Densaýlyq saqtaý mınıstri Alekseı Soı brıfıng barysynda Ulttyq joba tórt baǵyttan turatynyn atap ótti. Onyń aıtýynsha, birinshi baǵyt medısınalyq kómektiń qoljetimdiligi men sapasyn arttyrýǵa baılanysty. Ekinshi baǵyt epıdemııalyq boljaý men den qoıýdyń zamanaýı júıesin qalyptastyrýǵa arnalǵan. Úshinshi baǵyt otandyq farmasevtıka salasynyń damýyna yqpal etedi. Tórtinshi baǵyt salamatty ómir saltyn ustanatyn halyqtyń úlesin arttyrýǵa jáne buqaralyq sportty damytýǵa baǵyttalǵan.
«Ulttyq jobany ázirleý kezinde biz kópshiliktiń, atap aıtqanda, medısına mamandarynyń, kásipkerlerdiń, azamattyq qoǵamnyń, densaýlyq saqtaý júıesi ardagerleri keńesiniń pikirin eskerdik. Ulttyq jobanyń birinshi baǵytyn iske asyrý úshin halyqtyń medısınalyq qyzmet sapasyna qanaǵattaný deńgeıin 80%-ǵa deıin arttyrý kózdelgen. Aýyldyq eldi mekender, onyń ishinde tirek jáne spýtnıktik aýyldar bastapqy medısınalyq-sanıtarlyq kómek uıymdarymen 100% qamtamasyz etiledi. Kem degende 40 densaýlyq saqtaý nysanyn jáne 2 ǵylymı ortalyqty jańǵyrtý josparlanǵan. Tegin medısınalyq kómektiń kepildik berilgen kólemi men mindetti áleýmettik-medısınalyq saqtandyrý júıesi sheńberinde medısınalyq kómektiń jalpy kóleminde ambýlatorııalyq deńgeıde medısınalyq kómek kólemin keńeıtý qarastyrylǵan», dedi A.Soı.
Vedomstvo basshysynyń aıtýynsha, Ulttyq joba aıasynda júkti áıelder men balalardyń densaýlyǵyn saqtaý úshin birneshe shara qarastyrylǵan. Birinshiden, júkti áıelderdi bosanǵanǵa deıingi baqylaýmen qamtý kózdelgen. Ekinshiden, 1 jasqa deıingi balalardy proaktıvti baqylaýmen jáne skrınıngtermen qamtamasyz etý qarastyrylǵan. Úshinshiden, 8 óńirde balalardy ońaltýǵa arnalǵan 8 ortalyq jáne 2 erte aralasý ortalyǵyn qosymsha ashý josparlanǵan. Bul múmkindigi shekteýli balalardy medısınalyq ońaltýmen qamtýdy 3 ese – 18-den 60%-ǵa deıin arttyrýǵa múmkindik beredi.
Halyqqa sapaly qyzmet kórsetý kóbinese biliktilikke jáne qajetti mamandardyń bolýyna baılanysty. Sondyqtan ulttyq jobanyń birinshi baǵyty aıasynda asa tapshy mamandyqtar boıynsha rezıdentýralyq bilim berý granttarynyń sany 3 800-ge deıin, sondaı-aq álemniń jetekshi ortalyqtarynda qarqyndy terapııanyń halyqaralyq standarttary boıynsha oqytylǵan dárigerler sany kóbeıtiledi.
Sonymen qatar mınıstr Ulttyq jobanyń ekinshi baǵytynda bıoqaýipsizdik jáne sáıkestikti baǵalaý salasyndaǵy halyqaralyq standarttarǵa sáıkes keletin sanıtarlyq-epıdemııalyq saraptama zerthanalarynyń úlesin úshten birge, ıaǵnı 90%-ǵa deıin arttyrý josparlanǵanyn atap ótti. Bul rette Parlament Májilisiniń qaraýyna engizilgen «Bıologııalyq qaýipsizdik týraly» zań qabyldanady.
«Ultyq jobanyń úshinshi baǵytynda Memleket basshysynyń bıylǵy 1 qyrkúıektegi Joldaýynda aıtylǵan tapsyrmalary eskerilgen. Qoldanystaǵy dárilik zattar men medısınalyq buıymdardyń ishinde otandyq óndiristiń úlesin 50%-ǵa deıin ulǵaıtý josparlanyp otyr. Sondaı-aq memlekettik satyp alý arqyly alynatyn medısınalyq buıymdar men dári-dármektiń 50%-yn otandyq óndiristen qamtý kózdelgen. Halyqaralyq standarttarǵa sáıkes akkredıttelgen zerthanalar men ortalyqtardyń úlesi 100%-ǵa jetkiziledi. Dárilik zattar men medısınalyq buıymdardy shyǵarý boıynsha keminde 30 jańa óndiristi iske qosý josparlanǵan», dedi A.Soı.
