Aımaqtar • 29 Tamyz, 2021

Jaıbaraqattyq pen jaýapsyzdyqtyń aýyr zardaby

277 ret kórsetildi

Eki jyl buryn Arysta áskerı qoıma jarylǵany jadymyzda. Endi, mine, Jambyl oblysyndaǵy alapat jarylystyń saldarynan aı­dyń-kúnniń amanynda 13 birdeı azamatymyzdan aıyrylyp qaldyq.

Apattyń zardaby qandaı?

El aman, jurt tynyshta búkil eldiń úreıin alǵan apattar osymen toqtaı ma? Nege elimizde áskerı qoımalar jaryla beredi? Arystaǵy apattan sabaq almaǵan quzyrly organdar ne deıdi? Jambyldaǵy jarylys qasaqana jasalýy múmkin be? Jarylǵysh zat saqtalǵanyn bile tura, ol jaqqa nelikten áskerı qyzmetshiler men órt sóndirýshiler jiberildi? Qaıǵyly oqıǵadan qaza bolǵan azamattardyń artynda ańyrap qalǵan ata-analary men otbasylaryn ne dep jubatamyz? Kórer qyzyǵy men ómiri alda, tepse temir úzetin jigitterdiń ajalyna kim jaýapty?

Qaıǵydan qan jutyp, kókiregi qars aıyrylǵan qaraly qoǵamnyń kókeıindegi saýaldar osyndaı...

Jambyl oblysynyń Baızaq aýdanyn­daǵy 28349 áskerı bólimniń qoıma­synan 26 tamyz kúni keshki saǵat 18.45-te órt shyǵyp, kóp uzamaı jarylǵan. Saǵat 19.00 shamasynda bastalǵan jarylys bir táýlik ótkennen keıin ǵana toqtady. Áskerı bólimde barlyǵy 10 shaqty jarylys bolǵan.

28349 áskerı bólim Almaty-Taraz temir jo­lynyń boıyndaǵy Aqsholaq aýyly­nan shyǵa beristegi janar-jaǵar maı quıý beketiniń mańynda ornalasqan. Áskerı bólim temir joldyń oń jaǵynda, shamamen 300 metr qashyqtyqta bes birdeı aýyldyń – Baızaq, Jibek joly, Jańa­turmys, Úshbulaq jáne Aqsholaqtyń qaq ortasynda tur. О́rt oshaǵyna jaqyn jerde 3 eldi meken ornalasqan. Olar – Jibek joly kenti, Úshbulaq stansasy jáne Botamoınaq aýyly. Bul eldi mekenderdegi halyqtyń jalpy sany shamamen 1 myńnan asady. Al órt qoıma ǵımaratyn tolyq sharpyp, joıqyn jarylystar bastalǵan kezde jaryqshaqtardyń ushý radıýsy 2 shaqyrymǵa deıin jetken. Qorǵanys mınıstri Nurlan Ermekbaev qoımada saqtalǵan 500 tonna trotıl jarylyp, 700 sharshy metr aýmaqty órt sharpyǵanyn málim­degen edi. Ol tipti Tarazdaǵy jary­lystyń kúshi Arystaǵydan jeti ese az ekenin de ashyq aıtqan bolatyn. Alaıda...

Eki keshtiń ortasynda bolǵan joıqyn jarylystan qatty qoryqqan aýyl tur­ǵyn­­dary qujattaryn almastan, bala-shaǵa­­laryn jetektep, bassaýǵalap jan-jaq­qa qasha jónelgen. Kóbi alǵashynda ja­qyn mańdaǵy týysqandarynyń úıin pa­nalaǵan. Al TJM resmı ókili Tal­ǵat Ýálı jarylys bolǵan kúni 1200 turǵyn­nyń ýaqytsha mektep pen kolledj ǵıma­rat­taryna ornalastyrylǵanyn, onyń 80-nen astamy bala ekenin, jaraqat alǵandardyń arasynda baldyrǵandardyń joq ekenin málimdedi.

