Dári-dármek qymbattamaıdy

Astanadaǵy Ortalyq kommýnıkasııalar qyzmetinde ulttyq valıýtanyń aıyrbas baǵamyna túzetý engizilýine baılanysty Densaýlyq saqtaý vıse-mınıstri Erik Baıjúnisov, mınıstrliktiń medısınalyq jáne farmasevtıkalyq qyzmetti baqylaý komıteti tóraǵasynyń orynbasary Larısa Pak pen «SK-Farmasııa» uıymynyń basshysy Sholpan Ahmettiń qatysýymen kezekti brıfıng bolyp ótti. Is-sharaǵa arnaıy kelgen ókilderdiń aıtýynsha, aqsha aıyrbas qunynyń ózgerýine oraı Densaýlyq saqtaý mınıstrligi elimizde dári-dármekke baǵanyń ósýine jol bermeý maqsatynda jergilikti atqarýshy organdarmen birlese otyryp shuǵyl sharalar qabyldapty. Barlyq óńirlerde ákimderdiń orynbasarlary jetekshilik etetin jumys toptary qurylyp, olardyń quramyna – densaýlyq saqtaý basqarmalarynyń, DSM medısınalyq jáne farmasevtıkalyq qyzmetti baqylaý komıtetiniń aýmaqtyq departamentteriniń, «Nur Otan» partııasynyń, Áıelder isi jáne demografııalyq-otbasylyq saıasat jónindegi ulttyq komıssııanyń, farmasevtıkalyq óndirýshilerdiń jáne ózge de múddeli qurylymdardyń ókilderi enip otyr eken. Brıfıngte jumys tobynyń músheleri dárihanalarǵa kún saıyn tekseriske shyǵyp, qorytyndysynda dárilerdiń baǵasyna monıtorıng jarııalap, farmasevtıkalyq kompanııalarmen túsindirý jumystary júrgizilip jatqanyn aıtty. 2014 jylǵy 13 aqpanda Densaýlyq saqtaý mınıstri S.Qaıyrbekova «Farmqyzmetti qoldaý jáne damytý qaýymdastyǵy», farmasevtıkalyq ónimder dıstrıbıýtorlary, farmasevtıkalyq fırmalar ókildikteri, «Qazaqstannyń farmmedındýstrııasy» qaýymdastyǵy jáne «Ulttyq densaýlyq saqtaý palatasymen» eń qajetti dárilik quraldarǵa baǵany ustap turý týraly memorandýmǵa qol qoıypty. Memorandýmǵa qol qoıýdaǵy maqsat, tegin medısınalyq kómektiń kepildik berilgen kólemine kirmegen, áleýmettik jaǵynan az qamtylǵan turǵyndar jıi qoldanatyn 200-den astam dárilerge baǵa shegin belgileý jáne dárilerge qoıylatyn ústeme baǵany tómendetýge baǵyttalǵan ózge de is-sharalar qabyldaý bolyp tabylady. Eń negizgisi, dárilik quraldarǵa baǵany turaqty ustap turý sharalary Densaýlyq saqtaý mınıstrliginiń baqylaýynda bolady. Ambýlatorııalyq jáne stasıonarlyq deńgeıde emdeýdi eskere kele, tegin dárimen qamtamasyz etiletin dári-dármekter tizimi jańartylǵan. 2014 jyldyń 1 qańtarynan bastap halyqtyń áleýmettik jaǵynan az qorǵalǵan toptaryna (18 jasqa tolmaǵan balalar, júkti analar, Uly Otan soǵysy ardagerleri, múgedekter, «Altyn alqa», «Kúmis alqa» ıegerleri, áleýmettik kómek alýshylar, ártúrli jastaǵy zeınetkerler) jekelengen aýrýlar boıynsha (arterııalyq gıpertenzııa, júrek aýrýy, júrek kemistigi) qosymsha terapııa bekitilgen. Buǵan deıin olarǵa 50 paıyz jeńildikpen satylyp kelgen dáriler 2012 jyldan bastap tegin beriletin  bolǵanyn da eske saldy. Osy maqsatta 2013 jyly 3,8 mlrd.-tan artyq, 2014 jyly 4,1 mlrd.-tan astam teńge jumsalmaq. Tegin medısınalyq kómektiń kepildik kólemi sheńberinde ambýlatorııalyq deńgeıde dárilik preparattarmen ýaqytynda qamtamasyz etýge baılanysty máselelerdi sheshý maqsatynda satyp alý erejelerine ózgertýler engizilgen. Vıse-mınıstri Erik Baıjúnisov elimizdegi 11 149 dárihana men farmasevtıkalyq nysandardy túgeldeı baqylaýǵa alýdyń qıyndyq týdyryp otyrǵanyn eske salyp, eger qaı jerde bolǵanyna qaramastan dárihanalardyń qymbattaýǵa jol berip otyrǵanyn bilgen azamattar mınıstrlik tarapynan qurylǵan arnaýly oryndardaǵy telefonǵa habarlassa, oǵan der kezinde shara qoldanylatynyn jetkizdi. Berik SADYR, «Egemen Qazaqstan».