Aýrýhanadaǵy travmatologııa jáne qabyldaý bólimderi jazataıym jaraqat alǵan, sondaı-aq sozylmaly naýqasy bar turǵyndardy qyrkúıektiń tórtinen bastap qabyldaı bastady.
Atalǵan emdeý mekemesine pandemııa bastalǵaly osymen ekinshi ret ınfeksııalyq ortalyq qyzmetin atqarýǵa týra kelip otyr. Byltyr kóktemde indet órship ketken tusta munda birinshi ret ınfeksııalyq stasıonar jasaqtalyp, 1200-den astam adam koronavırýs indetine qarsy emdeý sharalarynan ótse, bıyl 700-den astam naýqas emdelip shyqqan.
Alaıda aýrýhana dárigerleriniń aıtýynsha, bıyl indet juqtyrǵandardyń ishinde aýyr naýqastar kóp. Sondyqtan jansaqtaý bólimindegi tósek sanyn 18-den 40-qa deıin, al emdeý palatalaryndaǵy tósektik oryn sanyn 280-nen 330-ǵa deıin kóbeıtýge týra kelgen.
«Bıyl aýrýhanany qaıta mamandandyrý byltyrǵa qaraǵanda jeńilirek boldy. Emdeý mekemesi aldyn ala eki aıǵa erkin jetetin dári-dármek qorymen, arnaıy oqýdan ótken medısına qyzmetkerlerimen qamtamasyz etildi. Emdeý algorıtmin de áldeqashan anyqtap qoıdyq. Sondyqtan nebári bir táýliktiń ishinde qalypty aýrýhanadan ınfeksııalyq stasıonarǵa kóship, naýqastardy qabyldap, emdeý sharalaryn bastap kettik. Endi bir táýliktiń ishinde burynǵy qyzmetimizge qaıta kirisip, naýqastardy qabyldap jatyrmyz, dedi qalalyq aýrýhananyń bas dárigeri Danııar Jandaev.
Qalalyq aýrýhanada Covid-19 indetine shaldyqqan 70 shaqty naýqas qalǵan. Olar qazir ınfeksııalyq bólimde em alyp jatyr. Bul naýqastardyń ishinde jansaqtaý bóliminde jatyp shyqqandar da barshylyq. Olardy ajal tyrnaǵynan aman saqtap qalý úshin 400-ge jýyq dáriger bir aı boıy kúresken.
Indettiń taralýyna jol bermeý jónindegi jedel shtabtyń málimetinshe, qazir Qostanaı oblysynda ınfeksııalyq kereýetterdiń 62,0%-y bos, óńirde 652 adam emdelip jatyr. Aımaq turǵyndarynyń 60,2 paıyzy, ıaǵnı 303 899 adam koronavırýsqa qarsy vaksınanyń birinshi komponentin qabyldaǵan. Al 257 227 adam, ıaǵnı óńir turǵyndarynyń 50,9 paıyzy ekinshi komponentin ektirgen.
Qyrkúıektiń 8-i kúni oblys ákimi Arhımed Muhambetov jedel shtabtyń kezekti otyrysyn ótkizip, óńirdegi epıdemııalyq ahýaldy baǵamdap, oblys turǵyndarynan ekpeni ekpindi jalǵastyrýdy surady.
«Búginge deıin oblysqa vaksınanyń birinshi komponentiniń 381 535 dozasy, al ekinshi komponentiniń 339 637 dozasy jetkizildi. Vaksınalaýdy júrgizýge tıisti oqytýdan ótken 426 medısına qyzmetkeri jumyldyryldy. Aımaqta Ashyq jobasyna qatysý úshin 4 682 ótinim qabyldandy», dedi ákim.
Qostanaı qalasy