Osydan eki jyl buryn Qorǵanys mınıstrligi Arystaǵy oq-dárilerdi aýyl­dan shalǵaı jerge aparamyz dep resmı málimdeme jasaǵan bolatyn. Alaıda ondaǵy oq-dárilerdiń barlyǵy Baızaq aýdanynyń aýyldaryna jaqyn jerdegi áskerı bólimge ákelingen. Qorǵanys mı­nıstr­l­iginiń sózi men isi qabyspaıtyn ta­ǵy bir málimdemesi bar. Ol – mınıstr Nur­lan Ermekbaevtyń osy oqıǵaǵa baı­lanysty shuǵyl ótkizilgen brıfıng ba­­ry­synda «jarylǵan oq-dáriniń bar­ly­ǵy ınjenerlik bolǵandyqtan, alys­qa ush­paıdy» degen málimdesi edi. Mı­nıstr­­l­ik­tiń resmı málim­demesinde de «In­je­ner­lik oq-dáriler qoı­masynyń ar­tıl­­le­rııalyq jáne reaktıvti oq-dáriler qoı­ma­synan aıyrmashylyǵy – onda snarıadtar saqtalmaıdy. О́rt pen jarylys kezin­de olar qatty soqqy tolqynyn, aýqym­dy ja­lyn men dybystyq dúmpýler tý­dy­ra­dy. Alaıda sonymen birge oq-dári­lerdiń iri ból­shekteri, fragmentteri men qal­dyq­­tary jan-jaqqa ushqan joq», dep habarlanǵan edi.

Biraq jarylys saldarynan birneshe úıdiń shatyry ushyp, áınekteri synyp ketkenin áleýmettik jelini sharlap ketken túrli beınejazbalardan anyq kórýge bolady. Jambyl oblysynda jarylys bolǵan aýmaqty áskerıler qorshap, joldardy jaýyp tastaǵanymen, oqıǵa ornynan túrli beınejazba, fotolar áleýmettik jeli men messendjerlerde tez tarap ketti. Apattan eń kóp zardap shekken Qaınar aýy­lyndaǵy úılerdiń qabyrǵalary qa­qy­rap, tóbeleri opyrylyp ortasyna tús­ken. Bıznes nysandary men úılerdiń qat­ty zaqymdanǵanyn turǵyndardyń óz­deri de aıtyp, jan-jaqqa taratyp jat­ty. Jarylystyń joıqyn kúshi mańa­ıyn­daǵy qyzmet kórsetý keshenderi men janar-jaǵar maı beketiniń saý tamtyǵyn qaldyrmaǵan.

Osylaısha Jambyl oblysyndaǵy áskerı bólimniń oq-dári qoımasynda bolǵan jarylystan zardap shekkenderdiń jalpy sany búginde 100-ge jetti. Qor­ǵanys mınıstri qaza bolǵandar men aýyr jaraqat alǵandardyń arasynda qara­paıym aýyl turǵyndarynyń joq eke­nin aıtqanymen, jarylys kezinde bas-mı jaraqatyn alǵan eldi mekenniń 28 tur­ǵyny aýrýhanaǵa jatqyzylǵany bel­gili bolyp otyr. Keıbiriniń aıaq-qol­dary synyp, bet álpetteri men deneleri jaraqattanǵan bolsa, jansaqtaý bóliminde aýyr halde jatqan eki adamnyń denesiniń 50-60 paıyzyn kúıik shalǵan. Aýyr jaǵdaıdaǵy naýqastarǵa kómek kórsetý úshin Almatydan arnaıy reanımatolog mamandar jetkizilgen.

Qastandyq pa, salǵyrttyq pa?

Jambyldaǵy jarylys qasaqana jasalýy múmkin be? О́rt shyqqan qoımada 500 tonnadan astam trotıl saqtalǵanyn bilgen áskerı sarapshylar «trotıldi ádeıi tutatpasa, ózdiginen janbaıdy» deıdi. Keńes Odaǵy kezinen qalǵan ás­ke­rı qoı­malar jarylǵysh zattardy uzaq ýa­­qyt­qa saqtaýǵa jaramaıdy. Aýǵan soǵy­synyń ardagerleri qaıǵyly jaǵdaı kez kel­gen ýaqytta qaıtalanýy múmkin de­gendi de ashyna aıtyp otyr. Sebebi, «Keńes Odaǵynan qalǵan áskerı qoımalar jarylǵysh zattardy saqtaýǵa jaramsyz» deıdi aýǵan ardagerleri. Al áskerı mamandar oq-dári jáne jarylǵysh zat saqtaıtyn áskerı qoımalar aýyl-aımaqtardan kem degende 100 shaqyrym qashyqtyqta ornalasýy kerek ekenin aıtady.

