Qostanaıda burynǵy sýdıalar sottaldy

Qostanaı oblysynda qalalyq sottyń burynǵy tóraǵasy Samalbek Muhtarov pen eks-sýdıa Serik Qashqynbaevtyń áreketterine qatysty úkim shyǵaryldy. Bul týraly «Habar» telearnasy habarlady. Sot prosesi kezinde prokýratýra qyzmetkeri olardyń kinási tolyq dáleldengenin aıtty.Oǵan aıǵaq retinde beınejazbalar bar. Jalpy, qylmystyq iste ekeýiniń sot isin jeke adamnyń paıdasyna sheship bermekshi bolyp, taraptardyń birinen para alǵany jazylǵan. Bul máselege qatysty buǵan deıin de buqaralyq aqparat quralynda birneshe dáıekteme aıtyldy. Sol ótken jyldan bastaý alǵan keleńsizdik áreketke bıyl núkte qoıylyp otyr. №2 Qostanaı qalalyq sotynyń sýdıasy Erjan Shyńǵysovtyń shyǵarǵan úkimi boıynsha aıypkerdiń birine mynadaı jaza taǵaıyndaldy:  «Sot Samalbek Muhtarovty Qylmystyq kodekstiń 24 babynyń 3-shi tarmaǵy, 311 baptyń 3-shi tarmaǵy jáne 311 baptyń 4-shi tarmaǵy boıynsha kináli dep tanydy. Sondaı-aq, Qylmystyq kodekstiń 58 babynyń 3-shi tarmaǵy negizinde S.Muhtarovqa dúnıe-múlkin tárkileý jáne 7 jylǵa bas bostandyǵynan aıyrý jazasy taǵaıyndalsyn». Kelesi aıypker S. Qashqynbaev sot úkimimen jalpy rejımdegi kolonııada 5 jyl jazasyn óteıtin boldy. Ámirhan Almaǵanbetov. Derekkóz: «Habar» telearnasy. Foto: «Habar» telearnasy.