Sheber aq qaǵazdyń betine alǵash jaı ǵana jaǵa salǵan bolyp kóringen alýan tústi boıaý birte-birte tirilip, tylsym tabıǵattyń tamasha kórinisine aınalady. Naǵyz óner týyndysynyń qalaı týatynyn kórgen jan tipti qolyna ómiri qylqalam ustap kórmese de, dál sol sátte sýret salǵysy kelip, arqasy qozyp ketetini anyq.
Sýretshi beıneleý óneriniń álippesin endi ǵana tanyp kele jatqan jas shákirtterge sýret salýdyń tehnıkalyq ádis-tásilderi jóninde áńgimeleı otyryp, kóptegen paıdaly keńes berdi.
– Akvarel – beıneleý óneriniń eń kúrdeli túri, óıtkeni munda qatelesýge bolmaıdy. Mysaly, sýretke maıly boıaý men gýash paıdalansań, sátsiz shyqqan tustaryn ústinen taǵy boıaý jaǵyp, túzeýge bolady, al akvarelmen bulaı jasaı almaısyń, – deıdi Aleksandr Vasılevıch.
Aleksandr Zaharchenkov óz ónerin tamashalaýǵa jınalǵan kópshilikke qandaı materıalǵa akvarelmen sýret salýǵa bolatyny jaıynda baıandap berdi. Aıtýynsha, akvarel basqa materıaldardan góri qaǵazdy jaqsy kóredi eken. Bul jerde boıaý túsetin qaǵazdyń sapasyna erekshe mán berý mańyzdy. Qaǵazdyń tyǵyzdyǵy, quramy men faktýrasy boıaýdyń tegis jaıylýyna, kepkennen keıin qalaı kórinetinine deıin áser etedi.
Sheberlik synyby barysynda kórermender sýretshilik ónerdiń keıbir qupııa qyrlaryna qanyqqandaı boldy. Mysaly, akvarelmen salynǵan ózen-kóldiń kórinisi meılinshe shynaıy bolý úshin tuz untaqtary paıdalanylady eken.
– Biz qala turǵyndaryna arnap mundaı sheberlik saǵattaryn jıi uıymdastyryp turamyz. Bul, ásirese, áýes-
qoı sýretshiler úshin úlken mereke. Búgin de, mine, óńirge belgili sýretshini arnaıy shaqyryp, kópshilikke kórkembeıneleý óneriniń peızaj janry jaıynda keń maǵlumat berýdi jón kórdik, – dedi oblystyq tarıhı-ólketaný mýzeıiniń qyzmetkeri Baqytgúl Muratbekova.
Qostanaı oblysy