Soǵys alańynan ákelingen qarý-jaraq pen oq-dárilerdiń barlyǵy belgili bir ýaqyttan keıin ýtılızasııadan ótýi kerek ekenin Aýǵan soǵysynyń arda­geri, zapastaǵy podpolkovnık Talǵat Ha­senov te aıtty. Jambyldaǵy jarylys tý­ra­ly oı-pikirin búkpesiz jetkizgen aýǵan ardageri «jaramsyz degenderdiń bar­ly­ǵynyń kózin joıý qajet» deıdi. «Kez kel­gen oq-dári men qarýdy saqtaýdyń jaram­dylyq merzimi bolady. Meniń bilýim­she, olardyń jaramdylyq merzimi 25 jyl. Osy ýaqyttan keıin ár oqtyń, árbir qarýdyń jaramdylyq merzimi aıaqtalady. Bul máselege júrdim-bardym qaramaýymyz qajet. О́ıtkeni áskerı oq-dári – balanyń oıynshyǵy emes. Tipti ony alyp júrý, saqtaý jáne joıý kezinde zańda belgilengen belgili bir erejelerdi qatań saqtaý qajet. Kez kelgen áskerı bazada qoımada saqtalatyn oq-dári men qarý-jaraqqa jaýapty adamdar bolady. Áskerı qoıma tikeleı kimge bekitilgen? Onda saq­talyp turǵan oq-dárige kimder esep júr­gizedi? Osy suraqtardyń barlyǵynyń naq­ty, áskerı jaýaby bar», dep ashyna sóı­legen ol «elimizdegi áskerı bólimderde bolyp jatqan qaıǵyly oqıǵalardyń bárine – jaıbaraqattyǵymyz, jaýapty tulǵalardyń jaýapsyzdyǵy kináli» eke­nin de jasyryp qalmady. Zapastaǵy polkovnık sóz arasynda oq-dáriler men qarý-jaraqtar saqtalatyn áskerı qoımalarǵa udaıy, toqsan saıyn keshendi tekserý júrgizilýi qajet ekenin de eske salyp: «Osy qajet pen kerektiń barlyǵy jasaldy ma? Mine, bar másele osydan týyndaıdy», degen oıyn aqtaryp saldy.

«Mundaı áskerı qarý-jaraq qoıma­lary árbir memlekette bar. Eń aldymen biz áskerı qoımalardyń – strategııalyq mańyzy bar nysan ekenin eskerýimiz qa­jet. Oǵan ekiniń biri emin-erkin kirip-shy­ǵa almaıdy. Bul – bir jaǵynan qarý-jaraq pen oq-dárilerdiń strategııalyq qory. Qazaqstandaǵy áskerı qoımalardyń basym bóligi eskirgen, olardyń deni ótken ǵa­syrdyń 60-70-jyldary salynǵan. Al on­da saqtalatyn oq-dárilerdiń kóbi – Keńes Odaǵy taraǵannan keıin qalǵan «qal­dyqtar». Onyń ishinde Aýǵanstan jeri­nen ákelingenderi de bar», dedi Talǵat Hasenov.

Aýǵan soǵysynyń ardageri: «Áskerı bólimde árbir is-áreket pen ár adamǵa jaýapty, bekitilgen tulǵalar bolady. Olar qatardaǵy azamattyq tulǵalar emes qoı?! Máselen, qarapaıym aýyl turǵynyn áskerı qoımaǵa kirgizbeıdi. Oǵan zań bo­ıynsha, áskerı tártip boıynsha ruqsat joq. Demek, bul qaıǵyly jaǵdaıǵa jaýapty tulǵalar, bekitilgen áskerıler jaýap beredi degen sóz. Iаǵnı tikeleı quzyretti, Qorǵanys mınıstrligindegi laýa­zym­dy adamdar jaýap berýge tıis», deı kelip, ótkennen sabaq ala almaǵan salǵyrt­tyǵymyzdy synap ótti.

