О́ńirlerdegi ahýal nazarda ustalady

Keshe Premer-Mınıstrdiń birinshi orynbasary Baqytjan Saǵyntaev selektorlyq rejimde keńes ótkizip, onda ulttyq valıýtanyń aıyrbas baǵamyna túzetý engizilýine baılanysty óńirlerdegi aǵymdaǵy ahýal talqylandy, dep habarlady Premer-Mınıstrdiń baspasóz qyzmeti.  Keńes jumysyna ortalyq memlekettik organdardyń basshylary, oblystardyń, Astana jáne Almaty qalalarynyń ákimderi qatysty. Búginde jergilikti atqarý organdarynyń basty mindeti birinshi qajetti taýarlarǵa baǵanyń negizsiz ósýine jáne óńirlerdegi valıýta aıyrbastaý pýnktterindegi alypsatarlyq dúrbeleńniń oryn alýyna jol bermeý, dedi B.Saǵyntaev. Soǵan oraı birinshi vıse-premer ákimdikterge saýda núkteleriniń úzilissiz jumysyn qamtamasyz etýdi, áleýmettik mańyzdy taýar túrleri men JJM baǵalaryna kúndelikti monıtorıng júrgizýdi, paıda bolǵan problemalarǵa tıisti zańdy sanksııalar qoldanýǵa deıin baryp, shuǵyl únqatýdy tapsyrdy. Sondaı-aq, ákimdikterge Ulttyq bank fılıaldarymen birlesip qarjy rynoktaryndaǵy jaǵdaıdy muqııat qadaǵalaý jáne valıýtanyń aıyrbas baǵamynyń Ulttyq bank belgilegen ólshemderden aýytqýyna jol bermeý jóninde sharalar qabyldaý tapsyryldy. Onyń syrtynda keńeste óńirlik azyq-túlik taýarlaryn turaqtandyrý qorlarynyń qyzmetine qatysty máseleler de talqylandy. Qalyptasqan jaǵdaıda óńirlik turaqtandyrý qorlary azyq-túlik ónimderi baǵasyn turaqtandyrýda yqpaldy qural bolyp tabylady, dep atap ótti B.Saǵyntaev. Turaqtandyrý qorlary qyzmeti máselelerin jalpy úılestirý О́DM-ge júktelip, oǵan ahýaldy jáne áleýmettik mańyzdy azyq-túlik taýarlarynyń baǵasyn retteý monıtorıngi boıynsha EBJM jáne BQA-men tyǵyz baılanysty qamtamasyz etý tapsyryldy. Ishki rynokty azyq-túlikpen qamtamasyz etý jáne óńirlerdegi azyq-túlik taýarlary óndirisiniń balansyna qadaǵalaý jasaý Aýyl sharýashylyǵy mınıstrine júkteldi. Halyq arasynda áleýmettik mańyzdy tamaq ónimderi baǵalaryn turaqtandyrý jóninde Úkimet pen Ulttyq bank qabyldaǵan sharalardy túsindirý bizdiń eń basty mindetimiz bolyp tabylady, dep atap ótti B.Saǵyntaev. Osy oraıda Premer-Mınıstr Serik Ahmetovtiń tapsyrmasy boıynsha óńirlerdegi operatıvti ahýalǵa baqylaý jasaý Premer-Mınıstrdiń birinshi orynbasary Baqytjan Saǵyntaevqa júktelgenin eske sala ketý qajet.