«Nur Otan» partııasynyń jemqorlyqqa qarsy jańa baǵdarlamasy ústimizdegi jyldyń birinshi jartysynda ázirlenedi. Bul jóninde keshe partııa janyndaǵy Jemqorlyqqa qarsy kúres respýblıkalyq qoǵamdyq keńesiniń 2013 jyldy qorytyndylaǵan otyrysynda belgili boldy.
«Nur Otan» partııasynyń jemqorlyqqa qarsy jańa baǵdarlamasy ústimizdegi jyldyń birinshi jartysynda ázirlenedi. Bul jóninde keshe partııa janyndaǵy Jemqorlyqqa qarsy kúres respýblıkalyq qoǵamdyq keńesiniń 2013 jyldy qorytyndylaǵan otyrysynda belgili boldy.
Otyrysta aldymen jemqorlyqqa qarsy úzdik dep tanylǵan plakattar jarııa etildi. Bul týyndylar qoǵam arasynda jemqorlyqqa tózbeýshilik ahýalyn qalyptastyrýǵa baǵyttalǵan. Keshegi otyrys barysynda, sonymen qatar, ótken jylda atqarylǵan jumystarǵa qorytyndy jasaldy. Odan belgili bolǵandaı, Jemqorlyqqa qarsy habarlamalar ortalyǵynyń senim telefondaryna myńnan astam qońyraý túsken. Jáne de «О́zińnen basta» aksııasy aıasynda partııanyń 3046 múshesi óz múlki týraly málimetterdi jarııa etipti. Al «Jemqorlyqqa jol joq!» naýqany barysynda elimizdiń óńirlerinde 80-nen astam aksııa ótkizilgeni belgili boldy.
Jalpy, 2013 jyly «Nur Otan» partııasynyń Qoǵamdyq qabyldaý bólmelerine laýazymdy tulǵalardyń zańǵa qaıshy áreketteri men ártúrli deńgeıdegi sottardyń zańsyz sheshimine qatysty azamattardan 4243 aryz ben ótinish kelip túskeni belgili boldy. Sonyń jartysynan astamy (67 paıyzy) quqyq qorǵaý organdary men ákimdikter jáne partııa músheleriniń qyzmeti sheńberinde qarastyrylypty. Bul rette Jemqorlyqqa qarsy kúres respýblıkalyq qoǵamdyq keńesiniń músheleri óńirlik jáne aýmaqtyq keńes jumystarynyń jumysyn belsendilendire túsý qajettigine erekshe den qoıdy. Mysaly, senator Qýanysh Aıtahanov 225 aýmaqtyq qoǵamdyq keńes bir jylda 566-aq otyrys jáne 177 ǵana jeke qabyldaýlar ótkizgendigin ótkir synǵa aldy.
Partııanyń jemqorlyqqa qarsy jańa baǵdarlamasyn ázirleý úshin jumys toby qurylady. Onyń quramyna úkimettik emes uıymdar men memlekettik organdar ókilderi, Parlament depýtattary, sarapshylar, saıasattanýshylar, ǵalymdar enetin bolady. Jumys tobyna Májilis depýtaty, «Nur Otan» partııasy janyndaǵy Quqyqtyq keńes tóraǵasy Nurlan Ábdirov jetekshilik etedi. Jańa baǵdarlamaǵa qatysty sózinde Jemqorlyqqa qarsy kúres respýblıkalyq qoǵamdyq keńesiniń tóraǵasy Qaıyrbek Súleımenov bylaı dedi: «Partııanyń jemqorlyqqa qarsy jańa baǵdarlamasy jemqorlyqqa qarsy is-qımyl boıynsha júıelik máselelerdi sheshýge baǵyttalady. Atalmysh qujat alǵashqy jartyjyldyqta ázir bolady. Jańa strategııaǵa Ekonomıkalyq yntymaqtastyq jáne damý uıymynyń jemqorlyqqa qarsy usynystary engiziledi. Prezıdent Joldaýyna sáıkes EYDU – Qazaqstannyń álemniń damyǵan 30 eliniń qataryna enýindegi basty baǵdar».
Otyrysqa qatysýshylar jemqorlyqtyń elimiz bedeli men ınvestısııalyq ahýalǵa keri áser etetinine erekshe nazar aýdardy. Sondyqtan da, jemqorlyqqa qarsy is-qımyldy arttyrý jónindegi halyqaralyq standarttardy belsendi engizý qajettigi alǵa tartyldy. Talqylaý nátıjesi boıynsha naqty usynystar ázirlendi.
Asqar TURAPBAIULY,
«Egemen Qazaqstan».
