Avtosaqtandyrýdyń quny árqalaı

Qazaqstan zańnamasyna sáıkes, árbir kólik ıesiniń mindetti avto­saq­tandyrý polısi bolýy kerek. Bul – kútpegen jaǵdaılar kezinde kólik ıesin qarjylyq turǵy­­dan qorǵaýdy hám qoldaýdy qam­ta­masyz etý­ge berilgen kepildik. Saqtandyrý polısi bolmaǵan jaǵ­daıda aıyppul salynady. Aıyp­pul mólsheri 10 aılyq eseptik kórsetkishke teń. Bul degenimiz – 29 170 teńge.

Qazaqstanda avtosaqtandyrý­dyń birkelki tarıfi bekitilmegen. Sondyqtan onyń baǵasy ár óńirde ártúrli. Freedom Finance Insurance saqtandyrý kompanııasynyń mamandary júrgizgen zertteý­de kórsetilgendeı, eń qymbat saqtandyrý polısteri Almaty (49,5 myń teńge) men Shymkent (41,3 myń teńge) qalalarynda tirkelgen. Al eń arzan saqtandyrý polısterin Aqmola (11,4 myń teńge) men Jambyl (12,3 myń teńge) oblystarynyń turǵyndary paıdalanyp júr.

Eske sala keteıik, kólik qural­dary ıeleriniń azamattyq-qu­qyq­tyq jaýapkershiligin mindet­ti saqtan­dyrý polısiniń quny ár­bir adamǵa jeke esepteledi. Son­daı-aq onyń quny birneshe fak­torǵa tikeleı baılanysty. Atap aıtqanda, aılyq eseptik kórset­kishtiń mólsheri, kólikti basqarý ótili, avtomobıldiń túri men jasy, kólik quraly tirkelgen óńir, apat­tyq koeffısıent (bonýs-malýs) esepke alynady.

– Onlaın-saqtandyrý paıda bolǵan sátten bastap qazaq­stan­dyqtar saqtandyrý qunyn ózderi esepteı alatyn múmkindikke ıe. Iаǵnı saqtandyrý agentteriniń kómeginsiz ári deldalsyz-aq esep-qısapty ózderi júrgize alady. Bul úshin saqtandyrý kompanııasy­nyń saıtyndaǵy avtosaqtandyrý bólimine kirip, jeke sáıkestendirý nómirin, avtokólik nómirin jáne uıaly telefon nómirin engizý kerek. Polıs qunyn avtomatty túrde esep­teý úshin atalǵan derekter jetki­likti, – deıdi Freedom Finance Insurance mamandary.

Kompanııa ókilderi álemniń birqatar elindegi avtosaqtandyrý polısteriniń baǵasyn da eseptep kórgen eken. Máselen, Germanııada polıs quny 150 eýrodan 1 myń eýroǵa deıin qubylady. Bul 176-1 174 AQSh dollaryna teń. Ulybrıtanııada avtosaqtandyrýdyń bir jyldaǵy ortasha quny 465 fýnt sterlıng dep baǵalanyp otyr – 645 dollar. Italııada polıstiń or­tasha quny – 500 eýro – 587 dol­lar. AQSh-taǵy avtosaqtandyrýdyń orta­sha baǵasy 500 dollardan bastalad­y. Japonııada bul kórset­kish bir jyldyq merzim úshin 117 dollarǵa teń. Qytaılyqtar bir jyldyq avtosaqtandyrý polısin satyp alý úshin 950 ıýan – 146 dollar tóleıdi. Reseıde mindetti avtosaqtandyrýdyń ortasha quny 2 746-4 942 rýbl nemese 37-67 dollar turady.