Qorǵanys vedomstvo basshysy N.Ermekbaevtyń buıryǵymen Qorǵanys mınıstrligi Bas ınspeksııasynyń bastyǵy general-leıtenant Ámir Halyqov basshylyq etetin Qarýly Kúshterdiń barlyq qoımalaryndaǵy oq-dárilerdi tekserý komıssııasynyń quramy taǵaıyndaldy.
Sheshim Jambyl oblysynda oryn alǵan oqıǵaǵa baılanysty qabyldandy. Alǵashqy sátten bastap-aq qorǵanys mınıstri órt saldaryn joıý jumystaryn uıymdastyryp, oqıǵanyń týyndaý sebepteri men mán-jaıyn taldady.
Apparat keńesinde general-leıtenant N.Ermekbaev atap ótkendeı, Qorǵanys mınıstrligi Arysta bolǵan órtten keıin bundaı oqıǵalardy boldyrmaý úshin keshendi sharalar qabyldaǵan bolatyn.
Sondaı-aq Qarýly Kúshterde Qarý-jaraq pen oq-dárilerdi saqtaý obektilerin jetildirý boıynsha keshendi jospar júzege asyrylyp, 30 jyl ishinde alǵash ret oq-dárilerge tolyq túgendeý júrgizildi jáne eki saqtaý bazasynyń qurylysy uıymdastyryldy.
«Qabyldanǵan sharalarǵa qaramastan, mınıstr bergen birqatar tapsyrmalardyń óz deńgeıinde oryndalmaýy Jambyl oblysyndaǵy oqıǵaǵa sebepker bolýy da múmkin. Oqıǵanyń shynaıy sebepteri men kinálilerdi tergeý jumystary anyqtalýy tıis», dedi qorǵanys vedomstvosynyń basshysy.
Oq-dárilerdi saqtaý obektileri rejımdik ekenin eskere otyryp, komıssııa jumysyna keńesshiler retinde táýelsiz jáne bilikti sarapshylardy, onyń ishinde Qarýly Kúshterdiń ardagerlerin tartý tapsyryldy. Komıssııa oq-dárilerdiń saqtaý jaǵdaıyna obektıvti baǵa berip, barlyq kemshilikterdi anyqtaýǵa jáne olardy joıý jónindegi jumystardy uıymdastyrýǵa yqpal etedi.
