Ákim qyzmet alýshylarmen tildesip, qarttar kúni merekesimen quttyqtady.
Memleket tarapynan ardagerlerge árqashan qamqorlyq kórsetiletinin jáne onyń kólemi jyl saıyn artyp otyrǵanyn aıtqan qala basshysy bul baǵyttaǵy jumystar Prezıdenttiń memlekettik saıasatyndaǵy basym baǵyttardyń biri ekenin atap ótti.
Shymkenttegi áleýmettik-medısınalyq «Asyl júrek» ortalyǵy 2019 jyldyń naýryz aıynda ashylǵan. Munda kúnine 4 saǵat aqysyz jartylaı stasıonarlyq jaǵdaıynda medısınalyq jáne arnaýly áleýmettik qyzmet kórsetiledi. Ortalyq eki aýysymda jumys isteıdi. Bir aýysymda 80 adamǵa deıin qyzmet kórsetedi.
Bul jerde kún tártibi zeınetkerlerdi dárigerlik tekserýden bastalady. Qarttarǵa qyzmet kórsetý úshin joǵary sanatty kardıolog, terapevt, nevropatolog jáne fızıoterapevt dárigerleri jumyldyrylǵan. Jýyrda mekemede fızıoterapııa kabıneti ashylyp, kópfýnksıonaldy «Polımag» qondyrǵysy iske qosyldy.
Ortalyqta jyl basynan beri 235 zeınetker eki aı kóleminde arnaýly áleýmettik qyzmet aldy. Aldaǵy ýaqytta ortalyqtyń qala aýdandarynda bólimshelerin ashý josparlanǵan.
«Aıta keteıik, búginde Shymkent qalasy boıynsha zeınetkerler sany – 82 351, sonyń ishinde UOS ardagerler sany – 12, tyl eńbekkerleri – 2848», dep habarlady Shymkent qalasy ákimdiginiń baspasóz qyzmeti.