«Arystaǵy apattan keıin biz, ásirese, áskerı qyzmetshiler, etek-jeńimizdi jınap, sol qaraly oqıǵadan qatań sabaq alýymyz kerek edi. О́kinishke qaraı, osydan eki jyl burynǵy áskerı bólimde bolǵan dúrbeleń eshkimniń basyna tımegen sııaqty. Jambyldaǵy jarylysta ózekti órteıtini – el aman, jurt ty­nyshta áskerı qyzmetshiler men órt sóndirý­shilerdiń ajal qushqany. Sap-saý, aman-esen júrgen azamattardyń mert bolýy júrekti aýyrtady. Olar ólimge bara jatyrmyz dep oılaǵan joq. Bar-joǵy órtti sóndiremiz, mindetimizdi atqaramyz dep apat oshaǵyna jaqyn bardy emes pe?! Qoımada bálenbaı myń oq-dári jatqanyn bile tura, TJM órt sóndirýshileri men áskerı prokýror bastaǵan arnaıy tekserý tobyn nege ol jerge jaqyn jibergen? Osy suraq meni áskerı adam retinde qatty mazalaıdy. Tótenshelikterdiń alapat órt kezinde áýeden sóndiretin arnaıy qurylǵylary nege jumyldyrylmaǵan? Nelikten jap-jas jigitterdiń bastaryn qaterge tikti? Bul bylaı qaraǵanda adamdy ajalǵa aıdaýmen teń emes pe?

«Áskerı qoımada jarylys bolǵanda onshaqty jigit birden ajal qushqan. Talaı adam aýyr jaraqat aldy. Osynyń bárine kim jaýap berýi kerek? Beıbit kúnde taǵy azaly kún jarııaladyq. Marqum bolǵan­darǵa bılik pen quzyrly organ basshylary, jergilikti bılik barlyǵy kóńil aıtyp, tıisti kómek kórsetiledi dep aıtyp ja­tyr. Munyń bári túsinikti, solaı bolýy kerek te. Alaıda qara jamylyp qalǵan sha­ńy­raqtarǵa kim ardaqty ákesin, aıaýly baýyryn, endi biriniń jalǵyz uly men arystaı aza­matyn qaıtaryp bere­di? Qanshama bala áke­siz jetim qal­dy? Eki keshtiń ortasynda ju­mysyna shaqyr­typ alǵan jarynan qa­py­da kóz jazyp qalam dep oılamaǵan ju­baı­larynyń kóz jasy kimge? Osy qaı­ǵy-qasirettiń aýyrt­palyǵyn kimnen sura­ýy­myz kerek?». Suraq kóp, jaýap joq. Tek ózek órter óki­nish, orny tolmas qazalar bar... Ar­d­a­ge­r­­men aradaǵy áńgimemiz osyndaı jan­dy tyr­nap túser aýyr suraqtarmen aıaqtaldy.

 On jyl burynǵy eskertý nege eskerýsiz qaldy?

Jarylǵysh zattar áýeli Aýǵanstannan Arysqa, Arystaǵy alapat apattan keıin qalǵandary Jambyl oblysynyń Baı­zaq aýdanyndaǵy áskerı qoımaǵa jet­kizilgen. Naqtyraq aıtsaq, Qorǵanys mınıstr­liginiń Arys qalasyndaǵy arsenalynda KSRO áskerleri shyǵarylǵannan keıin Aýǵanstannan áketilgen mıllıon­daǵan oq-dári men snarıadtar saqtalǵan. Dál osy mıl­lıondaǵan oq-dári orny tolmas qaı­ǵy ákeledi dep general-maıor Erjan Isa­qulov 2009 jyly Májilis depýtaty bo­lyp turǵan kezinde eskertken edi. Osy má­lim­demeden keıin Arysta sońǵy on jyl­dyń ishinde 4 ret áskerı qoıma jarylyp, sonyń saldarynan 10 adam qaıtys bolǵan.

