Qańtardyń 18-i Bakýde Búkilálemdik boks serııasynyń (WSB) 6-týrynda jergilikti Baku Fires komandasymen kezdesken Astana Arlans klýby 1:4 esebimen utylyp qaldy.
Qańtardyń 18-i Bakýde Búkilálemdik boks serııasynyń (WSB) 6-týrynda jergilikti Baku Fires komandasymen kezdesken Astana Arlans klýby 1:4 esebimen utylyp qaldy.
Kezdesýde elimizdiń óz jigitteri túgel jeńiliske ushyrady. Al jalǵyz jeńisti komandadaǵy birden-bir legıoner, ırandyq Rýzbahanı ákeldi. Onda da ol urysty nokaýtpen aıaqtady.
Alańǵa birinshi bolyp shyqqan serııanyń debıýtanty 52 kıloǵa deıingi salmaqtaǵy Ilııas Súleımenov ázerbaıjan Elvın Mamıshzademen keskilesken shaıqasta 1:2 (48:47, 47:48, 46:49) esebimen ese jiberdi. 60 kılodaǵy Samat Báshenov óz kezeginde jaqynda ǵana Reseıden barǵan Albert Selımovten 0:3 (45:50, 45:50, 46:49) bolyp tize búkti. Budan soń kezdesýdiń taǵdyry da sheshildi. Atap aıtqanda, 69 kıloǵa deıingi salmaqtaǵy qazaqstandyq Meıirim Nursultanov Ázerbaıjan komandasynyń belorýs legıoneri Evgenıı Romashkevıchpen teń jekpe-jekte attan aýyp tústi. Esep – 1:2 (47:48, 48:47, 46:49). Osymen alań ıeleri esepti 3:0-ge jetkizdi.
Sosyn qazaqstandyqtarǵa birinshi jeńis keldi. Ony 81 kıloǵa deıingi salmaqtaǵy parsy Ehsan Rýzbahanı jasady. Astanalyqtyń judyryǵynan daǵystandyq Samır Magomedov tura almaı qaldy. Al sońynan 91 kılodan joǵary salmaqtaǵy Rýslan Myrsataev daǵystandyq legıoner Hadjı Mýrtýzalıevten 0:3 (46:49, 46:49, 46:49) esebimen jeńildi.
Astana Arlans kelesi kezdesýin 1 aqpan kúni ótkizedi. Bizdiń jigitter óz alańynda reseıliktermen, ıaǵnı Russian Boxing Team komandasymen judyryqtasady.
Damır QOJAMQUL.
