Qazaqstan Prezıdenti In Iong Lımen kezdesýde «Samsung Electronics» kompanııasynyń sıfrlyq ınnovasııalar salasynda álemdegi jetekshi orynda ekenin atap ótip, sıfrlandyrý, ınnovasııa men ǵylym arqyly tehnologııalyq damý týraly máselelerge toqtaldy.
Qasym-Jomart Toqaev yntymaqtastyqtyń perspektıvaly baǵyttary «aqyldy qalalar» júıesin engizý ekenin aıtyp, Qazaqstan kólik qatynastaryn basqarý, jol-kólik oqıǵalarynyń aldyn alý, derekterdi qashyqtan jiberý tehnologııalaryn engizýge múddeli dedi.
Budan keıin Memleket basshysy «Doosan Heavy Industries & Construction» prezıdenti Iong Ing Chongpen kezdesip, Qazaqstan ekonomıkasynyń damýyna qosqan úlesi úshin rızashylyǵyn bildirdi.
– Atyraý oblysynda qýaty 310 MVt gaztýrbınalyq elektr stansasynyń qurylysyn sátti júzege asqan joba retinde atap ótkim keledi. Ońtústik Koreıanyń jasyl energetıkany damytýdaǵy álemdik kóshbasshylardyń biri bolýǵa umtylatyn, sýtegi óndirisiniń aıtarlyqtaı úlesi bar jospary týraly jaqsy bilemiz. Qazirgi ýaqytta Koreıanyń 3 qalasyn sýtegi energııasyna kóshirý josparyna daıyndalyp jatyrsyzdar. Búginde Qazaqstanda da balamaly energııa kózderin damytýǵa erekshe kóńil bólinýde. Biz 2030 jylǵa qaraı balamaly energııanyń 30 paıyzyna qol jetkizýdi josparlap otyrmyz, onyń 15 paıyzy jańartylatyn energııa kózderi bolmaq.
Osy maqsatta jýyq arada 3-4 gıgavatt elektr energııasyna jańartylatyn energııa kózderiniń jobalaryn júzege asyrýdy josparlap otyrmyz. Sondyqtan sizderdiń usynystaryńyz biz úshin óte paıdaly bolady, – dedi Qazaqstan Prezıdenti.
Qasym-Jomart Toqaev kompanııanyń energetıkalyq jobalardaǵy kóp jyldyq tájirıbesi men biliktiligin eskere otyryp, olardy qazaqstandyq jylý-energııa ortalyqtaryn jańǵyrtý jáne «Qarabatan» keshenin keńeıtý boıynsha yntymaqtastyqqa shaqyrdy.
О́z kezeginde, koreılik kompanııa ókili balamaly energııa kózderi boıynsha ortaq jobalarda jumys isteýge daıyn ekenin jetkizdi.
