27 qyrkúıek kúni tańerteń Prezıdent Gýrbangýly Berdimuhamedov pen sheneýnikter Táýelsizdik monýmentine gúl shoqtaryn qoıdy. «Hronıka Týrkmenıstana» memlekettik aqparattyq agenttiginiń habarlaýynsha, rásimge dıplomattar men sheteldik qonaqtar da qatysty.
Sodan keıin jańa minberde saltanatty sherý bastaldy.
Atalǵan minber 16 qyrkúıekte Ashhabadtyń ońtústiginde ashyldy. Ony salýǵa 109,3 mıllıon dollar jumsalǵan. Qurylysyn fransýzdyq Bouygues kompanııasy júrgizdi, onyń basshysy Martın Býıgez Berdymýhamedovti táýelsizdiktiń 30 jyldyǵymen jeke quttyqtaý úshin Túrkimenstanǵa arnaıy keldi.
Bıylǵy Táýelsizdik kúnine arnalǵan sharanyń ótken jyldardan aıyrmashylyǵy - Berdimuhamedov arnaıy jasaqtalǵan aq tústi gelendvagen kóligimen minbege kelip, Memlekettik qaýipsizdik keńesiniń hatshysy Charmymyrat Amanovtan raport qabyldady.
Sherý kezinde ár túrli áskerı qarý men tehnıka kórsetildi.
Sherýden keıin alańǵa zergerlik buıymdar kıgen Aqalteke jylqylary shyǵaryldy. Prezıdent Garashsyz (Táýelsiz) atty jylqyǵa minip, qurmet bildirdi, kórermenderdiń qoshemetine bólendi. Ony Prezıdentke qarýlas joldastary «Otannyń órkendeýi, halyqtyń baqyty men amandyǵy jolyndaǵy tynymsyz eńbegi úshin tereń, shynaıy rızashylyqtyń belgisi retinde» syılaǵan.
Osydan keıin «Galqynysh» ulttyq at sporty oıyndary tobynyń shabandozdary óner kórsetti.
Mereke «bılik pen baqyt dáýirine, uly Arkadag pen Túrkimenstanǵa arnalǵan» ánmen aıaqtaldy. Osydan keıin alań ústinde dron shoýy men merekelik otshashý boldy.
2018 jylǵa deıin Túrkimenstannyń Táýelsizdik kúni 27 qazanda toılanyp keldi, biraq 2017 jyly aqsaqaldar keńesiniń otyrysynan keıin, belgisiz sebeppen merekeni bir aı ilgerige jyljytý týraly sheshim qabyldandy.
