SQO boıynsha qylmystyq atqarý júıesi departamenti baspasóz qyzmetiniń málimetinshe, Qyzyljar aýdanynyń probasııa qyzmeti volonterlermen jáne Qyzyljar aýdanynyń kóshi-qon qyzmetimen birge 44 jastaǵy sottalǵanǵa jeke kýálikti resimdeýge kómektesti.
Er adam Reseıde týǵan. Jasóspirim shaǵynda anasymen birge Qazaqstanǵa qonys aýdarǵan, alaıda keıin sheshesi ony tastap ketken. Qamqorshysynyń bolmaýyna baılanysty qujat ala almaǵan.
«Sot ony týý týraly kýálik negizinde sottaǵan. Odan basqa qolynda eshqandaı qujaty joq. Bizge probasııa qyzmetine tirkelisimen, oǵan áleýmettik-quqyqtyq kómek kórsettik. Kóshi-qon qyzmetine tıisti qujattardy tapsyrdyq, olar Reseıge suraý saldy. Rastaıtyn qujattar kelisimen halyqqa qyzmet kórsetý ortalyǵy arqyly jeke kýáligin aldyq», deıdi SQO boıynsha QAJD Qyzyljar aýdanynyń probasııa qyzmeti bóliminiń ınspektory Talǵat Serikuly.
Mamannyń aıtýynsha, mundaı jaǵdaıda qujatty resimdeý úshin azamatty 15 jyldan artyq biletin adamdar kýálik etýi kerek.
«Ony 15 jyldan beri biletin adamdardy izdedik, burynǵy turǵylyqty jerine baryp, turǵyndarmen sóılestik. Olardan túsinikteme aldyq. Keıin barlyq rastaıtyn qujattardy kóshi-qon qyzmetine tapsyrdyq», deıdi Talǵat Serikuly.
Jeke kýálik alǵan er adam endi jumysqa ornalaspaq nıette. «Búgin erekshe kún. Jeke kýálik alyp jatyrmyn. Qujatsyz qıyn, eshqandaı kómek ala almaısyń. Endi resmı túrde jumysqa turmaqpyn», deıdi sottalýshy.
Jyl basynan SQO probasııa qyzmetiniń qalalyq jáne aýdandyq bólimderi ınspektorlary 5 adamǵa alǵash ret jeke kýáligin alýǵa, 9 sottalǵan adamnyń jeke kýáligin qaıta qalpyna keltirýge kómektesti.
