Sot materıaldaryna sáıkes, aryzdanýshylar vaksına almaǵan jumyskerler úshin mindetti PTR-test engizý, profılaktıkalyq ekpe jasaý, sondaı-aq vaksına saldyrmaǵandardy jumysqa kirgizbeý sııaqty tarmaqtardy zańsyz dep sanaıdy.
«Qaýly konstıtýsııalyq normalardy buzady, ómirge qaýip tóndiredi jáne densaýlyqqa zııan keltiredi, adamdardyń eńbek etý quqyǵyn buzady. COVID-19 vaksınasy tekserilmegen», deıdi olar.
Ákimshilik sot bas memlekettik sanıtar dáriger shyǵarǵan qaýlylardyń bir bóligin zańsyz dep taný jáne kúshin joıý týraly shaǵymdy qanaǵattandyrýdan bas tartty.
«Sot qaýlylardy shyǵarý kezinde zańnama normalarynyń buzylýyn anyqtaǵan joq. Azamattardyń eńbek quqyqtary buzylmaǵan, óıtkeni COVID-19-ǵa qarsy vaksınalanbaǵan jumysker kepildendirilgen eńbek quqyqtaryn saqtaıdy, eńbek fýnksııalaryn qashyqtan júzege asyrýǵa ruqsat etiledi. Ol úshin qajetti jaǵdaılar jasalýda», delingen sot úkiminde.
Sýdıanyń aıtýynsha, qaýlylardyń daýly tarmaqtary vaksınalaýdy uıymdastyrý máselesin reglamentteıdi. Ony vaksınalaýdy mindetteý dep qabyldaýǵa bolmaıdy. Al Qazaqstan Respýblıkasynyń farmasevtıkalyq naryǵyna qandaı da bir vaksınany kirgizý preparattyń qoıylatyn talaptarǵa sáıkestigin bildiredi.
Anyqtalǵan mán-jaılardyń bárin, jalpy álemdik ınfeksııamen kúresýge baǵyttalǵan sharalardy qabyldaýdyń qajettiligin eskere kelip, sot bas sanıtar dárigerdiń qaýlylaryn zańsyz deýge negiz joq dep tapty, dedi sýdıa.
