Aımaqtar • 16 Qazan, 2021

Talas aýdanynda jomart jandar aýyldy kórkeıtýde

202 ret kórsetildi

Qazaq halqynda qolda baryn ózgemen bólisý, kómek qolyn sozý, jomarttyq tanytý ıgi qasıet bolyp sanalady. Ǵasyrlar boıy qazaq dalasynda jalǵasyp kele jatqan osynaý dástúrdiń jelisi úzilmeı, búgingi kúnge jetip otyr.

Jambyl oblysynyń ákimi Berdibek Saparbaevtyń bastamasymen qolǵa alynǵan «Jomart túlek» jobasy da búginde óz jemisin berýde. Áýlıeata óńirinen shyqqan belgili azamattar da qazirgi kezde aýyldyń gúldenýine, damýyna ózderiniń úlesin qosyp keledi.

Talas aýdany, Turymqul eldimekeniniń azamattary uıymdasyp, elge, jerge degen perzenttik qurmetin isterimen kórsetti. Týǵan jerge tý tigýdi maqsat etken túlekter óz qarajattaryna aýyldan Uly Otan soǵysynyń ardagerlerine arnap «Máńgilik alaý» eskertkishi, balalar oıyn alańy, «Oıyq baba» meshiti jáne sýburqaq sııaqty birneshe nysan salyp, el ıgiligine berdi. Bul rette aýyldan osyndaı nysandardyń salynǵanyna jergilikti turǵyndar da rızashylyqtaryn bildirýde. Al, aýyldan shyqqan atymtaı jomart azamattar bul jumysyn El Táýelsizdiginiń 30 jyldyǵyna arnap otyr.

j

Atalǵan sharaǵa Aqmola oblystyq sotynyń tóraǵasy Dosjan Ámirov, Qazaqstan musylmandary dinı basqarmasynyń Jambyl oblysy boıynsha ókili Beıbit Myrzageldıev, Talas aýdandyq ardagerler keńesiniń tóraǵasy Jumabek Ásemov, aýyl qarııasy Ázimbaı Báıtenov jınalǵan kópshilikke tilektestik bildirip, osynaý ıgi istiń aýylda atqarylýy oryndy ekenin jetkizdi. Al, Talas aýdanynyń ákimi Qanatbek Mádibek aýyldyń damýyna úles qosqan azamattardy Jambyl oblysy ákiminiń jáne Talas aýdany ákiminiń Qurmet Gramotasy men Alǵys hatyn tabys etti. Sonymen qatar, kásipker Maqulbek Myrzaqulov «Shyńǵyshan» sharýa qojalyǵynyń atynan jańa meshittiń jumysyna atsalysqan azamattarǵa syı-sııapat jasap, qurmet kórsetti. Aýyldyqtardyń uıymshyldyǵynyń nátıjesinde «Oıyq baba» meshiti bir jarym jylǵa jýyq ýaqyttyń ishinde tolyǵymen aıaqtaldy. Jalpy quny 80 mıllıon teńgege salynǵan meshitke qarjylaı demeýshilik tanytqan da Maqulbek Myrzaqulov ekenin aıta ketken jón. Jıynda Jıembet Begadilov aýyldyq inileriniń atynan Maqulbek Myrzaqulovqa at mingizip, shapan japty.

Budan keıin jınalǵan kópshilik «Máńgilik alaý» eskertkishiniń, balalar oıyn alańynyń, «Oıyq baba» meshitiniń jáne sýburqaqtyń ashylý sátin tamashalady.

Aýyldan shyqqan soǵys ardagerleriniń esimderi jazylǵan «Máńgilik alaý» eskertkishin «Aralbek» sharýa qojalyǵynyń tóraǵasy Erlan Aralbekov óz qarajaty esebinen salyp berip otyr. Nysannyń qurylysyna 5,5 mıllıon teńge jumsalǵan. Al, «Nurtas» sharýa qojalyǵynyń tóraǵasy Nurdáýlet Sársen 3,5 mıllıon teńgege balalar oıyn alańyn salsa, «Bastaýbaı» sharýa qojalyǵynyń tóraǵasy Ǵalym Bastaýbaev sýburqaqtyń qurylysyna óz esebinen 2,5 mıllıon teńge bólip, el ıgiligine berdi. Týǵan jerge degen perzenttik paryzyn sózben ǵana emes, ispen de dáleldep júrgen azamattar aýyldy kórkeıtý sharalary munymen shektelmeıtinin, aldaǵy ýaqytta da jalǵasyn tabatynyn aıtyp otyr. Endi Turlybaı aýylynan aýyl jastary úshin sport alańy men qystyq sport zaly salynatyn bolady. Saltanatty jıynnan soń kópshilik kórkemónerpazdardyń uıymdastyrýymen konserttik baǵdarlamany tamashalady.

a

Shara sońy alaman báıge, taı báıge sııaqty ulttyq oıyndarǵa ulasty. Báıgeden oza shaýyp kelgen júırikterge uıymdastyrýshylar tarapynan qarjylaı syılyqtar men arnaıy júldeler tabystaldy.

 

Sońǵy jańalyqtar

Vaksına saldyrǵandar sany artty

Koronavırýs • Keshe

905 adamnan koronavırýs anyqtaldy

Koronavırýs • Keshe

Uqsas jańalyqtar