Prezıdent Er-Rııadty Qazaqstannyń musylman álemindegi senimdi seriktesi dep atap, Saýd Arabııasy Qazaqstannyń egemendigin moıyndaǵan alǵashqy arab memleketteriniń biri bolǵanyn eske saldy.
«Biz Saýd Arabııasynyń basshylyǵymen únemi baılanysta bolamyz. Tamyz aıynda murager hanzada Muhammed ben Salman Ál Saýdpen telefon arqyly sóılesý barysynda biz birqatar mańyzdy kelisimderge qol jetkizdik. Qyrkúıek aıynda ınvestısııalar mınıstri Halıd ál-Falıahpen kezdestim. Bul baılanystar eki el arasyndaǵy yntymaqtastyqqa jańa serpin beretinine senimdimin», dedi Memleket basshysy.
Áńgimelesý barysynda ekijaqty saýda-ekonomıkalyq yntymaqtastyqty keńeıtý perspektıvalary qaraldy. Qasym-Jomart Toqaev saýdııalyq kompanııalardy olardyń tájirıbesi men álemdik naryqtaǵy jaǵdaıyn eskere otyryp, Qazaqstandaǵy jobalarǵa belsendi qatysýǵa shaqyrdy.
Saýd Arabııasy Konsýltatıvtik keńesiniń tóraǵasy Qazaqstan Prezıdentine qabyldaý úshin alǵysyn bildirip, saparynyń mazmundy sıpatyn atap ótti.
«Baýyrlas ári dostas Qazaqstanǵa kelgenime qýanyshtymyn. Biz parlamenttik deńgeıde birqatar jemisti kezdesýler ótkizdik. Bul baılanystar elderimizdi jaqyndastyrý isine qyzmet etedi. Mundaı saparlar memleket basshylary deńgeıinde qol jetkizilgen sheshimderdi iske asyrýda mańyzdy ról atqarady dep sanaımyn», dedi ol.
Kezdesý sońynda Qasym-Jomart Toqaev Abdýlla Ál ash-Sheıhke II dárejeli «Dostyq» ordenin tapsyrdy.
