Bul týraly «Moı gorod» basylymy málim etti.
Oblystyq densaýlyq saqtaý basqarmasynyń burynǵy basshysy sot barysynda kinásin moıyndaǵan joq. Biraq 3 shilde kúni sýdıa Bolatbek Kaıýpovty QR QK-niń 366-baby «Para alý» boıynsha kináli dep tanyp, qaýipsizdigi barynsha tómen kolonııada 4 jyl 6 aıǵa bas bostandyǵynan aıyrǵan bolatyn. Sonymen qatar, oǵan ómir boıy memlekettik qyzmette jumys isteýge tyıym salynǵan. Al apellıasııalyq alqa birinshi satydaǵy sottyń sheshimin kúshinde qaldyrdy.
«Memlekettik qyzmet týraly» zańǵa sáıkes qaramaǵyndaǵy qyzmetkeri sybaılas jemqorlyq jasaǵany úshin jaýapty basshy otstavkaǵa ketýi tıis. Osyǵan sáıkes densaýlyq saqtaý salasyna jaýapty oblys ákiminiń orynbasary Aıdar Nurǵalıev otstavkaǵa ótinish bildirdi. Al ákim Ǵalı Esqalıev óz orynbasarynyń otstavkasyn qabyldap, ony qyzmetinen bosatty.
«Bolatbek Qaıypovqa qatysty sottyń aıyptaý úkimi shyqty. Osyǵan baılanysty Aıdar Nuralıev otstavkaǵa ketýge mindetti boldy. Meniń bilýimshe, onyń otstavkaǵa ketýi qabyldandy, Nurálıevti qyzmetinen bosatý týraly ókim bar. Búgin bizdi resmı hatpen habardar etýi kerek», dedi QR Memlekettik qyzmet isteri Agenttiginiń BQO boıynsha departamentiniń basshysy Ǵalym Tursynbaev.
Aıta keteıik, Aıdar Nuralıev oblys ákiminiń orynbasary qyzmetinde bir jyldan astam ýaqyt jumys istedi. Ol 2020 jyldyń maýsym aıynda taǵaıyndalǵan bolatyn.
