«Qalany damytý barysynda qoǵamdyq kóliktiń jumysy úshin sapaly jaǵdaı jasaýǵa basymdyq beremiz. Mysaly, qalada Bus Lane engizý avtobýstardyń jol júrý ýaqytyn orta eseppen 15-20%-ǵa qysqartýǵa múmkindik berdi. Jańa baǵyttardy ashýdan jáne jol ınfraqurylymyn qurýdan basqa, qoǵamdyq kólikti jańartý jáne jańǵyrtý jumystarymen de aınalysýdamyz.
2020 jyldyń basynda balamaly energııa kózderine kóshý aıasynda qala marshrýttaryna 100 elektr avtobýsyn shyǵardyq. Elektr avtobýstardyń ekologııalylyǵyndaǵy artyqshylyǵy: atmosferaǵa zııandy shyǵaryndylardyń bolmaýy, olardy paıdalaný kezindegi únemdilik. Mysaly, dızeldi avtobýstarǵa jumsalatyn shyǵyn táýligine orta eseppen 25 myń teńgeni qurasa, elektr energııasyna jumsalatyn shyǵyn 4-5 ese az. Jeke ınvestısııalar esebinen jelige taǵy 100 elektr avtobýsyn iske qosýdy josparlap otyrmyz.
Sondaı-aq, jeke ınvestısııalar esebinen avtopark salyndy. Keıinnen elektr avtobýstarynyń sanyn kóbeıtetin bolamyz. Jańa avtobýstar ıntellektýaldy baqylaý júıesimen, pandýstarmen jáne erekshe qajettilikteri bar adamdar úshin arnaıy oryndarmen jabdyqtalǵan. Jańa elektroavtobýstar bizge avtoparkti aıtarlyqtaı jańartýǵa, jańa baǵyttardy engizýge, aıaldamalarda avtobýstardyń kútý aralyǵyn qysqartýǵa múmkindik beredi. Eń bastysy – elektr avtobýstary atmosferaǵa zııandy zattardyń shyǵarylýyna baılanysty qala ekologııasyna oń áserin tıgizedi», dep jazdy elorda ákimi.