Aıta keteıik, áskerı bólimderdegi jarylys elimizde Arys oqıǵasy kezinde alǵash ret tirkelgen joq. Táýelsiz Qazaq­stannyń tarıhynda osymen segizi­nshi ret oq-dári saqtaıtyn áskerı bólimderden órt shyǵyp, qoımalar jarylyp otyr. 2009 jyly Almaty oblysyndaǵy Qaraoıda da dál osyndaı qaıǵyly jaǵdaı tirkeldi. Ol kezde apattan bir adam mert bolsa, 2013 jyly Otardaǵy apattan jeti adam jaraqattanyp, tórteýi sol jerde til tartpaı ketken edi.

Al elimizde áskerı qoımadaǵy alǵashqy jarylys 2001 jyly Balqash qalasy ma­ńyndaǵy Toqyraý eldi mekeninde bol­ǵan. Qaladan 48 shaqyrym jerde orna­lasqan áskerı qoıma ol kezde bir apta boıy, sońǵy jarylǵysh zat tutanǵansha jalǵa­syp edi. Osy apattyń sońy sıyr­qu­ıym­shaqtanyp, naqty sebebi men saldary sol kúıi aıtylmaı ketken-tin. Alaıda Toqyraýdaǵy oqıǵanyń aýyr saldary araǵa tórt jyl salyp aýyr qazamen qaıta «jańǵyrdy». Esterińizde bolsa, 2005 jyly 5 aqpanda Balqash qalasynda ár jerde shashylyp jatqan snarıadtardy terip alyp, temir-tersek ótkizetin jerge aparyp, kádege jaratamyz degen bes adam ajal qushty. Balqash kóliniń jaǵalaýynda ornalasqan metall qabyldaý pýnktinde artıllerııalyq snarıadtardy dánekerleýshi quralmen kespek bolǵan kezde jarylys bolyp, saldarynan sol jerde bolǵan 17 jáne 43 jas aralyǵyndaǵy bes adamnyń saý tamtyǵy qalmady. Osy qaraly oqıǵa boıynsha arnaıy qurylǵan komıssııa quramynda Qorǵanys mınıstrligi men Qapshaǵaı qalasynan arnaıy kelgen saperler toby jumys istedi. Áskerıler snarıadtardy kesý kezinde qoldanylatyn gaz ballony jarylýy múmkin dese, jergilikti mamandar jaýyngerlik snarıadtyń ózi jarylǵanyna senimdi edi.

Sarapshylar Arystaǵy jarylǵysh zat túgel tutansa, Jambyl oblysyna de­ıin je­tetinin osydan eki jyl buryn apat bol­ǵanda eskertken edi. Alaıda Qor­ǵa­nys mınıstrligi men sol óńirdegi ás­kerı bólim basshylaryna Arystaǵy apat sa­baq bol­maǵan syńaıly. Sebebi, sol jaǵ­daıdan keıin arnaıy tekseris júrgizildi. Biraq bul tekseristiń ózi shala-sharpy júrgi­zil­­g­e­nin Jambyldaǵy jarylys kórsetip otyr.

Sarykemer oq-dáriniń ústinde otyr ma?

