«Departament 59 qylmysty tirkedi. Sonyń 52-si – sybaılas jemqorlyq. Memlekettik organdarda jumys isteıin segiz basshynyń jemqorlyq áreketi áshkerelendi. Ekeýi oblystyq deńgeıde qyzmet etse, altaýy qalalyq jáne aýdandyq deńgeıde jumys istegen. Memleketke kelgen shyǵynnyń jalpy kólemi 47,7 mıllıon teńgeni qurap otyr. Sonyń 91,1 paıyzy, ıaǵnı 43,5 mıllıon teńgesi qaıtaryldy», dedi Jarqyn Ǵalymov arnaıy brıfıngte.
Onyń aıtýynsha, jemqorlyq faktileri týraly habarlaǵany úshin aqshalaı syıaqy berý júıesi de óz nátıjesin kórsetti. Al ótken jyly jańa dıfferensıaldy júıe, ıaǵnı anyqtalǵan paranyń kólemine qaraı syıaqy berile bastaǵannan keıin jemqorlyq týraly habarlaıtyn adamdardyń sany kóbeıe tústi.
«Qazaqstanda jańa dıfferensıaldy júıe engizilip otyr. Buryn yntalandyrý qylmystyń sanatyna qaraı jasalatyn. Qazir jemqorlyq týraly habar bergen adam paranyń kólemine qaraı 10 paıyzdyq syıaqyǵa ıe bola alady. Osylaısha, 4 000 aılyq eseptik kórsetkish, ıaǵnı 11,6 mıllıonǵa deıin alýǵa múmkindik bar», dep atap kórsetti Ǵalymov.
Jyl basynan beri Soltústik Qazaqstanda tórt adamǵa jalpy somasy 816 760 teńgeniń syıaqysy berildi. Árbireýi 204 190 teńgeden aldy. Úsheýi para týraly habar berse, bireý qyzmet babyn paıdalaný arqyly alaıaqtyq jasaý jaıynda aldyn ala habar bergen.
Zań boıynsha para nemese memleketke kelgen zalaldyń kólemi 1 000 AEK (2 mıllıon 917 myń teńge) bolsa, ol aqshanyń 10 paıyzy habar bergen adamǵa syıaqy retinde beriledi. Biraq aqshalaı syıaqynyń mólsheri 4 000 AEK-ten (11 mıllıon 668 myń teńge) aspaýy shart.
