Baspasóz qyzmetiniń málimetterine qaraǵanda, 16 qazan kúni saǵat 19:14 shamasynda Shardara aýdandyq polısııa bóliminiń 102 pýltine jol apaty týraly habarlama kelip tústi.
Oqıǵa ornyna birden jedel-tergeý toby shyqty. Polıseıler oblystyq mańyzy bar Jetisaı-Shardara avtojolynyń 172-shaqyrymynda «Opel Vectra» avtokóligi joldyń qarsy betine shyǵyp, «Audi-100» avtokóligimen soqtyǵysqanyn anyqtady.
Jol-kólik oqıǵasy saldarynan oqıǵa ornynda eki jeńil kóliktiń júrgizýshileri men 4 jolaýshy qaza tapty, olardyń arasynda kámeletke tolmaǵandar da bar. 6 jolaýshy túrli dene jaraqattarymen aýdandyq aýrýhanaǵa jetkizildi. Atalǵan jaıt QR QK 345-baby 4-bóligi «Eki nemese odan da kóp adamnyń ólimine ákep soqqan Jol júrisi jáne kólik quraldaryn paıdalaný qaǵıdalaryn buzý» boıynsha Shardara aýdandyq polısııa bólimi sotqa deıingi tergeýdiń biryńǵaı tizilimine tirkeldi.
Tergeýmen Túrkistan oblysy PD anyqtaýshylary aınalysýda. Birqatar saraptamalar taǵaıyndaldy. Sotqa deıingi tergeý barysynda jol-kólik oqıǵasynyń barlyq mán-jaıy anyqtalatyn bolady. Osy tusta eskerte ketetin jaıt, jedel-tergeý toby oqıǵa ornyn muqııat zerdeleý kezinde, atalmysh avtojolda qandaı da bir zań buzýshylyqtar joq ekenin anyqtady.
Iаǵnı, jol qozǵalysyna qatysýshylar úshin jaqsy kórinetin, júrgizýshilerdi eskertetin jol belgileri ornatylǵan.
Túrkistan oblysynyń polıseıleri barsha kólik júrgizýshilerine árdaıym jol qozǵalysy men qaýipsizdik erejelerin saqtaý kerektigin eskertedi.
