Rýslan kishkentaı kezinen sportpen aınalysqan. Alǵashynda grek-rım kúresin jaqsy kórgen, keıin jeńil atletıkamen, fýtbolmen, basketbolmen, voleıbolmen, al 16 jasynda strıtlıftıngpen aınalysqan.
«Sport - meniń ómir saltym. Jeńiske jetkendi, birinshi bolǵandy jaqsy kóremin. Strıtlıftıng - óz-ózińmen kúresý. Basynda artyq salmaqpen kóterile almadym, biraq aýyr jattyǵýlar óz nátıjesin berdi. Byltyr jazda óz salmaǵymmen +32 keli tartýda álem chempıony atandym. Chempıonat Kıevte ótti», dedi Rýslan.
Rýslan byltyr qazanda Gınnestiń rekordtar kitabyna «qosymsha salmaqpen tartylý» nomınasııasyna ótinim bergen. Ol osy nomınasııadaǵy barlyq jeti rekordty jańartýǵa sheshim shyǵarǵan. Bıyl sáýirde eki jattyqtyrýshynyń qatysýymen jáne foto, vıdeoǵa túsirip, oryndaǵan. Vıdeo men qajet qujattardy jibergen Rýslan alty aıǵa jýyq ýaqyt jaýap kútken. Jaqynda onyń bes rekord jańartqany rastaldy. Bul – óz salmaǵymen mınýtyna + 45 kg, mınýtyna 31 ret +27 kg, mınýtyna 39 ret +18 kg, keri 35 ret +18 kg tartylý. Taǵy eki kategorııa boıynsha ázirge nátıje joq.
«Gınnestiń rekordtar kitabyna engenime qýanyshtymyn. Eki kategorııa boıynsha maǵan qosymsha qujat jiberýimdi surady, men áli jaýap almadym. Rekord ornatamyn dep oılaımyn. Qazir Reseıde oqımyn. Shet tilderin úırenemin, jattyǵý jasaımyn. Bolashaqta jattyǵý men strıtlıftıng seksııasyn ashyp, bilimimmen, tájirıbemmen bóliskim keledi», dedi Rýslan Fatahov.
