Aımaqta aqpan bastalǵaly jalǵasyp jatqan indetke qarsy vaksına egý sharalaryna 31 medısınalyq mekeme jumyldyrylǵan. Vaksınalaý osy mekemelerge qarasty 181 stasıonarlyq jáne jyljymaly ekpe pýnktterinde uıymdastyrylǵan. Turǵyndarǵa arnaıy daıyndyq oqýlarynan ótken 426 medısınalyq qyzmetker ekpe salyp jatyr. О́ńirde vaksınanyń bir mezgilde 173 myń dozasyn saqtaı alatyn 104 muzdatqysh qurylǵy jumys istep tur. Vaksınany shalǵaı aýdandarǵa arnaıy salqyn saqtaǵysh refrıjeratorlar jetkizip berip jatyr.
– Búginge deıin oblysqa vaksınanyń 346 655 doza birinshi komponenti, 285 385 doza ekinshi komponenti ákelindi. Turǵyndardyń 55%-y, ıaǵnı 277,8 myń adam vaksına qabyldady. Vaksına qabyldamaǵandardyń sany 215,4 myń bolady, bul – aımaq turǵyndarynyń 42,7 paıyzy, – dedi oblystyq densaýlyq saqtaý basqarmasy basshysynyń orynbasary Anjela Beksultanova.
Al oblystaǵy bilim mekemeleriniń jergilikti kásipodaǵy bilim salasy qyzmetkerleriniń ekpe alýǵa degen yntasyn arttyrýdy kózdep otyr. Osy maqsatta kásipodaq 15 tamyzdan 1 qyrkúıekke deıin koronavırýs ınfeksııasyna qarsy vaksınalardyń kez kelgeniniń birinshi komponentin ektirgen bilim qyzmetkerleri arasynda «Vaksına qabylda!» aksııasyn bastady.
Belgilengen kezeń aralyǵynda vaksına saldyrǵan kásipodaq múshesi utys oıynyna qatysyp, Apple iPhone uıaly telefony, as mashınasy, et tartqysh, teledıdar, noýtbýk, shańsorǵysh jáne qysqa tolqyndy pesh sııaqty turmystyq zattardy utyp alý múmkindigine ıe bolady.
Osy oraıda, «qyzyl» mártebeliler máselesin de sóz ete keteıik, óńirde úı karantınindegilerdiń kóshege shyǵyp ketýi tolastamaı tur. Oblystyq kásipkerler palatasynyń dırektory Murat Ábenovtiń aıtýynsha, sońǵy apta ishinde ǵana Ashyq jobasy arqyly 629 «qyzyl» mártebeli, 454 «sary» mártebeli adam anyqtalǵan.
– Biz bıznes ókilderin tártip buzýshylardy anyqtaýǵa úlken jaýapkershilikpen qaraýdy suraımyz jáne olar týraly sanıtarlyq-epıdemıologııalyq qadaǵalaý organdaryn ýaqtyly habardar etip otyrýǵa shaqyramyz. Oblys turǵyndaryn COVID-19 juqtyrý qaýpinen tek osylaı ǵana qorǵaı alamyz. Búginde Ashyq qosymshasynyń tıimdi ekenine ábden kózimiz jetti. Sońǵy jetiniń ózinde «qyzyl» jáne «sary» mártebesi bar myńnan asa turǵyn qoǵamdyq oryndarǵa kire almady. Búgingideı jaǵdaıda, ásirese kásiporyn ujymdary jappaı vaksına qabyldaýy qajet. Biz kásiporyn basshylarynan osy máselege nazar aýdarýdy suraımyz. О́ıtkeni pandemııany toqtatýdyń búgingi tańdaǵy birden-bir joly – osy ǵana, – dedi M.Ábenov.
Kásipkerler palatasynyń málimetinshe, Qostanaı oblysynda 4 158 kásiporyn Ashyq jobasy boıynsha jumys istep jatyr.
Qostanaı oblysy
