Senattyń aldyńǵy otyrysynda birinshi oqylymda maquldanǵan qujatta Qazaqstan Respýblıkasynyń 16 zańnamalyq aktisine ózgerister men tolyqtyrýlar engizý kózdelgen bolatyn. Atap aıtqanda, erler men áıelderdiń eńbek salasyndaǵy quqyqtarynyń teńdigi men múmkindikterin qamtamasyz etý úshin Kodekste áıelderdiń eńbegin paıdalanýdy shekteıtin, sondaı-aq áıelderdi aýyr jumystarǵa, eńbek etý barysynda zııandy jáne qaýipti jumystarǵa jibermeıtin erejelerdi alyp tastaý usynylady.
Sonymen qatar bul ózgerister «Turǵyn úı qatynastary týraly», «Memlekettik ataýly áleýmettik kómek týraly», «Qazaqstan Respýblıkasynda múgedektigi boıynsha jáne asyraýshysynan aıyrylý jaǵdaıy boıynsha beriletin memlekettik áleýmettik járdemaqylar týraly» zańdarǵa da qatysty bolady.
«Turǵyn úı qatynastary týraly Zańǵa engizilgen túzetý múgedektigi bar bala tárbıelep otyrǵan, olar 18 jasqa tolǵanǵa deıin turǵyn úı almaǵan otbasylarǵa turǵyn úı alý kezegin saqtaýdy kózdeıdi. Sondaı-aq az qamtylǵan otbasy balalaryna áleýmettik toptama kepildigi beriledi jáne portal arqyly arnaýly áleýmettik qyzmet kórsetý usynyldy», dedi senator Narıman Tóreǵalıev.
Zań jobasyn qabyldaý arqyly azamattardy negizgi áleýmettik kepildiktermen, onyń ishinde qosymsha muqtajdary bar adamdardy áleýmettik qoldaý, ataýly áleýmettik kómek jáne zeınetaqymen qamtamasyz etýdiń ózekti máselelerin sheshý kózdelip otyr.
Otyrys qorytyndysy boıynsha zań jobasyn ekinshi oqylymda qaraý úshin Palataǵa jiberý týraly sheshim qabyldandy.
