Poıyz ben ushaqta jolaqy qymbattamaıdy

Teńge baǵamynyń ózgerýine baılanysty ótkizilip jatqan brıfıngter Ortalyq kommýnı­ka­sııalar qyzmetinde óz jal­ǵa­syn tabýda. Osy maqsatta uıymdastyrylǵan keshegi bas­pasóz máslıhatyna «Jolaýshylar tasymaly» AQ prezıdenti Ermek Tólegenov pen «Eır Astana» AQ-tyń úkimettik, zańnamalyq máseleler jáne qaýipsizdik jónindegi aǵa vıse-prezıdenti Erbol Ospanov qatysty. Olar jýrnalısterge ulttyq valıýta baǵamyna qatysty óz pikirlerin bildirdi. Birinshi sóz kezegin alǵan E.Tólegenov teńge baǵamyna qatysty túzetýdi óz basy durys qabyldaǵanyn aıtty. Sóıtip, kompanııa jumysyna oıysty. «Jolaýshylar tasymaly» AQ halyqtyń belgili bir baǵytqa jedel jetýin qamtamasyz etetin negizgi kompanııalardyń biri retinde óziniń áleýmettik jaýapkershiligin sezinedi. Osyǵan oraı, kásiporyn basshylyǵy qazirgi kúni teńgeniń devalvasııasyna baılanysty­  te­mirjol bıletteriniń qunyn qaıta qa­raýdy josparlap otyr­ǵan joq», dep atap ótti AQ pre­zı­denti. Kerisinshe, ústimizdegi jyly sýbsıdııalanbaǵan ta­sy­mal­daýlarǵa tarıfterdi qaıta retteýdi oılastyryp otyrmyz. Sonyń nátıjesinde júrdek (kommersııalyq) tasymaldaý­ tarıfteri maýsymǵa jáne satý­lar­dyń deńgeıine baılanysty­ azaıtylady, dep jalǵady só­zin E.Tólegenov. Ol aıtqan má­li­metterge qaraǵanda, byltyr temirjol vokzaldarynan 20 mln. 450 myń jolaýshy attandyrylypty. Ol 2012 jylǵy kórsetkishpen salystyrǵanda 953 myń jolaýshyǵa artyq kórinedi. Al bıylǵy jyldyń osy kúnine deıin 1 mln. 675 myń jolaýshy attandyryldy. Ol 2013 jyldyń sáıkes merzimimen salystyrǵanda  600 jolaýshyǵa kóp eken. Jolaýshy tasymaldaý sharýashylyǵynyń basqa da jemisti jumystary týraly áńgimelegen aksıonerlik qoǵam prezıdenti tilshiler tarapynan qoıylatyn suraqtarǵa daıyn ekenin bildirdi. «Eır Astana» AQ-tyń atynan sóz alǵan E.Ospanov teńge qunyna baılanysty jasalǵan túzetý ujymdarynda qalypty qabyldanyp, eshqandaı dúrbeleń­niń týyndaýyna sep bolmaǵanyn jetkizdi. Onyń aıtýynsha, teńge baǵamyna qatysty túzetýler oryn alǵanymen, ishki reısterdegi bıletter baǵasy qymbattamaq emes. Degenmen, shyǵystyń 65 paıyzynyń shetel valıýtasynda júrgiziletinine baılanys­ty, birshama áserler bolýy bek yqtımal eken. Sonyń ózinde ishki reıster tarıfin kóterip, qymbattatý josparlanbapty. – Satylymdardyń 70 paıyzy teńgede, ıaǵnı ulttyq valıýtada júrgiziledi. Qalǵany sheteldik valıýtada júzege asyrylady. Halyqaralyq ushyrylymdardyń barlyǵy derlik dollar, eýromen esep aıyrysady. Sondyqtan da, bul aýyr bolǵaly tur. Alaıda, áleýmettik jaýapkershilikti sezine otyryp, kompanııa ázirge eshqandaı ishki tarıfterdi kótermek emes, – dedi E.Ospanov. Sondaı-aq, «Eır Astana» 2002 jáne 2009 jyldardaǵy jaǵdaılarda da kompanııanyń tarıfterdi kótermegendigin taǵy bir ret aıryqsha atap aıtty. Baspasóz máslıhatyna kelip, tilshiler aldynda túsinik bergen eki spıkerge de alýan túrli suraqtar qoıyldy. E.Tólegenovke temirjoldaǵy jolaýshy tasymalynda jekemenshik sektor da jumys isteıtindigi qaperge aly­nyp, olardyń poıyzdaǵy jol­aqyny qymbattatýy múm­kin be degen saýal tartyldy. «Rasyn aıtqanda, dál qazir biz­diń olarmen teńge baǵamynyń tú­zetilgenine qatysty baılany­sy­myz bola qoıǵan joq. Ne­gizi, jaǵdaıdy qalaı paıdala­ný quqyǵy jekemenshiktiń ózinde. Áıtkenmen, olar da tabıǵı monopolııalardy retteý agenttigine baryp qana, tıisti sheshim qabyldaı alady», dep jaýap berdi AQ prezıdenti. Nurbaı ELMURATOV, «Egemen Qazaqstan».