Keshe Premer-Mınıstr Serik Ahmetovtiń tóraǵalyǵymen ótken Úkimet otyrysynda Memleket basshysynyń bıylǵy Joldaýyn júzege asyrý boıynsha sharalar talqylandy.
Keshe Premer-Mınıstr Serik Ahmetovtiń tóraǵalyǵymen ótken Úkimet otyrysynda Memleket basshysynyń bıylǵy Joldaýyn júzege asyrý boıynsha sharalar talqylandy.
«Bul Joldaý aıryqsha, óıtkeni, elimizdiń ekonomıkalyq jáne áleýmettik damýynyń uzaq merzimdi strategııasyn júzege asyrý sharalarynyń naqty baǵdarlamasyn kórsetip qana qoıǵan joq, bizdiń qoldanysymyzǵa otandyq tarıhymyzdaǵy tipten jańa – Máńgilik El uǵymyn engizdi. Memleket basshysy bul tarıhı mindet qabyldanǵan «Strategııa-2050» baǵdarlamasy negizinde júzege asyrylatynyn atap kórsetti», dedi Úkimet basshysy. S.Ahmetov sóz arasynda sondaı-aq 17 qańtarda ótken Úkimet otyrysynda Memleket basshysy Joldaýyn júzege asyrý is-sharalarynyń naqty algorıtmi qabyldanǵanyn atap ótti. Iаǵnı búginge deıin aýqymdy jumystar júzege asyrylyp, Prezıdent Ákimshiligimen Joldaýdy júzege asyrý boıynsha jalpyulttyq jospar kelisilgen.
Otyrysta Elbasynyń Qazaqstan halqyna Joldaýyndaǵy maqsattarǵa qol jetkizý boıynsha árbir memlekettik organda óziniń algorıtmi bolýy tıistigine toqtalǵan Úkimet basshysy Memleket basshysynyń árbir tapsyrmasy sapaly ári ýaqtyly oryndalýy qajettigin de qatań eskertti. «Bul tapsyrmalardyń oryndalýy boıynsha monıtorıng uıymdastyrylyp, qatań suraý bolýy kerek», dedi S.Ahmetov.
Joldaýǵa oraı atqarylar birqatar jumystar jaıyn baıandaǵan Ekonomıka jáne bıýdjettik josparlaý mınıstri Erbolat Dosaev ony júzege asyrý boıynsha Jalpyulttyq jospardyń jobasyn tanystyrdy. E.Dosaev Joldaýdyń jeti baǵyty boıynsha aǵymdaǵy jyldyń maýsymyna deıin «Agrobıznes-2020» agroónerkásiptik keshendi damytý baǵdarlamasyna túzetýler engiziletinin atady. «Aǵymdaǵy jyldyń maýsymyna deıin aýyl sharýashylyǵyna jańa tehnologııalar engizý, eńbek ónimdiligin arttyrý jáne aýyl sharýashylyǵy sýbektilerin uzaq merzimdi qarjylandyrýǵa jáne ótkizý rynoktaryna qoljetimdiligin qamtamasyz etý boıynsha Joldaýda kórsetilgen mindetterdi esepke alyp, «Agrobıznes-2020» agroónerkásiptik keshendi damytý baǵdarlamasyna, basqa da strategııalyq jáne baǵdarlamalyq qujattarǵa túzetýler engiziletin bolady», dep naqtylady mınıstr. Sondaı-aq, ol Qazaqstanda aǵymdaǵy jyldyń aıaǵyna deıin Astana men Almaty qalalarynda 2030 jylǵa deıin aglomerasııany qalyptastyrý josparlary jasalatynyn jetkizdi. Budan basqa, onyń aıtýynsha, «jasyl ekonomıkany» damytý maqsatynda ústimizdegi jyldyń tamyzyna deıin Nazarbaev Ýnıversıteti bazasynda bolashaqtyń energııasyn izdeý men qurý, sondaı-aq, ekologııalyq taza kólikterdi paıdalaný máselelerdi zertteý boıynsha úzdik tájirıbelerdi taldap, engizý ortalyǵy qurylýy tıis. Sonymen qatar, mınıstr aǵymdaǵy jyldyń mamyrynda Memleket basshysynyń tórtinshi munaı óńdeý zaýyty men atom elektr stansasy qurylystarynyń merzimi men ornalastyrylýy boıynsha baıandamasy engiziletinin atap ótti.
