«Jınaqqa Ilııas Esenberlınniń «Muhıttan ótken qaıyq» atty úlken romany da endi. Bul týyndyǵa jazýshynyń kózi tirisinde keńes ýaqytynda senzýramen tyıym salynǵan bolatyn», dep habarlaıdy Iııas Esenberlın atyndaǵy qor.
Esenberlın óz shyǵarmasynda keńes bıligi men Qazaqstan halqy arasyndaǵy ózara baılanysty, Dinmuhamed Qonaev pen basqa da zııaly qaýym ókilderin mysal etip beınelegen.
«Ilııas Esenberlınniń eńbekterin zerttep-tanymaıynsha qazaq tarıhyn tolyq tanyp-bilý múmkin emes. Biz ata-babamyzdyń kúrdeli, alaıda erlikke toly júrip ótken jolyn máńgi este saqtaýymyz kerek. Jazýshynyń «Kóshpendiler» trılogııasy jáne «Altyn Orda» romany bizdiń tarıhty qalpyna keltirýge úlken yqpal etti. Qazaq halqynyń patrıottyq rýhyn kóteretin Ilııas Esenberlınniń týyndylary bizdiń qasıetti jerimizdiń tarıhyna degen qarym-qatynasty qasterleýge úıretedi», dep jazylǵan Qazaqstan prezıdenti Qasym-Jomart Toqaevtyń oqyrmandarǵa arnalǵan úndeýinde.
Shyǵarmalar jınaǵyna «Aqqý qustar qýanyshy» men «Alystaǵy araldar» atty buryn orys tiline aýdarylmaǵan, kesh jazylǵan romandary da endi. Jınaqqa sondaı-aq poemalar men óleńder jáne Brýsılovskıı men Baıqadamovtyń mýzykasyna jazylyp, 50-shi jyldary jaryq kórgen ánder mátini de engen.
Ilııas Esenberlınniń shyǵarmashylyǵy Qazaqstanda ǵana emes, búkil álemde keńinen tanymal. Onyń kitaptary álemniń 30-dan astam tiline aýdarylǵan, kitaptarynyń jalpy taralymy 7 mıllıonǵa jýyq.
