Berekege keneltedi

Respýblıkamyzda aıaq astynan teńgeniń baǵam ózgertýinen kóptegen kásiporyndar men mekemelerdiń ábigerge túsip, úreılengenine qaramastan, aýyl sharýashylyǵyndaǵy jaǵdaı birqalypty. Qashanda Elbasynyń saıasatyn qoldap, shydamdylyqty alǵashqy orynǵa qoıa biletin aýyl eńbekkerleri AQSh dollarynyń sharyqtaı ósýiniń sońy jaqsylyqqa jetkizer degen senimde. Rasyn aıtqanda, 11 aqpan­daǵy jaısyz habar aýyl adam­darynyń da júregin aýyrtty. Kóńilderine qaıaý túsirdi. Alaıda, óziniń elin, jerin bárinen artyq kóretin, Otanyn shyn súıetin aýyl patrıottarynyń sa­byr­lylyq saqtaýy basqalarǵa tamasha úlgi deýge laıyqty mysal. Jasyratyny joq, keıingi kezde aýyl sha­rýashylyǵy ónimderiniń baǵasy qunsyzdana bastady. Et, sút, t.b. ónimder syrttan tasymaldanyp, otandyq ónimder dúken sóreleri men qoımalarda uzaq jatyp qalatyndy shyǵardy. Eger de Ulttyq bank tóraǵasy Qaırat Kelimbetovtiń sózine sensek, aldaǵy ýaqytta ım­port­tyq ónimder men ishki ónim­­der ózara básekege túsip, nátı­jesinde sońǵysyna mártebe beril­mekshi. Agrarlyq keshenniń eńbekkerleri de osy bir qundy pikirge den qoıyp, bir-birlerin shydamdylyqqa shaqyrǵandaı. – Teńge baǵamynyń naqty­lanýy, – dedi bizge «Qaz­Agr­o­Qarjy» AQ-tyń arnaıy ókili Rınat Ke­meshov, – qazaqstandyq agrar­shy­lardyń ustanymyn nyǵaıta tús­pek. Olar ónimderin ishki saý­daǵa da, alys shetelder men TMD elderine de kóptep jóneltetin bolady. Bizdiń memleketimiz aýyl sharýashylyǵyna sýbsıdııa bó­lýdi jalǵastyra bermek. Janar-jaǵarmaı, astyq, sút ónimderi, taǵy basqalar sýbsıdııa alady. Qysqasy, ónim óndirýshilerdiń shyǵyny burynǵy kórsetkishpen qala beredi. Al tabys keri­sinshe ósedi. Bul – otandyq óndi­rýshilerdiń ónimderdi molynan shyǵaryp satýyna keń jol ashyldy degen sóz. Rınat Kemeshov «QazAgro­Qarjy» AQ-tan nesıe alǵan aýyl sharýashylyǵy ónimderin óndiretin kásipkerlerge teńge­niń baǵamynyń túzetilýi esh áser etpeı­tindigin, jasalynǵan kelisim­shartqa eshqandaı qaıta eseptesý jasalynbaıtyndyǵyn eskertti. Sarapshynyń pikirinshe, Úkimet otandyq agrarshylardyń shetel tehnıkalaryn satyp alýyna da ádettegideı jeńildikterdi saqtap qalýǵa tıis. – Shyndyǵynda, shetelderden ákelinetin sút ónimderiniń quny bizdikinen arzan bolǵandyqtan az zardap shekken joqpyz, – deıdi respýblıkadaǵy sút óndiretin aqtóbelik iri kásiporyn – «Aıs» JShS bas dırektory Qýanysh Ishanov, – endi sheteldik ónimder qymbattaýǵa tıis. Olarmen báse­kege túsetin kez keldi. Biz óndi­retin sút jáne sút ónimderi ekologııalyq taza bolyp sanalady. Bir ǵana problema bar, ol – astyq pen jemge baǵanyń ósip ketýi múmkin. Bul oraıda, Úkimettiń qamqorlyǵyna senemiz. О́ıtkeni, memleket bizdi árdaıym qoldap keldi. Q.Ishanov ımporttyq tehnıkalar men qural-jabdyqtardyń, olarǵa qajetti bólshekterdiń baǵa­sy ósetindigin eskerdi. Alaı­da, bel­gili bıznesmen bul oraıda kóp shyǵynǵa batpaspyz dep úmitte­nedi. Qaraǵandy qalasyna taıaý ornalasqan «Topar jylyjaılary» JShS dırektory Aleksandr Zabırovpen habarlasqanymyzda, bilikti basshy teńgeniń qunsyz­danýyna qynjylys tanytpady. Kerisinshe, óz kásiporny óndiretin ónimderdiń kóptep satylatynyn bylaısha túsindirdi: – Teńgeniń qunsyzdanýy biz úshin qaýipti emes, – dedi ol bizge. – Birinshiden, ımporttyq ónim­dermen báseke bastalady. Bizdiń ónimimiz sapaly. Son­dyqtan shetel ónimderiniń ornyn aýystyramyz dep oılaımyz. Aýyl sharýashylyǵynda eseli eńbek etip jatqan kásipkerlerdiń pikirlerin kóptep keltirýge de bolar edi. Biraq, olardyń oı­la­ry bir arnaǵa toǵysady. Teńgeniń qunsyzdanýy aýyl sharýa­shy­lyǵy ónimderine zııanyn tıgizbek emes. Sondyqtan, olar erteńgi kúnge degen nyq senim­men, ha­lyqty sapaly da qymbat emes ónimderimen berekege kenelte beremiz, deıdi biraýyzdan. Tańat QOJMANOV.