Sondaı-aq, vedomstvo basshysy habarlaǵandaı, osy jyldyń qyrkúıegine deıin qazirgi zamanǵy logıstıka jáne dıstrıbýsııa ortalyqtaryn damytý, avtokólik jáne temirjol ınfraqurylymdaryn keń aýqymdy jańǵyrtý, halyqaralyq saýdany júzege asyrý kezindegi kedergilerdi joıý qajet. Osyǵan oraı, kólik júıesi ınfraqurylymdaryn damytý men ıntegrasııalaý boıynsha Memlekettik baǵdarlamaǵa tıisti ózgerister engiziletin bolady.
Otyrysta budan ári sóz alǵan Premer-Mınıstrdiń orynbasary – Indýstrııa jáne jańa tehnologııalar mınıstri Áset Isekeshev Memleket basshysynyń barlyq tapsyrmalary boıynsha aıqyn is-qımyl algorıtmi jasalǵanyn atady. «Barlyq is-sharalar merziminde oryndalatyn bolady. Negizgi jaı birinshi jartyjyldyqta Prezıdenttiń qaraýyna engiziletin, ÚIID MB ekinshi besjyldyǵyn jasaýǵa qatysty bolyp tur», dedi ol. Al Premer-Mınıstrdiń orynbasary Gúlshara Ábdiqalyqova «Prezıdent Joldaýy sheńberinde barlyq múddeli memlekettik organdar áleýmettik bloktyń baǵyttaryn pysyqtady. Shákirtaqy, áleýmettik tólemaqylar kólemin kóterý, azamattyq jáne memlekettik qyzmetkerlerdiń eńbek aqysyn ulǵaıtý maqsatynda taldaýlar men esepteýler júrgiziletin bolady», dedi. Budan ári Vıse-premer – Qarjy mınıstri Baqyt Sultanov Memleket basshysynyń memlekettik basqarý júıesin jetildirý jáne áleýmettik-ekonomıkalyq damý máselelerine aıryqsha kóńil bólinetinin atap ótti. Jumystyń baǵyttary men naqty ındıkatorlary anyqtalǵan. Máselen, ústimizdegi jyly ekonomıkanyń ósimi 6-7 paıyzdy quraýy tıis, dedi ol. «Barlyq baǵyttar boıynsha qazir jumysshy toptar bekitildi, barlyq tapsyrmalar belgilengen merzimde atqarylýy úshin is-sharalar josparlary qurylýda», dedi Premer-Mınıstrdiń birinshi orynbasary Baqytjan Saǵyntaev.
Otyrysty túıindeı kele, S.Ahmetov «Memleket basshysynyń Joldaýynyń mańyzy zor. Bul – Úkimet sheshetin mindetter aýqymy da keń degen sóz. Bastysy, qujatta bazalyq ındıkatorlar jáne álemniń eń ozyq 30 eli arasyna ený boıynsha jeti besjyldyq sheńberindegi kezeńder aıqyn kórinis tapqan», dedi. Úkimet basshysy Ekonomıka jáne bıýdjettik josparlaý mınıstrligine Elbasy Joldaýy júktegen mindetterdi júzege asyrý turǵysynda Jalpyulttyq jospardy iske asyrý boıynsha jalpy monıtorıngti júrgizýdi tapsyrdy. Al Premer-Mınıstrdiń orynbasarlaryna qadaǵalaıtyn baǵyttary aıasyndaǵy jumystardy júıeli negizde uıymdastyrýdy júktedi. Sonymen qatar, buqaralyq aqparat quraldarynda keńinen taratý kerektigin aıta kele, Premer-Mınıstr Keńsesine Jalpyulttyq jospardyń oryndalýyn jáne turaqty negizde ony iske asyrý barysyn qadaǵalaýdy tapsyrdy.
Dınara BITIKOVA,
«Egemen Qazaqstan».