Jambyldaǵy qaraly oqıǵadan keıin áleýmettik jelilerde ártúrli aqpa­rat qaptap ketti. Sonyń biri – Aibat jańa­lyqtar qyzmetiniń tilshisi Danııar Álim­quldyń jarylys bolǵan áskerı qoımaǵa jaqyn ornalasqan Sarykemer aýylynan taratqan beınejazbasy. Odan Baızaq aýdanynyń ortalyǵy – Sarykemer aýylyn­daǵy meıramhananyń aýlasynda sha­shylyp, taý bolyp úıilip jatqan snarıa­d­qa uqsas temir zattardy kórýge bolady. Snarıadqa uqsas temir zat meıramha­na aýlasynda qaıdan paıda boldy? Bul «temir­ler» kimge tıesili? Qaýpi qandaı? El-jurtty alańdatqan beınejazba Aibat.kz-tiń Instagram-daǵy resmı paraqshasynda jarııalandy. Ile-shala osy aqparatqa qatysty Jambyl oblysynyń Polısııa departamenti resmı jaýap berdi. Onyń habarlaýynsha, beınejazbada kórsetilgen zattar týraly aqparattyń barlyǵy 2021 jyldyń 1 maý­symynda Baızaq aýdanynyń polısııa bóliminde tirkelgen eken. Sondaı-aq polısııa jáne aýdandyq Ulttyq qaýip­sizdik komıtetiniń qyzmetkerleri, arnaıy mamandardyń qatysýymen bul jerlerge tekserý jumystary júrgizilgen. «Tek­seris nátıjesinde bul snarıadqa uqsas zat­tardyń qaldyqtary atýǵa nemese jara­qat keltirýge jaramsyz ekendigi jáne olar­dyń Arys qalasynan joıýǵa ákelingeni anyq­talǵan» deıdi olar. Sózderine qaraǵanda, aýyl­dyń qaq ortasynda úıilip jatqan snarıad­tardyń esh qaýipsiz ekenin tıisti qu­jat­tar tolyǵymen rastap beretin kóri­nedi. «Bul derekke qatysty qylmys qura­my anyqtalmaǵan. Atalǵan qaldyq zat­tar­dyń qoǵamǵa eshqandaı qaýpi joq eken­digin xabarlaımyz» delingen resmı aq­paratta. Beınejazbany kórgen Jýa­ly aýdandyq máslıhatynyń hatshysy Erǵa­lı Tileýbekov ondaǵy jaırap jatqan qarý­lardyń naǵyz artıllerııalyq snarıad ekenin aıtady. «Meniń baıqaýymsha, beınejazbadaǵy qarýlar – 122 nemese 152 mm gaýbısa snarıadtary. Gaýbısada gılzasy oq-dárisimen, al snarıady toltyrylǵan trotılmen bólek bolady. Snarıadtyń basyndaǵy jarylǵysh qurylǵyny burap alyp tastaýǵa bolady, al trotıl qatty ysysa, jarylýy ábden múmkin», degen ol mun­daı qaýipti zattardy dereý alyp ket­pese, taǵy bir apattyń bolýy múmkin eke­nin eskertedi. «Snarıadtardy tot bas­qan. Bul qarýdyń durys saqtalmaǵanyn ańǵar­tady. Tot basqan qarý óte qaýipti. Ashyq aspan astynda jatqan mundaı qarý kez kel­gen ýaqytta jarylyp ketýi múmkin. Son­dyqtan tez arada kózin qurtý kerek. Mun­daı oq-dáriler arnaıy komıssııanyń she­shi­mimen jaramsyz dep tanylyp, áske­rı saraptama qorytyndysymen esepten shyǵarylady. Onyń ózinde áskerı jasaq arnaıy daıyndalǵan jerde qatań baqylaýda joıýy shart. Ekinshi nemese úshinshi qolǵa berýge qatań tyıym salynady. Negizi, bul zattar arnaıy zaýyttarda tike­leı mamandardyń qatysýymen metall ese­binde qaıta balqytylýy kerek. Mundaı qaýip­ti temirlerdi ashyq tasymaldaýǵa, tip­ti azamattyq ǵımarattarda saqtamaq tú­gil, jaqyndatýǵa bolmaıdy» degen ol ja­ryl­ǵysh zattarǵa qatysy bar áskerı she­neý­­nikterdiń snarıadtardy tanys-tamyr­­laryna nemese arzan baǵaǵa ekinshi bir adam­darǵa satyp jibergenine de kúmán keltirmeıdi.

Sarykemerde shashylyp jatqan snarıad­tardyń biri oqystan jarylyp, Balqashtaǵy qaıǵyly oqıǵanyń qaıtalan­basyna eshkim kepildik bere almaıdy.

Otqa oranǵan on úsh oǵlan

Eń ókinishtisi, alapat jalyndy aýyzdyqtaımyz dep júrgende atpaldaı azamattarymyzdan aıyrylyp qaldyq. Jantúrshigerlik joıqyn jarylysta qaza bolǵandardyń deni – kelisimshartpen jumys istegen, áskerı bólimshe, áske­rı kúzet jáne áskerı prokýratýra qyzmet­kerleri men órt sóndirýshiler. TJM-niń málimetteri boıynsha, jarylys kezinde 50-ge jýyq órt sóndirýshi túrli dárejede dene jaraqatyn alǵan. Jarylystan 13 adam qaza taýyp, 98 adam jaraqattanǵan. Sondaı-aq qazirgi tańda taǵy úsh adamnyń jeke bas maǵlumattary anyqtalyp, joǵalǵan úsh adam izdestirilý ústinde.

