О́ńir basshysy Prezıdent tapsyrmasymen ázirlenip, qolǵa alynǵan «Qarapaıym zattar ekonomıkasy» baǵdarlamasy boıynsha bir myńdaı jańa jumys ornyn ashýǵa múmkindik bergen 185 joba qarjylandyrylyp, oǵan 52,6 mlrd teńge bólingenin aıtty. «Al bıyl osy baǵdarlama boıynsha byltyrǵa qaraǵanda qarajat 1,6 ese artyq bólindi. Baǵdarlamanyń 2022 jylǵa deıin sozylatyny jańa múmkindikter beredi», dedi ol. Al «Bıznes-2025 jol kartasy» baǵdarlamasy boıynsha sońǵy úsh jylda 675 joba iske asyrylǵan. Sonymen birge Q.Aqsaqalov jýyrda Memleket basshysy Qasym-Jomart Toqaev Soltústik Qazaqstanǵa kelgen saparynda ashylǵan aýyl sharýashylyǵy tehnıkalaryn qurastyratyn CLAAS kompanııasy men «Petropavldyń elektrotehnıkalyq zaýyty» kásiporyndary eksportqa baǵyttalǵan ónim shyǵaratynyn atap ótti. Al qaǵaz shyǵaratyn ORKENDEU QAGAZ, farmasevttik preparattar óndiretin Sapa Pharm, aǵash jońqalarynan panelder jasaıtyn «Severnyı fanernyı kombınat» JShS kelesi kezekte ashylatynyn málimdedi.
Aýyl sharýashylyǵynda byltyr ǵana 1 682 sharýaǵa 50 mlrd teńgeniń kómegi kórsetilgen. Áleýmettik mańyzdy azyq-túlik baǵasyn turaqtandyrý úshin 1,1 mlrd teńge bólingen. Memleket basshysynyń Joldaýda kótergen máselesiniń biri – jaıylym problemasy. Bizdiń oblysta da qosalqy sharýashylyqqa 678,8 myń gektar jaıylym jetispeıdi. «Osyǵan baılanysty biz qazirdiń ózinde jaıylymdy 82,5 myń gektarǵa ulǵaıtýdy kózdep otyrmyz. Qashyqtan jasalǵan zondtaý arqyly taǵy 816 myń gektar jaıylym tabylyp otyr, onyń 47 myń gektary qazir qaıtarylǵan», dedi Q.Aqsaqalov.
Búgingi tańdaǵy kúıip turǵan máseleniń biri densaýlyq saqtaý salasy bolsa, sońǵy úsh jylda ony jańǵyrtýǵa 10 mlrd teńge bólingen. Sonyń ishinde bıyl 3 mlrd qarastyrylǵan. Qazir oblystyń aýrýhanalarynda MRT, kompıýterlik tomograf, sıfrly mammograf, eksperttik klastaǵy ÝZI-ler kóptep alynǵan. 480 oryndyq kóp profıldi aýrýhananyń qurylysy jalǵasýda. Áleýmettik-ekonomıkalyq damýdyń ekinshi jospary aıasynda oblystyń aýyldyq eldi mekenderinde 47 medısınalyq nysan salynady.
Joldaýda Prezıdent buqaralyq jáne balalar sportyn damytý máselesin alǵa qoıdy. Qazir oblysta 2 894 sporttyq nysan jumys isteıdi. Onda 21 myńnan astam balalar men jasóspirimder sportpen aınalysady. Bıyl mamyr aıynan bastap 5 myńnan artyq bala sporttyq seksııalarǵa tegin qatysa alady.
«Orta bilim berý júıesiniń ótkir problemasy» dep Memleket basshysy mektepterde oryndardyń jetispeýshiligin atap ótip, mektep qurylysy boıynsha jumysty jandandyrý mindetin qoıdy. Sońǵy 3 jylda oblysta bilim berý mekemeleriniń 63%-y jóndeldi, 4 jańa mektep salyndy. Bıyl Taıynsha aýdanynyń Vıshnevka aýylynda 120 oryndyq mekteptiń qurylysy bastaldy. Taıynsha qalasynda 600 oryndyq mektep salý josparlanýda. Eki mektep te apatty mektepterdiń ornyna salynady.
Keshendi jospar aıasynda aldaǵy jyldary 15 jańa mektep, onyń ishinde oblys ortalyǵynda «Kopaı» shaǵyn aýdanynda 1 200 oryndyq mektep jáne 200 oryndyq ınternaty bar 400 oryndyq túzetý mektebin salý josparlanýda.
Muǵalimderdiń jalaqysy artty. Búginde ol orta eseppen 250 myń teńgeni quraıdy, ıaǵnı 1,5 esege artty. Pedagog mártebesin arttyrý 2 jyl ishinde bilim berý salasyna 700-ge jýyq jas maman tartýǵa múmkindik berdi. Kadr tapshylyǵy 6 esege tómendedi. Bizdiń aldymyzda oblysty jastar úshin tartymdy etý mindeti tur. Bul úshin ýnıversıtettiń jańa oqý-zerthanalyq korpýsyn zamanaýı tehnologııalar boıynsha salyp jatyrmyz. Arızona ýnıversıtetimen yntymaqtastyq týraly memorandýmǵa qol qoıyldy. Bes jyldan keıin stýdentterge qos dıplom alýǵa múmkindik týady. Sońǵy jyldary óńirlik joǵary oqý oryndaryna granttar sany artty. Bıyl jergilikti bıýdjet esebinen oblysymyzǵa qajetti mamandyqtar boıynsha (veterınarııa, bilim berý, jalpy medısına, agronomııa, mal sharýashylyǵy) 50 bilim granty bólindi. Bilimge qarjy quıý óz jemisin berýde. Eger 2017 jyly JOO-ǵa oqýǵa túsý 58%-dy qurasa, 2021 jyly 73%-dy qurady», dedi ákim bilim salasy týraly aıtqan sózinde.
«Eńbek» baǵdarlamasy boıynsha oblysqa 2021 jyly Almaty, Jambyl, Qyzylorda, Mańǵystaý jáne Túrkistan oblystarynan 563 otbasydan turatyn 2 150 adam kóship kelgen. Bul jumys jyl aıaǵyna deıin jalǵasyp, kelýshiler sany arta túsedi. Barlyq qonys aýdarýshylarǵa kóshi-qon jáne turǵyn úılerdi jaldaý shyǵyndary tolyq tólengen.
Sonymen birge oblys ákimi Prezıdent Q.Toqaevtyń qazaqstandyqtardyń ál-aýqatyn arttyrýǵa baılanysty Joldaýynda aıtyp ótken tapsyrmalarynyń durystyǵyna toqtaldy. «Eń tómengi jalaqyny 2022 jyldyń 1 qańtarynan bastap 60 myń teńgege jetkizý, bıznes salasy qyzmetkerleriniń jalaqysyn ósirý boıynsha «jumsaq» yntalandyrý sharalaryn qarastyrý, eńbekaqy qorynyń júktemesin 34 %-dan 25%-ǵa túsirý, bıýdjet salasy qyzmetkerleriniń eńbekaqysyn 20 paıyzǵa arttyrý, zeınetaqy qorynyń bir bóligin turǵyn úı satyp alý úshin «Otbasy bank» esebine aýdarý týraly bergen tapsyrmalary óte ózekti máseleler. Onyń oryndalýy qazaqstandyqtardyń ál-qýatyn arttyra túseri sózsiz», dedi Q.Aqsaqalov.
Soltústik Qazaqstan oblysy
