Qazaqstan quramasynyń oıyny qaryn ashyra bastady

Osydan bir aı buryn Bos­nııanyń Zenısa qalasyndaǵy eki quramanyń alǵashqy oıy­nynda Talǵat Baısýfınovtiń shákirtteri jaqsy match ót­ki­zip, azýly qarsylaspen syrt alańda 2:2 esebimen teń tús­ken edi. Sondyqtan óz ala­­­ńymyzda ótetin oıyn­nyń ja­ýapkershiligi men ma­ńyz­dylyǵy fýtbolshylar úshin de, jankúıerler úshin de óte jo­ǵary bolatyn. О́ıtkeni ózi­mizge jáne ózgelerge Qazaq­stan quramasynyń kórsetip júr­gen buǵan deıingi táýir nátı­jeleri (Ýkraınamen – eki ret, Bosnııa jáne Ger­se­go­vınamen bir ret teń oıyn) kezdeısoq emes ekendigin dá­leldeýge jaqsy múmkindik edi. О́kinishke qaraı, nátıje jan­kúıerler kútkendeı bolmady. Syrt alańda terezesi teń túsken quramadan qalaısha óz elińde, óz jankúıerlerińniń qoldaýymen ótken oıynda je­ńilip qalýǵa bolady?

Onyń ústine qarsylastar Qazaqstanǵa ózderi qalaǵandaı ońtaıly qurammen kele almady. Mıralem Pıanıch jáne taǵy tórt fýtbolshy jaraqatyna baılanysty keshegi oıynǵa qatysa almasa, taǵy alty oıyn­shy vıza máselesi boıynsha ulttyq quramasyna kómektese almady. Osylaısha, Bosnııa quramasy 11 fýtbolshysyn elge qaldyryp ketýge májbúr bolsa da, syrt alańda esh qıyn­dyqsyz jeńiske jetti. Mine, bul – ótkennen sabaq alyp, qatelikpen jumys isteý­diń jarqyn nátıjesi!

«Astana Arenada» ótken oıyndy jerlesterimiz óte bel­sendi bastady. Tóreshiniń ys­qyryǵy estilgen sátten bastap Baqtıer Zaınýtdınov bas­taǵan jigitter alǵa qaraı um­tyldy. Eki qaptal arqy­ly kezek-kezek shabýyl uıym­dastyryp, qarsylas qurama­nyń qorǵaýshylaryn saq oı­naý­ǵa májbúrledi. Degenmen ja­sandy alańǵa boı úıretken bos­nııalyqtar 10-mınýttan ba­symdyqty óz qoldaryna ala bastady. Nátıjesinde, matchtyń 25-mınýtynda Mıroslav Ste­vanovıchtiń oń qaptaldan asyr­ǵan pasyn Smaıl Prevlıak bas­pen qaqpaǵa dál baǵyttap, esep ashty. Bul sátte Iýrıı Log­vınenko shabýylshyny qorǵap tur­ǵanymen, Prevlıaktiń aldynda dármensizdik tanytty. Osy arada qaqpashymyzdyń da qatelik jibergenin aıta ketý kerek. Birinshi taım 1:0 esebimen qonaqtardyń basymdyǵymen aıaqtaldy.

Qazaqstan quramasynyń fýtbolshylary ekinshi taımdy da óte shıraq bastady. Jer­lesterimiz birinshi taımda­ǵy­daı eki qaptal arqyly shabýyl uıymdastyryp, qaqpa kiltin tabýǵa tyrysqan edi. Biraq bosnııalyq tájirıbeli qorǵaý­shylar gol soǵýǵa múmkin­dik ber­medi. Al kezdesýdiń 66-mı­­nýtynda Smaıl Prev­lıak qaqpashymen betpe-bet qa­lyp, dýbldiń avtory atandy – 2:0. Matchtyń soń­ǵy mı­nýttaryndaǵy standart jaǵ­daıynda Baqtıer Zaınýt­dınov ju­banysh golyn soǵyp, esep aıyrmasyn qysqartqan edi. Alaıda Italııadan kelgen bas tóreshi qaqpashyǵa qarsy oıyn tártibi buzyldy dep, bul goldy esepke almady.

Matchtan keıin Qazaqstan qu­ramasynyń bas bapkeri Tal­ǵat Baısýfınov oıyn týraly óz pikirin bildirdi. «Negizi oıyn­dy jaqsy bastadyq. Biraq eki qatelik jiberip, qaqpamyzǵa eki gol ótkizip aldyq. Úzilis ke­­zinde fýtbolshylardan «Ne­ge qorqasyńdar?» dep sura­dym. Biraq bul týraly keıini­rek sóıleseıik. Qazirshe biz birinshi nómirmen oınaýǵa da­ıy­n emespiz. Bul fýnksıonaldy jattyǵýlarǵa baılanysty emes. Meniń oıymsha, bul psı­hologııa men mentalıtetke tikeleı qatysty. Bizdiń basymyzda qarsylas birinshi nómirmen oınaýǵa múmkindik bermeıdi degen oı qalyptasyp qalǵan. Jigittermen sóılesip, osy jaǵdaıdy talqylaý kerek», dedi Talǵat Baısýfınov.

Endi Qazaqstan ulttyq qu­ramasy kelesi oıynyn er­teń taǵy «Astana Arenada» Fın­lıandııa quramasymen ótkizedi.