvestısııalyq jobanyń iske asyrylatyny týraly aıtty.

Prezıdent ekonomıkalyq yntymaqtastyqty arttyrýǵa jańa múmkindikterdiń bar ekenine nazar aýdardy. Qasym-Jomart Toqaev ınnovasııalar men jańa tehnologııalarǵa negizdelgen ekonomıkany qalyptastyrýǵa basymdyq beriletinin atap ótti.

«Qaıta óńdeý ónerkásibindegi joǵary tehnologııaly óndiris, sondaı-aq, Indýstrııa 4.0 tehnologııalaryna strategııalyq turǵydan múddelimiz. Ońtústik Koreıa ekonomıkany sıfrlandyrý boıynsha álemdik kóshbasshy jáne 5G jelileri salasynda úzdik bolyp tanyldy», dedi Prezıdent.

Sonymen qatar, Memleket basshysy Qazaqstanda ınnovasııalyq tehnologııalardy damytý úshin zamanaýı ınfraqurylym bar ekenin atap ótti.

«Biz komıýterlik tehnıka, jelilik jabdyqtar, derekterdi óńdeý ortalyqtary boıynsha birlesken óndiristik jobalar ashýǵa múddelimiz. Qazaqstan 5G jelisin óristetý baǵytynda jumys istep jatyr. Iri qalalarda alǵashqy synaqtar ótkizildi. Koreıa kompanııalaryn elimizde 5G jobalaryn iske asyrý úderisine qatysýǵa shaqyramyn», dedi Prezıdent.

Qasym-Jomart Toqaev jer qoınaýyn paıdalaný salasynyń zor múmkindikterin paıdalanýǵa shaqyrdy. Qazaqstanda jer aýmaǵynyń 25 paıyzyna ǵana geologııalyq zertteý júrgizilgenin aıtty.
Bul rette, Memleket basshysy asyl jáne tústi metaldardy óndirý boıynsha bes daıyn jobanyń bar ekenin atap ótip, koreı kompanııalaryn Qazaqstannyń jer qoınaýyn birlesip ıgerýge shaqyrdy.

Qazaqstan Prezıdenti koreıalyq áriptesimen áńgime barysynda bizdiń eldegi tabıǵı resýrstarǵa birlesip zertteý júrgizý týraly usynys aıtqanyn, keıin tabıǵı baılyqty ıgerý barysynda koreı kompanııalaryna quqyqtyq basymdyq berilýi múmkin ekenin jetkizdi.

Prezıdent óz sózinde Qazaqstanda balamaly jáne jańaǵyrtylatyn qýat kózderin damytýǵa basymdyq beriletinin atap ótti. Memleket basshysy jel jáne kún energııasyn paıdalanýdyń áleýeti zor ekenin aıtyp, koreı kompanııalaryna osy saladaǵy ınvestısııalyq múmkindikterdi qarastyrýdy usyndy. Odan bólek, Qasym-Jomart Toqaev forýmǵa qatysýshylardy Qazaqstanda Koreıa tehnologııalary boıynsha ıadrolyq otyndy birlesip óndirýge, sondaı-aq, qaldyqtardy energetıkalyq joıý salasyndaǵy jobalardy iske asyrýǵa shaqyrdy.

Qasym-Jomart Toqaev Ońtústik Koreıamen mashına jasaý salasyndaǵy yntymaqtastyqty joǵary baǵalap, bul eldiń iri kompanııalarynyń qatysýymen avtomobıl jasaý salasy Qazaqstan ekonomıkasynyń qarqyndy damýyna úles qosqanyn atap ótti. Osyǵan baılanysty Prezıdent avtomobılder jelisin ulǵaıtýǵa jáne óndiris oryndaryn arttyrýǵa ázir ekenin málimdedi.

Memleket basshysy koreıalyq kompanııalarmen birlesip munaı-gaz ónerkásibine arnalǵan jabdyqtar men qosymsha bólshekterdiń, sondaı-aq, jańa tehnologııalar negizinde aýylsharýashylyǵy ónimderin tereń qaıta óńdeý boıynsha óndiris ashýǵa múddeli ekenin aıtty.
Sonymen qatar, Qasym-Jomart Toqaev Qazaqstan arqyly Azııadan Eýropaǵa júk tasymaldaý jáne koreı eksportyn Eýrazııalyq ekonomıkalyq odaq naryǵyna da ártaraptandyrý múmkindikterine toqtaldy.

Prezıdent ınvestorlarǵa arnalǵan ınstıtýsıonaldyq ortany qalyptastyrý týraly aıta kele, «Kazakh Invest» ulttyq kompanııasynyń, arnaıy ekonomıkalyq jáne ındýstrıaldyq aımaqtardyń, sondaı-aq, «Astana» Halyqaralyq qarjy ortalyǵynyń áleýetin paıdalanýǵa shaqyrdy.

Memleket basshysy sózin qorytyndylaı kele atalǵan is-shara eki el arasyndaǵy saýda-ekonomıkalyq ózara is-qımyldy tereńdetýge jasalǵan naqty qadam ekenin aıtty.

Qasym-Jomart Toqaev koreıalyq kásipkerlermen naqty jumys isteý úshin Premer-Mınıstrdiń orynbasary Roman Sklıardyń jetekshiligimen arnaıy jumys tobyn qurý týraly sheshim qabyldaǵanyn aıtty. Prezıdent iri ınvestısııalyq, ınstıtýsıonaldyq, ınraqurylymdyq jobalardy júzege asyrýdy jáne oǵan jeke monıtorıng júrgizýdi óz baqylaýyna alatynyn atap ótti.

Dóńgelek ústeldegi áńgimeni KITA Koreıa Halyqaralyq saýda assosıasııasynyń tóraǵasy Krıstofer Ký júrgizip otyrdy. «Samuryq-Qazyna» UÁQ» AQ tóraǵasy, Koreıa Respýblıkasynyń saýda, ındýstrııa jáne energetıka mınıstri, sondaı-aq, Samsung Electronincs, Doosan Heavy Industries&Construction, Hyundai Engineering & Construction, Dongil Construction, Lotte Confectionery, BC Card, Seegene Medical Foundation, Korea Health Industry Development Institute (KHIDI), Dongkwang Trading Corporation ı Kolon World Investment koreı kompanııalarynyń basshylary sóz sóıledi.

Jıynǵa Qazaqstan tarapynan Prezıdent Ákimshiliginiń basshylyǵy, Úkimet músheleri, «Astana» Halyqaralyq qarjy ortalyǵynyń, «QazTransGaz», Kazakh Invest, «Qazaqtelekom», Kaspi.kz jáne basqa da kompanııalardyń basshylary qatysty.

Dóńgelek ústel qorytyndysy boıynsha jalpy somasy 1,7 mıllıard AQSh dollary bolatyn 34 kelisimge qol qoıyldy. Onyń 21-i kommersııalyq jáne 13-i kommersııalyq emes qujat. Koreı tehnologııasyn tartýǵa basymdyq beretin birlesken ınvestısııalyq jobalarda, joǵary tıimdiligi men óndiristiń ekologııalyq tazalyǵyna basty mán berilgen.