Jarystyń alǵashqy kúni Ánýar Aqchýrın amerıkalyq Gevın Rosspen birge kanoe-ekilik saıysynda synǵa tústi. Aıtýly jup 1 000 metrlik qashyqtyqta máre syzyǵyn ekinshi bolyp qıyp ótti. Kelesi táýlikte kanoe-tórttik básekeleri bastaldy. Bul joly qazaq sportshysy «Vashıngton kanoe klab» klýbynyń sapynda óner kórsetip, óziniń komandalyq áriptesterimen birge dál sol mejeden kórindi. Odan keıin Aqchýrın jekelegen saıysta jáne kanoe-tórttikte (200 metr) taǵy qos kúmis medaldi keýdesinde jarqyratty. Jarystyń sońǵy kúni joǵaryda esimi atalǵan amerıkalyq sportshymen birge Ánýar altyn tuǵyrǵa kóterildi. Olar kanoe-ekilik jarysynda aldaryna jan salmady. Nátıjesinde, jerlesimiz AQSh-tyń ashyq chempıonatyn bir altyn jáne tórt kúmis medalmen qorytyndylap, qazaqstandyq jankúıerlerdi qýanysh pen shattyqqa bóledi.
Alystaǵy Amerıkada oljaǵa kenelgen qandasymyz jaıynda aıtar bolsaq, ol 2000 jyly Almaty qalasynda dúnıege keldi. 11 jasynan bastap sporttyń osy túrine myqtap den qoıdy. «Birde ákem Aısultan mektep taqtaıshasyndaǵy jarnamany kórip, meni osy sport túrimen aınalysýǵa úgittedi. Ákemniń aqylyna qulaq asyp, astanadaǵy «Tolqyn» sport keshenine keldim. Ol jaqtaǵy jattyqtyrýshylar menen «Qaısysyn tańdaısyń: akademııalyq esýdi me, álde kanoe men baıdarkany ma?» dep surady. Qapelimde ne dep jaýap bererimdi bilmeı, qatty sasyp qaldym. Baǵyma oraı, sol kezde janymyzǵa bilikti bapkerlerdiń biri kele qaldy. Ol meni qolymnan jetektedi de, ózi jetekshilik etetin úıirmege alyp bardy. Osylaısha, men kanoe esýdiń qyr-syryna qanyǵa bastadym», dep Ánýar óziniń úlken sporttaǵy alǵashqy qadamy jaıynda áńgimelep bergen edi.
Ýaqyt oza jas óren óziniń tabandylyǵy men eren eńbeginiń arqasynda biraz belesterdi baǵyndyrdy. Atap aıtsaq, 2016 jyly jasóspirimder arasynda О́zbekstannyń Samarqand qalasynda ótken Azııa kýbogynda bas júldeni oljalady. 2017 jylǵy Shanhaıdaǵy Azııa chempıonatynda tórtinshi orynǵa taban tiredi. 2008 jyly kanoe-birlikke (S-1) ábden mashyqtanǵan qazaqtyń uly el birinshiliginde aldyna jan salmaı, jeńis tuǵyrynyń eń bıik satysyna kóterildi. Slovakııanyń Pıteshtı qalasynda ótken regatada ol óziniń oń jambasyna keletin jattyǵýda altyn alsa, 500 metrlik saıysta kúmispen kúpteldi. Jastardyń Samarqandtaǵy Azııa birinshiliginde eki ret dara shyǵyp, Bolgarııanyń Plovdıvinde jalaýy jelbiregen álem birinshiliginde kúmis medaldi moınyna ildi.
Osydan biraz ýaqyt buryn halyqaralyq dárejedegi sport sheberi atanǵan qandasymyz eskek esýde eleýli tabystyrǵa qol jetkizýmen qatar, bilimge de myqtap dep qoıyp otyr. 2018 jyly ol Nazarbaev Zııatkerlik mektebin oıdaǵydaı támamdady. Odan keıin bilimin jetildirý maqsatynda muhıttyń arǵy betine attandy. Bul kúnderi Ánýar Aqchýrın AQSh-tyń Melbýrn qalasynda ornalasqan Florida Institute of Technology dep atalatyn irgeli oqý ornynyń 4-kýrs stýdenti.
