Saýd Arabııasy – Qazaqstannyń Parsy shyǵanaǵyndaǵy senimdi seriktesteriniń biri. Soǵan qaramastan álemdi jaýlaǵan indettiń saldarynan eki jaqtyń saýda-ekonomıkalyq baılanysy biraz turalap qalǵany jasyryn emes. Alaıda arab elimen aradaǵy yntymaqtastyqty arttyrýǵa múmkindigi mol, biraq áleýeti tolyǵymen ashylmaǵan ekonomıkanyń sektory kóp. Sol sebepti Qazaqstan bul baǵytty damytýǵa nıetti.
Máselen, elimiz túrli salalarda óńdelgen taýardyń 100 túrin jetkizý boıynsha eksport nomenklatýrasyn 398,5 mln dollarǵa deıin keńeıtýge daıyn. Bul tizimde mashına jasaý, qara metallýrgııa, tamaq ónerkásibi jáne taǵy basqa salalarǵa qatysty taýarlar qamtylǵan.
Taraptar eki eldiń iskerlik ortalarynyń yntymaqtastyǵyn tereńdetýge jáne birlesken is-sharalardy uıymdastyrýǵa, onyń ishinde ónimdi bir elden ekinshisine jetkizip, satý úshin ýaqytsha nemese turaqty kórme pavılondaryn (showroom) ashýdy pysyqtaýǵa kelisti. Qazaqstan men SAK óz elderinde áleýetti satyp alýshylardy izdestirýde bir-birine járdem kórsetýge ýaǵdalasty.
Sonymen birge Qazaqstan aýyl sharýashylyǵy, munaı hımııasy, týrızm, taý-ken metallýrgııa kesheni jáne qarjy sııaqty salalarda birlesken ınvestısııalyq jobalardy iske asyrýǵa baılanysty saýdııalyq kompanııalardy tartýǵa múddeli.
Atap aıtqanda, Baqyt Sultanov saýdııalyq áriptesine elimizde taýar ótkizý júıesin qurý jónindegi jobanyń iske qosylǵany týraly aıtty.
Eki jaq aýyl sharýashylyǵy ónimderiniń saýdasyn júzege asyrý kezinde karantındik fıtosanıtarlyq talaptarǵa baılanysty tájirıbemen almasýǵa, sol sekildi ósimdikter karantıni baǵytynda yntymaqtasýǵa ýaǵdalasty.
Yntymaqtastyqtyń jańa baǵyty retinde «jasyl ekonomıka» qarastyrylýy múmkin. Er-Rııad birlesken jobalardy iske asyryp, tehnologııalarmen almasýǵa baılanysty jáne maman daıarlaý isinde zor perspektıvalar bar ekenin joqqa shyǵarmady. Taraptar kún, sýtegi energetıkasy jáne beıbit atomdy qosa alǵanda, balama jáne jańǵyrmaly energetıka salasyndaǵy seriktestik joldaryn pysyqtaýǵa kelisti.
