74 otbasy qýanyshy

Oblysta «Qoljetimdi turǵyn úı-2020» baǵdarlamasy boıynsha 115 myń sharshy metr turǵyn úı paıdalanýǵa berildi. Bul 1400 otbasy páter ıelendi degen sóz. Jyl bastalmaı jatyp jer­­gi­likti jerlerde qonys toılary jalǵasyn taba bastady. Solardyń biri Taıynsha aýdanynda atalyp ótti. Saltanatty sharaǵa aımaq basshysy Samat Eskendirov qatysyp, memlekettik baǵdarlamanyń birinshi baǵyty sheńberinde kezekte turǵan turǵyndarǵa páter kiltterin tabys etti. Elbasynyń qoldaýy arqasynda turǵyn úıler salý isine zor mán berilip otyr. Mundaı áleýmettik múmkindikterge el ekonomıkasynyń turaqty damýy arqasynda qol jetkizip otyrmyz, dedi ol óz sózinde. Sonymen, Taıynsha qalasynyń tur­ǵyn úı qory jańadan boı kótergen 74 páterli eki baspanamen tolyqty. Olardyń birine Uly Otan soǵysynyń ardagerleri, az qamtylǵan otbasylar, bıýdjet salasynyń qyzmetkerleri men ata-ananyń qaraýynsyz qalǵan jasóspirimder qonystandy. Batystaǵy qandy soǵystyń sheńge­linen aman-esen kelip, búginde 100-ge aıaq basqan Balǵoja Sultanov aqsaqal Memleket basshysyna degen rızashylyǵyn aqtaryla aıtty. Buǵan deıin bolashaǵy bulyńǵyr aýylda turyp kelgen qarııa 8 ul-qyz ósirip, 27 nemere, 10 shóbereni qyzyqtap kelse, endi jaıly baspanaǵa qol jetkizgenine shúkirshilik etedi. Oq pen ottyń arasynda júrip, 3 ret jaralansam da beıbit ómir tirshiliginen qalǵan joqpyn, áli tyńmyn, deıdi qart jaýynger ázil-shynyn aralas­tyra sóılep. Ata-anasynan erte jetim qalǵan Farıd Júsipovke bir bólmeli páter tıdi. Bilim salasynda qyzmet atqaratyn Chernıevskııler otbasy kezekte 5 jyl turyp kelgen. «Jas otbasy» baǵdarlamasy boıyn­sha baspana alǵan 24 jas shańyraq ıeleriniń de qýanyshtarynda shek bolmady. Keń saraıdaı 3 bólmeli páter tıgen Qaıyr Qappasov «Agrobıznes» kolledjinde, zaıyby SES mekemesinde eńbek etedi eken. Endi, mine, jas maman baǵdarlamasy aıasynda 4 jyldyń ishinde basty muqtajdyǵy sheshilgenine sener emes olar. Sándi de kórikti eki úıdiń turǵyzylýyna 800 mıllıon teńge jumsalǵan. Oblys basshysy irgetasy qalanyp, qabyrǵalary turǵyzyla bastaǵan 50 páterli turǵyn úıdiń qurylys barysymen tanysty. О́mir ESQALI, «Egemen Qazaqstan». Soltústik Qazaqstan oblysy.