Mundaı qarjylaı sertıfıkat aldymen Qyzylorda oblysynyń Qazaly aýdanynda ornalasqan Erjigit Bozǵulov atyndaǵy №249 mektep-lıseıine tabys etildi. Atalǵan mektep aýyl oqýshylaryna arnalǵan «Myń bala» ulttyq zııatkerlik olımpıadasynda úzdik nátıje kórsetti. Jobaǵa qatysqan 4 myńnan asa mekteptiń ishinde osy bilim oshaǵy – úzdikter qatarynda. Olımpıadanyń qorytyndysy boıynsha bul mektepte 66 fınalıst jáne 21 jeńimpaz anyqtaldy.
«Myń bala» olımpıadasy osymen ekinshi jyl ótkizilip otyr. Osy ýaqyt ishinde jobaǵa 450 myńnan asa aýyl oqýshysy qatysyp úlgerdi. Olımpıadanyń nátıjesi boıynsha 2 myń oqýshy jeńimpaz atanyp, respýblıkalyq fızıka-matematıka mektebi, «Bilim-Innovasııa» lıseıleri, «Daryn» mamandandyrylǵan mektepteri sııaqty elimizdiń jetekshi mektepterinde oqýǵa, sondaı-aq Elbasy akademııasynyń Birge oqý onlaın mektebinde pándik daıyndyqtan ótýge múmkindik aldy.
Ekinshi aqshalaı sertıfıkatty Soltústik Qazaqstan oblysy Aqqaıyń aýdanynyń №1 Smırnov orta mektebi aldy. «Elbasy medali» jobasyn iske asyrý sheńberinde neǵurlym belsendi aýyl mektepterine taldaý júrgizilip, olardyń ishinde №1 Smırnov orta mektebinde Elbasy medaliniń eń kóp ıegerleri anyqtaldy. Atalǵan mekteptiń 12 oqýshysy baǵdarlamany 7 baǵyt boıynsha aıaqtap, qola medalǵa ıe boldy.
Soltústik Qazaqstan oblysy boıynsha barlyǵy 292 qatysýshy qola medal jeńip aldy. Qazirgi ýaqytta óńir boıynsha «Elbasy medali» jobasynyń baǵdarlamasyna 404 jas qatysty.
Jalpy, eki jyl ishinde búkil el boıynsha 20 myńnan asa qatysýshyny qamtyǵan «Elbasy medali» jobasy 7 baǵytty negizge alady: sport, talanttar men daǵdylar, kitap oqý, ulttyq mura, volonterlik, ekspedısııalar men joryqtar, eńbek tájirıbesi. Bıyl Elbasy medaliniń 605 ıegeri granttar alyp, elimizdiń jetekshi joǵary oqý oryndaryna tústi. Olardyń 30%-dan astamy – aýyl mektepteriniń túlegi.
