Nurlan Soltambekov Kishi Taldykóldi saqtap jáne sýyn toltyra otyryp, rekreasııalyq aımaq qurý boıynsha jobalaý-smetalyq qujattama ázirleýdi tapsyrdy. Sý aýmaǵy keminde 20 gektar bolady.
«Osylaısha, sý túbin tereńdetý jumystary laı jáne basqa da zııandy shógindilerden tazartýǵa, ortasha tereńdikti arttyrýǵa, sý balansyn saqtaýǵa jáne t.b. múmkindik beredi. Aıta ketý kerek, qazir sýly-batpaqty nysandaǵy negizgi ıondardyń, aýyr metaldardyń, bıogendik zattardyń quramy normadan birneshe ese asady», dep jazady Nur-Sultan qalasy ákiminiń resmı saıty.
Vedomstvo aqparatyna súıensek, tereńdigi 20 sm-den kem ári qaýipti, batpaqty – Kishi Taldykól mańy qalpyna keltirilip, abattandyrylady. Onda áleýmettik nysandar, ıaǵnı turǵyn úıler, mektepter, medısına ortalyqtary salynady.
«Kishi Taldykóldi qalpyna keltirý jumystary akvatorııa qura otyryp, jaǵalaý salýǵa múmkindik beredi: bolashaqta eki jaǵalaýdy jalǵaıtyn kópir salý, qala turǵyndary úshin sý kóligin iske qosý, sondaı-aq flora men faýnasy bar ekoklımatty saqtaý josparlanyp otyr», dep jazylǵan habarlamada.
Sondaı-aq Kishi Taldykól sýly-batpaqty nysany aǵyn sýlar jınalǵan oryn bolǵanyn, úlken Taldykól sýymen tabıǵı baılanysy joq ári jerústi aǵyny men jerasty sýlary arqyly ózara baılanyspaıdy.
«Taldykóldiń (úlken Taldykól) óziniń ekologııalyq ınfraqurylymy bolady. Taldykól kóliniń janynda qoryq, orman-saıabaq aımaǵy bar elimizdegi alǵashqy tabıǵı park ashylady. Al ekinshi ekopark – Maıbalyq kóliniń mańy (áýejaı baǵyty boıynsha ońtústik-shyǵys jaǵy) tartymdy oryndardyń biri bolmaq», dep jazady vedomstvo.