Al Ulttyq jobanyń tórtinshi baǵytyn iske asyrý arqyly temeki shegý kórsetkishi 19%-ǵa tómendeıdi, sondaı-aq azamattardyń 45%-y salamatty ómir saltyn ustanyp, 50%-y dene shynyqtyrýmen jáne sportpen shuǵyldanady degen úmit bar. Bul úshin halyqty sport ınfraqurylymymen qamtamasyz etýdi myń adamǵa shaqqanda 53%-ǵa deıin arttyrý kózdelgen. Erekshe qajettilikteri bar adamdarǵa da jaǵdaı jasalady.
Sonymen qatar A.Soı brıfıng barysynda revaksınalaý prosesi qalaı uıymdastyrylatynyn túsindirdi.
«Densaýlyq saqtaý mınıstrligi Qazaqstan Respýblıkasynyń halqyn ımmýndaý jónindegi konsýltasııalyq komıssııamen birge halyqty qaıta vaksınalaýdyń tásilderin pysyqtady. Halyqaralyq tájirıbeni eskere otyryp, koronavırýs ınfeksııasyna qarsy vaksınalaý sharasynyń tolyq kýrsyn ótkennen soń, 6-9 aıdan keıin qosymsha dozasyn egý usynylady. Vektorly (Spýtnık V) vaksına alǵan tulǵalarǵa 9 aıdan keıin ınaktıvti vaksına (Sinopharm, CoronaVac, Hayat Vax, QazCovid-in) egý; ınaktıvti (Sinopharm, CoronaVac, Hayat Vax, QazCovid-in) vaksına alǵandarǵa 6 aıdan keıin vektorly ekpe (Spýtnık V) salý; «mRNK-vaksına» (Pfizer) alǵan tulǵalarǵa 6 aıdan keıin ınaktıvti (Sinopharm, CoronaVac, Hayat Vax, QazCovid-in) nemese vektorly (Spýtnık V) ekpe salý josparlanǵan. Sondaı-aq birizdi ekpe túrin salý arqyly qaıta vaksınalanýǵa jol beriledi», dedi mınıstr.
Bul rette vaksına alǵan qansha adam koronavırýspen aýyrǵany jóninde suraq týyndady. Atalǵan suraqqa elimizdiń Bas memlekettik sanıtar dárigeri Erlan Qııasov jaýap berdi.
«Vaksınalaýdan keıin 21 813 adam aýyrdy. Onyń ishinde Spýtnık V vaksınasynan keıin – 18 myń adam, QazVac-tan keıin – 436 adam, Sinopharm-nan (Hayat Vax) keıin 2 173 adam aýyrdy. Sondaı-aq Pfizer ekpesinen keıin 17 adam aýyrdy, olar osy vaksınany shetelde alǵan. CoronaVac vaksınasyn alǵan 603 adam indetke shaldyqty», dedi E.Qııasov.
Buǵan qosa revaksınalaý aıasynda Pfizer vaksınasynyń qosymsha dozalaryn jetkizý týraly maǵlumat berildi.
«Bastapqy kezeńde basymdyqty sanattar aıqyndalady. Osy oraıda 12 jastan asqan balalar, júkti áıelder qamtylmaq. Al Dúnıejúzilik densaýlyq saqtaý uıymy maquldaǵan basqa vaksınalar boıynsha eresek adamdar ekpe saldyra alady. Pfizer vaksınasy aldymen atalǵan sanattarǵa salynady. Atalǵan vaksınany elimizge jetkizý máselesinde aldymen tońazytqysh jelisi durys qoıylyp, ornatylady. Mınýs 80 temperatýralyq rejim Qazaqstan boıynsha qosylady. Pfizer vaksınasyna qatysty kúrdeli logıstıka bolǵandyqtan, qalalar boıynsha birneshe núkteli oryndar aıqyndalady. Osy oraıda naqty mekenjaılardy, baılanys nómirlerin habarlaımyz. Naqty qandaı vaksınalaý pýnkteri bolatynyn jarııalaımyz. Vaksına bir aıda jetkiziledi, ıaǵnı tórtinshi toqsanǵa josparlanǵan», dedi A.Soı.
Osy oraıda Pfizer kompanııasymen 2021 jyldyń sońyna deıin Qazaqstanǵa 4 mln doza vaksınany jetkizý boıynsha shartqa qol qoıylǵanyn atap ótken jón.
