Jetimderdi jebegen

qojalyq tóraǵasy Aıtken Shormanov tapqan tabysynyń bir bóligin  qaıyrymdylyq sharalaryna jumsaıdy Shemonaıha aýdanynyń ákimi Amangeldi Toqtarov qazirgi kezde óńirde 28 myńnan astam iri qara,14 myń qoı-eshki bar ekenin, tirkelgen 334 sharýa qojalyqtarynyń bıyl 5028 tonna et, 32 myń tonnadan astam sút óndirgenin, aýylsharýashylyq qurylymdary sońǵy eki jylda ǵana 2 mıllıard teńgege tehnıkalar satyp alǵanyn aıta kelip, Volchanka aýyldyq okrýgine baryp kelýimizge ótinish jasady. Bul aýylda Aıtken Shormanov degen isker azamattyń turatynyn, bıyl mol tabysqa jetkenin, sol jerdegi panajaıǵa (prııýt) kómek jasaıtynyn, onyń ústine azamattyń qaıyrymdylyq sharalaryna belsene aralasatynynan habardar etti. Volchanka aýyldyq okrýginiń ákimi  Aleksandr  Gekktiń ulty nemis eken. Bul aýylǵa nemister sonaý aýmaly-tókpeli zamanda qonys aýdarǵan. Birazy ózderiniń tarıhı otanyna kóship ketken. Qalǵany alty-jeti otbasy. – Osynda týyp-óstik. Bizdiń Otanymyz – Qazaqstan. Qazaqtar qıyn-qystaý kezde tórinen oryn berdi, qazir qudandaly bolyp jatyrmyz. Shaǵyn ǵana aýylda birneshe ulttyń ókilderi tatýlyqpen ómir súrip jatyr. Orta mektepte shaǵyn ortalyq bar. 20 jyl boıy mádenıet úıi qańyrap bos turdy, endi ony jóndep jatyrmyz. Aýdandyq bıýdjet pen Aıtken Shormanov kúrdeli qurylysqa  qyrýar qarjy bóldi, – dep aýyl ákimi bizdi ortalyqtaǵy eki qabatty Mádenıet úıine ertip keldi. Edenine parket tóselgen, aınadaı jarqyraǵan bólmelerde kitaphana, mýzyka zaly, bıshiler jattyǵatyn oryn bar. Qarashanyń 15-juldyzynda Mádenıet úıi saltanatty jaǵdaıda ashyldy, dep aýdan ákimi A.Toqtarov habardar etti. Eki qabatty panajaıǵa keldik. Ol 2001 jyly ashyl­ǵan. Munda 3 jaspen 16 jas aralyǵyndaǵy asyraýshy­synan aıyrylǵan nemese ákesi men sheshesi joq, turmysy nashar jandardyń balalary tárbıelenedi eken. Aıtken Shormanov panajaıdyń sý qubyryn tartyp beripti, azyq-túlikpen de kómektesip turady. Panajaı dırektorynyń orynbasary Galına Kalıstratova  tárbıelenýshilerge kúnine tórt ret taǵam beriletinin, aýdan ákimi men qojalyq tóraǵasyna ystyq yqylasyn bildirdi. – Aýyl sharýashylyǵynda 30 jyldan astam eńbek etip kelemin. Keńsharǵa da jetekshilik ettim. Byltyr 3,5 myń gektarǵa egin egip, ár gektarynan 19 sentnerden astyq bastyrdyq. 300 gektarǵa qaraqumyq, 300 gektarǵa suly egip edik, onyń túsimi jaman emes. Bizde 140 adam eńbek etedi, jalaqylaryn aı saıyn alyp turady. N.Knıjensev, S.Korachev sııaqty azamattyń eńbegine rızamyn. Bıyldyń ózinde 10 mıllıon teńgeni qaıyrymdylyq sharalaryna jumsadym, deıdi Aıtken Kámenuly. – Aıtkendeı jany jaısań, jomart jandar aramyzda kóp bolsa, alar asýymyz bıikteı bermek, – dep oblystyq aýyl sharýashylyǵy basqarmasynyń bastyǵy Dúısembaı Selıhanov jyly lebiz bildirdi. Jetimderdi jebegen azamattyń bul isi basqalarǵa da úlgi bolǵaı! Ońdasyn ELÝBAI, «Egemen Qazaqstan». Shyǵys Qazaqstan oblysy, Shemonaıha aýdany.