Bırjanyń maqsaty – jergilikti qamtý úlesin ulǵaıtýǵa, otandyq bıznesti damytýǵa jáne olardyń ishki naryqtaǵy áleýetin ashýǵa járdemdesetin taýarlardy, jumystar men qyzmetterdi óndirý jáne jetkizý máseleleri boıynsha kooperasııalyq baılanystardy jolǵa qoıý úshin tapsyrys berýshiler men ónim usynýshylar arasynda tıimdi kezdesýler uıymdastyrý.
Indýstrııa jáne ınfraqurylymdyq damý mınıstrligi Indýstrııalyq damý komıteti tóraǵasynyń orynbasary Oljas Saparbekovtiń aıtýynsha, osy jyldyń birinshi jartyjyldyǵynda vedomstvo 25 uzaq merzimdi shart pen kásipkerlikti yntalandyrý týraly 40 kelisim jasaýǵa kómektesken.
– Júrgizilip jatqan jumystar qazirdiń ózinde oń nátıje berip jatyr. Máselen, birinshi jartyjyldyqta retteletin satyp alý naryǵy sýbektileri memlekettik satyp alýdyń 54,8 paıyzyn ıelenip, 8,9 trln teńgege taýarlar, jumystar men qyzmetterdi satyp aldy. Bul 2020 jyldyń sáıkes kezeńinen 4,8 paıyzǵa joǵary, – dedi O.Saparbekov.
QazIndustry qazaqstandyq ındýstrııa jáne eksport ortalyǵy» AQ basqarma tóraǵasynyń orynbasary Aıdar Kákimjanovtiń aıtýynsha, QazIndustry kelisimsharttar jasasýǵa jáne jergilikti qamtýdy damytýǵa járdemdesetin is-sharalardy turaqty negizde ótkizip keledi.
– QazIndustry bastamalarynyń arasynda otandyq óndirýshiler úshin úlken mańyzǵa ıe jetkizýshilerdi damytý qyzmetin atap ótken jón. Bul – Dúnıejúzilik bankpen birlesken joba. Atalǵan joba aıasynda 43 jetkizýshi akkredıttelgen. Olardyń 123 mln teńgesi óteldi. О́nimdi jetkizýge qatysty 9 memorandým jasaldy. Jasalǵan kelisimsharttar somasy – 3,9 mlrd teńge. Joba aıaqtalýǵa jaqyn. Biz ony odan ári keńeıtýdi josparlap otyrmyz, – dedi A.Kákimjanov.
Bıylǵy sýbkontrakt bırjasynyń qorytyndysy boıynsha birqatar iri kompanııalarmen otandyq taýar óndirýshiler arasynda jergilikti qamtýdy damytý boıynsha yntymaqtastyq týraly memorandýmdarǵa qol qoıyldy.
Eske sala keteıik, sýbkontrakt bırjasyn ótkizgen tórt jyl ishinde atalǵan alań áleýetti tapsyrys berýshiler men jetkizýshilerdiń ózara is-qımylynyń tıimdi quralyna aınaldy.
