Prezıdentke vaksına óndirisiniń tehnologııalyq jelisi, zerthanalyq jabdyqtar men mobıldi reaktorlar kórsetildi.
Instıtýttyń bas dırektory Kúnsulý Zakarııa Bıologııalyq qaýipsizdik problemalary ǵylymı-zertteý ınstıtýtyn odan ári damytý jospary týraly baıandady.
Zaýyt óndiristik tájirıbe boıynsha halyqaralyq standarttarǵa (GMP) saı keletin ımmýnobıologııalyq dári-dármekter, onyń ishinde koronavırýs indetine qarsy vaksına, tumaýǵa, týberkýlezge, brýsellezge, nodýlıarly dermatıtke jáne basqa da juqpaly aýrýlarǵa qarsy vaksına shyǵaratyn bolady.
Jylyna bıofarmasevtıka preparattarynyń 30-dan 60 mıllıonǵa deıin dozasyn ázirleý josparlanyp otyr. Jobanyń jalpy quny – 15,6 mıllıard teńge.
Prezıdentke 16 qyrkúıek kúni 100 myń doza kóleminde vaksına quıý óndirisi iske qosylǵany týraly málimet berildi.
TMD elderi arasynda Qazaqstan men Reseı ǵana COVID-19 indetine qarsy vaksına óndirisin jolǵa qoıǵan.
Prezıdent zaýyt qyzmetkerlerimen áńgimelesý barysynda jobanyń mańyzdylyǵyn atap ótip, otandyq vaksınanyń koronavırýs indetine qarsy kúreske jáne halyqtyń densaýlyǵyn kúsheıtýge zor úles qosatynyna senim bildirdi.
– Barshańyzdy quttyqtaımyn. Shyn máninde, bul úlken jetistik. Elimiz úshin qajetti óndiris. Negizgi jumys oryndaldy. Bári durys. Kelesi jyly osy jumysty jalǵastyramyz. Bul vaksınany Birikken Arab Ámirlikterine jáne basqa da musylman elderine jiberemiz. Vaksınamyz dúnıe júzinde moıyndalyp jatyr. Sondyqtan barshańyzdy quttyqtaımyn! Rızashylyǵymdy bildiremin. Bul – óte kúrdeli prosess, óndiris. Shyn máninde, dúnıejúzinde, shetelde mundaı óndiris jasaý úshin úsh-tórt jyl ketedi. Biz toǵyz aıdyń ishinde jumysty oryndadyq. Sondyqtan eńbekterińiz memleket tarapynan joǵary baǵalanady, – dedi Qasym-Jomart Toqaev.
