Is-sharaǵa Prezıdent janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııanyń tóraıymy, Parlament Májilisiniń depýtaty Lazzat Ramazanova, Aqparat jáne qoǵamdyq damý mınıstri Aıda Balaeva, oblystardyń, Nur-Sultan, Almaty jáne Shymkent qalalarynyń ákimderi qatysty.
Memlekettik hatshy Qyrymbek Kósherbaev saltanatty rásimdi ashyp, Prezıdent Qasym-Jomart Toqaevtyń quttyqtaýyn oqyp berdi. Onda baıqaýdyń óskeleń urpaqty tárbıeleýdegi jáne otbasylyq qundylyqtardy nyǵaıtýdaǵy mańyzdy róli aıtylǵan.
«Men Qazaqstandaǵy ár shańyraq berik bolyp, árbir áýlet baqytty ǵumyr keshkenin qalaımyn. Sol úshin otbasy saıasatyna basa mán beremin. Urpaqtyń boıyndaǵy adamgershilik pen adaldyq, eńbekqorlyq pen meıirimdilik, ultjandylyq pen otanshyldyq sııaqty asyl qasıetterdiń bári, eń aldymen, otbasynda qalyptasady. Qazaq – qashanda ata-anany syılaǵan, úlkenge qurmet, kishige izet kórsete bilgen jurt. Qazirgi jahandaný zamanynda rýhanı qundylyqtardy halqymyzdyń ómir saltyna aınaldyrý – asa mańyzdy mindet. Jyl saıyn «Otbasy kúnine» oraı ótkiziletin ulttyq konkýrs buǵan zor úles qosýda. Onyń, ásirese, jastar úshin berer taǵylymy men tálim-tárbıesi zor», delingen Memleket basshysynyń quttyqtaýynda.
Bıyl atalǵan konkýrsty ótkizýdiń jańa tásilderi engizilgenin aıta ketken jón. Soǵan sáıkes endi jyl saıyn respýblıka boıynsha 17 úzdik otbasy anyqtalady. Osy jyly óńirlik konkýrstyq komıssııalarǵa barlyǵy 2 768 ótinim tústi. Jańa erejelerge sáıkes ótinimder tek otbasylardan ǵana emes, zańdy tulǵalardan da qabyldandy.
Is-shara sońynda Memleket basshysynyń atynan laýreat otbasylarǵa estelik syılyqtar tabystaldy.
О́z kezeginde jeńimpaz otbasylardyń músheleri áserimen bólisip, osyndaı qoldaý kórsetilip jatqanyna rızashylyǵyn bildirdi. Aldymen sóz alǵan Aqmola oblysyndaǵy kópbalaly otbasynyń otaǵasy, qandas aǵaıyn Qurmet Nursultan Elbasy Nursultan Nazarbaev pen Prezıdent Qasym-Jomart Toqaevqa qandastardy qoldaǵany jáne pedagogterdiń mártebesin kótergeni úshin alǵys aıtty.
Soltústik Qazaqstan oblysynan laýreat bolǵan Kreıdýn otbasy – bes balany asyrap alyp, tárbıelep otyrǵan úılesimdi jáne tatý otbasynyń úlgisi. Marapattaý kezinde Inna Kreıdýn otbasymen birge basqa da otandastarymyz sııaqty Qazaqstandaǵy aýyldardyń órkendeýi men damýy úshin barlyq kúsh-jigerin salatynyn atap ótti.
Almaty qalasynyń dárigerler áýletiniń ókili, «ASTANA EKOLAIF» EKU medısınalyq ortalyǵynyń bas dırektory Almagúl Ahmetova Memleket basshysynyń bastamasymen júzege asyrylyp jatqan «Ańsaǵan sábı» baǵdarlamasynyń jáne balasyz otbasylardy memlekettik qoldaý sharalarynyń ózektiligin alǵa tartty.
Al Túrkistan oblysynan laýreat bolǵan Jamalovtar otbasy óńirde aýyl sharýashylyǵyn belsendi damytyp jatyr eken. Bıyl erli-zaıyptylardyń shańyraq kótergenine 30 jyl tolypty. Otaǵasy Asylbek Tursynbaıuly «Bizdiń otbasymyz – el Táýelsizdiginiń qurdasy!», deıdi.
Buǵan qosa Otbasy kúni qarsańynda elordada Aıdos Nurbaev pen Araı Saparǵalıqyzy neke kýáligin aldy. Aıdos – jeke kásipker, Araı – jetekshi ınjener-jobalaýshy. «Bul baıqaý – biz úshin jaqsy belgi! Kópshilik úlgi alyp, boı túzegisi keletin ónegeli otbasylardyń ortasynan tabylǵanymyzǵa qýanyshtymyz!», dep jas jubaılar aǵynan jaryldy.
Ulttyq konkýrstyń 2016 jylǵy jeńimpazy Aqtóbe oblysynan Nusqabaevtar otbasynyń ókili Qaırat Nusqabaev bul baıqaý otbasy múshelerine úlken jaýapkershilik júktegenin aıtty. Ol «Osy joǵary mártebeni abyroımen saqtaý – bizdiń paryzymyz», deı kele jeńimpaz otbasylar men jas jubaılarǵa baqyt pen amandyq tiledi.
El Prezıdenti atynan laýreat otbasylarǵa estelik syılyqtardy óńirlerdiń ákimderi tabys etti.
«Mereıli otbasy» ulttyq baıqaýy Elbasynyń bastamasymen 2013 jyldan beri ótkizilip keledi. Baıqaýdyń maqsaty – otbasy ınstıtýtyn, otbasylyq qundylyqtardy nyǵaıtý, bala tárbıesindegi ata-analardyń jaýapkershiligin arttyrý, úlgili qazaqstandyq otbasyn nasıhattaý.
