Qazaqstan Respýblıkasynyń quqyq qorǵaý júıesin odan ári damytý sharalary týraly
Qazaqstan Respýblıkasynyń quqyq qorǵaý júıesin odan ári damytý sharalary týraly
Qaýly etemin:
1. Qazaqstan Respýblıkasynyń quqyq qorǵaý júıesin odan ári jańǵyrtýdyń 2014-2020 jyldarǵa arnalǵan memlekettik baǵdarlamasy (budan ári – Baǵdarlama) bekitilsin.
2. Qazaqstan Respýblıkasynyń quqyq qorǵaý organdarynyń kadr saıasaty tujyrymdamasy maquldansyn.
3. Qazaqstan Respýblıkasynyń Úkimeti, Qazaqstan Respýblıkasynyń Prezıdentine tikeleı baǵynatyn jáne esep beretin memlekettik organdar:
1) Qazaqstan Respýblıkasy Prezıdentiniń Ákimshiligimen kelisim boıynsha Baǵdarlamany iske asyrý jónindegi is-sharalar josparyn bir aı merzimde ázirlesin jáne bekitsin;
2) «Qazaqstan Respýblıkasyndaǵy memlekettik josparlaý júıesiniń odan ári jumys isteýiniń keıbir máseleleri týraly» Qazaqstan Respýblıkasy Prezıdentiniń 2010 jylǵy 4 naýryzdaǵy №931 Jarlyǵymen aıqyndalatyn merzimde jáne tártippen Baǵdarlamanyń iske asyrylý monıtorınginiń nátıjelerin Qazaqstan Respýblıkasy Prezıdentiniń Ákimshiligine usynsyn;
3) Osy Jarlyqty iske asyrý jónindegi ózge de sharalardy qabyldasyn.
4. Osy Jarlyqtyń oryndalýyn baqylaý Qazaqstan Respýblıkasy Prezıdentiniń Ákimshiligine júktelsin.
5. Osy Jarlyq qol qoıylǵan kúninen bastap qoldanysqa engiziledi.
Qazaqstan Respýblıkasynyń Prezıdenti
N.NAZARBAEV.
Astana, Aqorda, 2013 jylǵy 31 jeltoqsan. №720
«Qazaqstan Respýblıkasynyń quqyq qorǵaý júıesin odan ári damytý sharalary týraly»
Qazaqstan Respýblıkasy Prezıdentiniń 2013 jylǵy 31 jeltoqsandaǵy №720 Jarlyǵyna
TÚSINDIRME
Qazaqstan Respýblıkasynyń Prezıdenti óziniń Jarlyǵymen Qazaqstan Respýblıkasynyń quqyq qorǵaý júıesin odan ári jańǵyrtýdyń 2014-2020 jyldarǵa arnalǵan memlekettik baǵdarlamasyn (budan ári – Baǵdarlama) bekitti jáne Quqyq qorǵaý organdarynyń kadr saıasatynyń tujyrymdamasyn (budan ári –Tujyrymdama) maquldady.
Baǵdarlamanyń negizgi maqsaty – azamattardyń quqyqtary men bostandyqtaryn, qoǵam men memlekettiń zańdy múddelerin tıimdi qorǵaýdy qamtamasyz etý arqyly quqyqtyq tártip organdaryna degen senim deńgeıin arttyrý.
Baǵdarlama quqyq qorǵaý salasynda memlekettik qyzmet túrlerin keńeıtip, standarttaýdy, sonymen qatar, olardyń sapasyn arttyrý sharalaryn qamtyǵan.
Quqyqtyq tártip organdarynyń halyqpen, azamattyq qoǵam ınstıtýttarymen ózara is-qımylynyń jańa túrleri damıtyn bolady.
Quqyq qorǵaý qyzmetiniń quqyqtyq jáne uıymdyq negizderin jetildirý, onyń ishinde qylmystyq qýǵyndaý organdarynyń jumysyn baǵalaýdyń jańa krıterıılerin ázirleý kózdelgen.
Sot aktilerin májbúrlep oryndaýdyń tıimdi júıesin qurý jáne sot-saraptama qyzmetterin bir organǵa shoǵyrlandyrý belgilengen.
Tujyrymdamany ázirleýdiń maqsaty quqyq qorǵaý organdarynyń kásibı kadr quramyn qalyptastyrý, onyń ishinde:
adam resýrstaryna qajettilikti josparlaýdy;
kadrlardy irikteýdi, attestattaýdy jáne ornalastyrýdy;
kadrlyq áleýetti kásibı damytýdy;
uıymdyq-shtattyq qurylymdardy ońtaılandyrýdy;
tárbıe jumysyn jáne qyzmetkerlerdi yntalandyrýdy kózdeıtin júıeli sharalardy ázirleý bolyp tabylady.
Tujyrymdamany iske asyrý quqyq qorǵaý organdarynyń kásibı resýrstaryn jaqsartýǵa, qyzmettiń ımıdji men bedelin arttyrýǵa, jeke quram arasyndaǵy tártip pen zańdylyqtyń jaǵdaıyn jaqsartýǵa múmkindik beredi.
Baǵdarlamany iske asyrýdy eki kezeńde: birinshi – 2014-2016 jyldary, ekinshi – 2017-2020 jyldary júzege asyrý josparlanǵan,
Bul rette Qazaqstan Respýblıkasynyń Úkimeti, Qazaqstan Respýblıkasynyń Prezıdentine tikeleı baǵynatyn jáne esep beretin memlekettik organdar Baǵdarlamany iske asyrý boıynsha is-sharalar josparyn qabyldaıdy.
Baǵdarlamanyń iske asyrylýy «Qazaqstan-2050» Strategııasynyń maqsattaryna jáne jalpy qabyldanǵan halyqaralyq standarttarǵa saı quqyq qorǵaý júıesin qalyptastyrý prosesin aıaqtaýǵa múmkindik beredi.
Qazaqstan Respýblıkasy Prezıdenti Ákimshiliginiń Quqyq qorǵaý júıesi bólimi.