Marqumdardyń eń jasy 29-da bolsa, aldy alpysty alqymdap qalǵan. О́rtti óz kúshterimen sóndirýge tyrysqan áskerı qyzmetshiler jarylys bolǵan kezde aýyr jaraqat alyp, joıqyn kúshten birneshe metr jerge ushyp ketken. «Ishinde alapat jarylys jasaıtyn qarý men oq-dáriler baryn bile tura, áskerı qyzmetshiler men órt sóndirýshiler apat oshaǵyna nege tym jaqyn barǵan?» degen suraǵymyzǵa áskerı jýrnalıst Sádýaqas Jubatov: «Áskerı adam qaterge barady, eli úshin oqqa da, otqa da kiredi. Áskerı buıryq degen bar... », dep jaýap berdi.

Bas prokýratýranyń baspasóz qyzmeti áskerı bólimdegi jarylys kezinde kóz jumǵan Ońtústik óńiriniń áskerı prokýrory Arman Qapezovpen birge taǵy alty prokýratýra qyzmetkeri bolǵanyn habarlady. «2021 jyldyń 26 tamyzynda Jambyl oblysy, Baızaq aýdany Qaınar aýylynyń mańyndaǵy áskerı bólimnen órt shyqqany týraly aqparat alyp, jeti adamnan turatyn prokýrorlar toby memlekettik organdardyń is-qımylyn úılestirý jáne turǵyndarǵa qaýiptilik deńgeıin anyqtaý maqsatymen oqıǵa ornyna barǵan. Oqıǵa ornynda bolǵan sátte oq-dáriler jarylǵan, saldarynan Baızaq aýdany jáne Ońtústik óńir áskerı prokýratýrasynyń alty qyzmetkeri túrli dene jaraqatyn aldy, bireýi qaıtys boldy», delingen habarlamada. «Qyzmettik boryshyn oryndaý kezinde óz ómirin qaterge tige otyryp, áriptesterimiz erlik pen batyldyq tanytty jáne antqa adal ofı­s­erdiń úlgisin kórsetti», dep málim­dedi vedomstvo. Prokýratýra organdarynda 20 jyldan astam jumys istegen marqum Arman Qapezovtiń artynda tórt balasy qaldy. Al 27 tamyz onyń týǵan kúni edi...

О́rt ornyna alǵash bolyp barǵandardyń biri – órt sóndirý qyzmetiniń polkovnıgi Meıirjan Aımanov edi. Bes bala ákesiz qaldy...

Kúni keshe Ernazar aýylynyń turǵyn­dary Táńirbergen Tórebekovti aqtyq saparǵa shyǵaryp saldy. Tarazdaǵy jarylysta qaza tapqan órt sóndirýshi qyryqqa endi ǵana tolǵan. Artynda aıaǵy aýyr kelinshegi men 3 balasy qaldy...

Eldos Sandybaev – áskerı qoımadaǵy órtti ómirimen óshirgen azamattyń biri. О́rt sóndirýshiniń denesi 27 tamyz kúni tańerteń tabylǵan. Marqumnyń artynda tórt jasar qyzy, eki jasar uly qaldy...

Al qyrshynnan qıylǵan Ádilet Áldı­bekov bir úıdiń jalǵyz balasy edi...

Qaraly tizimde otqa oranǵan on úsh azamattyń aty-jóni bar.

 

TÚIIN. Jambyl oblysynyń Baızaq aýdanynda oq-dáriler qoımasyndaǵy órt pen jarylystardyń saldarynan adamdardyń qazaǵa ushyraýyna baılanysty elimizde Jalpyulttyq aza tutý jarııalandy. Bul – táýelsizdik tarıhynda jarııalanyp otyrǵan onynshy aza tutý. Beıbit zamanda qara jamylyp, qaıǵy shekken halyqta bir ǵana suraq bar. Arystaǵy qasiretten nege sabaq almadyq? Jambyldaǵy jarylys – áskerı saladaǵy jemqorlyq pen jaýapsyzdyqtyń jarylysy emes pe?

Sońǵy jańalyqtar

Uqsas jańalyqtar