Nıý-Iorkte Qazaqstan Respýblıkasy men Trınıdad jáne Tobago Respýblıkasynyń BUU janyndaǵy turaqty ókilderi Qaırat Ábdirahmanov pen Rodneı Charlz eki el arasynda dıplomatııalyq qarym-qatynas ornatý týraly Birlesken kommıýnıkege qol qoıdy.
Nıý-Iorkte Qazaqstan Respýblıkasy men Trınıdad jáne Tobago Respýblıkasynyń BUU janyndaǵy turaqty ókilderi Qaırat Ábdirahmanov pen Rodneı Charlz eki el arasynda dıplomatııalyq qarym-qatynas ornatý týraly Birlesken kommıýnıkege qol qoıdy.
Qol qoıý rásimi kezinde ekijaqty deńgeıdegi jáne búkilálemdik uıym aıasyndaǵy yntymaqtastyqtyń qazirgi jaǵdaıy men perspektıvalary boıynsha pikir alysyldy. Qazaqstan men Trınıdad jáne Tobagonyń damý kezeńderiniń uqsastyǵy, atap aıtqanda, táýelsizdikke qol jetkizýleri, demokratııalyq damýy, óńirlik ıntegrasııalyq úderisterge qatysýy, qoǵamnyń toleranttylyǵy atap ótildi.
Taraptar memleketter arasyndaǵy ózara tıimdi baılanystardy keńeıtýdiń mańyzyna den qoıdy. Ásirese, energetıka, saýda-sattyq, óńirlik rynoktarǵa qoljetimdilik, týrızm men bilim berý salalaryndaǵy baılanystar aýqymyn keńeıtýdiń qajet ekendigi atap kórsetildi.
Sondaı-aq, Qazaqstannyń osy aral memlekettiń Ortalyq Azııa elderimen yntymaqtastyǵyn damytýǵa yqpal etý múmkindigi zor. Sonymen qatar, Qazaqstan úshin óz taýarlary men qyzmetterin Latyn Amerıkasy men Karıb basseıni óńirine shyǵarýdyń mańyzy aıtarlyqtaı.
Kezdesý kezinde eki memleket úshin de qyzyǵýshylyq tanytylatyn BUU-nyń kún tártibindegi mańyzdy máseleler de talqylandy. Olardyń arasynda teńizge shyǵatyn joldary joq elder men shaǵyn aral memleketterdiń problemalaryn sheshý, ornyqty damý maqsattaryn belgileý, qorshaǵan ortany qorǵaý, t.b. máseleler bar.
Trınıdad jáne Tobago – Karıb teńiziniń ońtústik bóliginde ornalasqan aral memleket. 1,3 mıllıon halqy bar. Saıası júıesi parlamenttik demokratııanyń brıtandyq úlgisine negizdelgen parlamenttik respýblıka bolyp tabylady. Ekonomıkanyń negizgi sektorlary – munaı men gaz óndirý jáne óńdeý. Sondaı-aq, Trınıdad jáne Tobago – álemde asfalttiń asa iri tabıǵı rezervýary bar el.
Bul el BUU-ǵa 1962 jyldyń 18 qyrkúıeginde engen. Amerıka Memleketteri Uıymyna, Karıb qoǵamdastyǵyna, Dúnıejúzilik saýda uıymyna, Latyn Amerıkasy ekonomıkalyq júıesine múshe bolyp tabylady.
«Egemen-aqparat».
