Aıtýlarynsha, bıyl qańtar aıynda óz aýlasynda óli kúıinde tabylǵan 82 jastaǵy aǵasynyń máıitin úıinde ustap, isti bolǵan áıel jumysqa qaıta oralǵan.
«Jantúrshigerlik oqıǵaǵa baılanysty qozǵalǵan qylmystyq is qysqartylǵan, biraq biz báribir ol adamnan qorqamyz», deıdi jınalǵandar.
Múrdeni 7 aı boıy úıinde saqtaǵan bıologııa pániniń muǵalimi aýyldaǵy Q.Ahmedııarov atyndaǵy orta mektepte jumys isteıdi. Jantúrshigerlik oqıǵadan soń áli kúnge es jııa almaı júrgen tańdaılyqtar onyń mektepten ǵana emes, aýyldan da kóship ketýin talap etýde. Sebebi mundaı oqıǵaǵa qatysy bar adamnyń oqýshylarǵa sabaq bergenin qalamaıdy.
Ata-analar mektep dırektoryna muǵalimdi jumystan shyǵarýdy talap etip, birneshe márte aryz jazǵan. Bolmasa balalaryn sabaqqa jibermeıtinin eskertken. Biraq dırektory jumystan shyǵarýǵa esh quqy joǵyn jetkizgen.
– Zańǵa sáıkes tergeý isi boıynsha aqtalyp shyqty. Eshqandaı jazyǵy joq. Jumysqa ornalasý kerek degen tapsyrmalarmen bizder jumysqa ornalastyryp, shettetilgen ýaqytyndaǵy eńbekaqylaryn tólep shyqtyq. Qazir endi jumysqa qospasqa bizdiń eshqandaı quzyrymyz joq, - deıdi mektep dırektory.
400 tútini bar Tańdaı aýylyn dúr silkindirgen oqıǵa qańtar aıynda bolǵan. 80-nen asqan qarııanyń aıaq astynan iz-tússiz ketkenine týystary da kúmánmen qarapty. О́ıtkeni qaryndasy aǵasyn ár túrli syltaý aıtyp, áleýmettik qyzmetkerlerge kórsetpeı qoıǵan. kórinedi. Al kórshileri birneshe aı boıy qolqany qabqan ıiske tunshyqqandaryn aıtady. Sodan keıin ǵana mán-jaıy belgili bolǵan kórinedi.
Muǵalim qazir 9-10,11 synyptarǵa bıologııa páninen sabaq beredi. Otyz jyldan asa tájirıbesi bar ustaz búkil aýyl qarsy shyqqanyna qaramastan, jumysynda qala beretinin ashyp aıtqan. Al ózi telearna tilshilerine suhbat berýden bas tartqan.
