Bıyl shildede Ulttyq statıstıka bıýrosy qashyqtan jumys isteıtin qyzmetkerler sanyn statıstıkalyq esepterge jańa ındıkator retinde engizdi. Resmı málimetterge sáıkes, bul sanat jumyspen qamtylǵan halyqtyń jalpy sanynyń shamamen 1% quraıdy. Habarlandyrý saıtyndaǵy kóptegen mamandyqtar sıfrlyq saýattylyqtyń bolýyn talap etedi.
Ondaǵy eń jıi kezdesetin bos jumys oryndary – telefonmen saýalnama júrgizetin operator, dızaıner, repetıtor, SMM mamany jáne saýda menedjeri. Al Tik Tok rolıkterin qaraıtyn maman, fýtbol sarapshysy, fıtnes brendtiń ambassadory syndy vakansııalar kóp emes. Jumys berýshiler 75 myń teńgeden 150 myń teńgege deıin, keı habarlandyrýlarda tipti 1 mln teńgege deıin jalaqy usynady.
Jalpy Qazaqstannyń jańa kásipter men quzyretter atlasy 129 joıylyp bara jatqan, 95 transformasııalanatyn jáne 239 múldem jańa mamandyq anyqtady. Olardyń kópshiligi qoǵamda jańa qajettilikteriniń paıda bolýymen baılanysty. Kóp jaǵdaıda bolashaqtaǵy qyzmetter birden birneshe saladaǵy bilimdi qajet etedi. Eki salanyń túıisken jerinde jumys isteýge daıyn mamandar suranysqa ıe bolady. Ásirese, jumys istep júrgen salanyń sıfrlyq áleýetin eskerip, jańa tehnologııalardy qazirden bastap meńgergen jón. Atlas avtorlarynyń aıtýynsha, qazaqstandyqtarǵa IT daǵdylary týraly oılaný kerek. Tipti aýyl sharýashylyǵynda da jem nemese sý kólemin esepteı alatyn sıfrlyq júıeler paıdalanylatyn bolady, al egistikterde avtonomdy robottar jumys isteıdi, olarǵa qyzmet kórsetý úshin aýyl sharýashylyǵyn da, robototehnıkany da biletin mamandar qajet bolady.
