Olımpıadaǵa Aqtóbe, Shymkent jáne Qyzylorda qalasynan tórt oqýshy, ıaǵnı respýblıkalyq pándik olımpıadanyń jeńimpazdary qatysty. Ulttyq quramany jarysqa tájirıbeli pedagogter men jattyqtyrýshylar daıyndady.
Zııatkerlik saıystyń tapsyrmalaryn joǵary deńgeıde oryndaǵan qazaqstandyq tórt qatysýshynyń úsheýi júldeger atandy. Rýstam Valeev altyn medalǵa, Erkebulan Tazabek kúmis medalǵa, Erasyl Saparbekov qola medalǵa ıe boldy.
Bul rette ulttyq qurama músheleri oqý-jattyǵý kezinde jumysty joǵary deńgeıde júrgizgen muǵalimder men jattyqtyrýshylaryna alǵys bildirdi.
«Osy jyly qurama komandamyzdyń qorjynyn medaldarmen toltyratynymyzǵa senimdi boldyq. Zııatkerlik saıysqa biz bar kúsh-jigerimizdi salyp daıyndaldyq. Muǵalimder men jattyqtyrýshylardyń arqasynda joǵary kórsetkishterge qol jetkizdik. Bizge árdaıym qoldaý kórsetetin jattyqtyrýshylarymyzǵa, muǵalimderimiz ben ata-analarymyzǵa alǵysymyz sheksiz. Bizdiń halyqaralyq olımpıadalarǵa qatysýymyz úshin qyrýar jumys júrgizetin «Daryn» ortalyǵyna alǵys aıtamyz», dedi altyn medal ıegeri Rýstam Valeev.
Bilim jáne ǵylym mınıstri Ashat Aımaǵambetov óziniń Facebook paraqshasynda olımpıada júldegerlerin laıyqty jeńisimen quttyqtady.
«Olımpıada júldegerlerin joǵary nátıjelerimen quttyqtaımyn! Bul – sizderdiń qajyrly eńbekterińiz ben bilimderińizdiń jáne ózderińizge degen senimdiliktiń nátıjesi. Sizderge qoldaý kórsetken muǵalimder men jattyqtyrýshylarǵa jáne ata-analarǵa alǵys aıtamyn. Sizder elimizdiń namysyn halyqaralyq deńgeıde laıyqty qorǵadyńyzdar. Biz óz tarapymyzdan medaldardyń sany jyl saıyn ulǵaıýy úshin jaǵdaı jasaýdy jalǵastyramyz», dep jazdy mınıstr.
Sondaı-aq Ashat Aımaǵambetov Memleket basshysy Qasym-Jomart Toqaevtyń halyqaralyq olımpıada jeńimpazdaryn qoldaý boıynsha keshendi sharalar qabyldaýdy tapsyrǵanyn atap ótti. Osy tapsyrmany oryndaý aıasynda mınıstrlik zańnamalyq ózgerister daıyndady.
