Úkimet • 28 Qazan, 2021

Mınıstrlikter quzyreti qaıta bólinedi

1318 ret kórsetildi

Senat Spıkeri Máýlen Áshimbaevtyń tóraǵalyǵymen Palata otyrysy ótti. Onda depýtattar «Qazaqstan Respýblıkasynyń keıbir zańnamalyq aktilerine memlekettik basqarý deńgeıleri arasynda ókilettikterdi qaıta bólý máseleleri boıynsha ózgerister men tolyqtyrýlar engizý týraly» zań jobasyn qarady.

Qujatty senatorlarǵa Ulttyq ekonomıka mınıstri Áset Erǵalıev tanys­tyrdy. Zań jobasyn qabyldaýdaǵy maq­saty – memlekettik basqarý deń­geıleri arasynda quzyretterdi odan ári qaıta bólý. Bul aldyńǵy ákimshilik reformalardyń jalǵasy bolady.

Joba Memleket basshysynyń tapsyrmalaryn, strategııalyq qujattarda jáne sarapshylardyń usynymdarynda aıqyndalǵan basymdyqtardy eskere otyryp daıyndaldy.

«Ony ázirleý kezinde ortalyq jáne jergilikti deńgeılerdegi memlekettik fýnk­sııalardy taldaý boıynsha aýqym­dy jumys júrgizildi. Zań jobasynda 46 zańnamalyq aktige, onyń ishinde 2 kodeks pen 44 zańǵa túzetýler kózdelip otyr. Zań jobasy sheńberinde 68 fýnksııa qaıta bólinedi, onyń ishinde Úkimetten mı­nıstrlikterge 63 fýnksııa, jergilikti at­qarý­shy organdarǵa 5 fýnksııa beri­ledi. Sonymen qatar 4 memlekettik organ­ǵa qosymsha ókilettikter beriledi», dedi Ult­tyq ekonomıka mınıstri Áset Erǵalıev.

Onyń aıtýynsha, jalpy, zań jobasyn qabyldaý memlekettik basqarýdyń tıimdi júıesin qalyptastyrýdaǵy kezekti qadam bolady jáne onyń derbes­tigin odan ári arttyrýǵa yqpal etedi.

Qujatqa engiziletin jańa norma­larǵa sáıkes, Úkimettiń birqatar ókilet­tik­terin mınıstrlikterge berý kózdel­gen. Al mınıstrlikterdiń keıbir ókiletti­k­teri jergilikti atqarýshy organdarǵa beriledi.

Naqty aıtqanda, Bilim jáne ǵylym mınıstrligine qarjy uıymdary beretin bilim berý kredıtterine jáne olardyń mólsherine kepildik berý qaǵıdalaryn bekitý qyzmeti júkteledi. Syrtqy ister mınıstrligi halyqaralyq sharttardyń oryndalýyn qamtamasyz etý isine monıtorıng júrgizýge jaýapty bolady.

Sıfrlyq damý, ınnovasııalar jáne aeroǵarysh ónerkásibi mınıstrligine aerotúsirilim jumystaryn júrgizýge ruqsattardy tirkeý, esepke alý jáne berý jónindegi qaǵıdalardy ázirleý jáne bekitý usynylyp otyr. Sondaı-aq zań jobasynda mınıstrlikterdiń moı­nyndaǵy qyzmetterdiń bir bóligin ákimdikterge berýge qatysty jańashyl­dyqtar jazylǵan.

«Osy zań jobasy arqyly Qazaq­stan Respýblıkasynyń 46 zańnama­lyq aktisine, onyń ishinde Bıýdjettik jáne Qylmystyq atqarý kodeksterine ózgeris­ter men tolyqtyrýlar engizý kózdelgen. Odan bólek, Bilim jáne ǵylym, Indýstrııa jáne ınfraqurylymdyq damý, Aýyl sharýashylyǵy mınıstr­lik­teriniń keıbir fýnksııalaryn jergi­likti atqarýshy organdarǵa berý qaras­tyrylǵan. Keıbir máselelerde Ekolo­gııa, geologııa jáne tabıǵı resýrstar, Qorǵanys, Ishki ister, Sıfrlyq damý, ın­novasııalar jáne aeroǵarysh óner­kásibi mınıstrlikteriniń ókilettikterin kúsheıtý úshin olarǵa da birqatar qosymsha qyzmetter beriledi», dedi senator Lázzat Rysbekova.

Memlekettik basqarý deńgeıleri arasyndaǵy ókilettikterdi naqty bólýge arnalǵan bul zań jobasy tıimdi mem­lekettik basqarý júıesin qalyptastyrý jolyn­daǵy mańyzdy qadam bolyp sana­la­dy. Senatorlar jan-jaqty talqy­laǵannan keıin qujatty birinshi oqylymda maquldap, Palatanyń ári qaraı qaraýyna jiberdi.

Sonymen qatar Senat otyrysynda birqatar depýtattyq saýal joldandy. Narıman Tóreǵalıev Mańǵystaý obly­synyń týrızm salasyndaǵy áleýe­tin kúsheıtý úshin keshendi jumys júr­­gizý­diń, óńirdi taza aýyzsýmen qamta­ma­syz etý máselesin sheshýdiń, áýe reıs­terin arttyrýdyń jáne avtomobıl joldaryn jóndeýdiń mańyzdy ekenin aıtty.

Depýtat Premer-Mınıstr Asqar Mamınniń atyna joldaǵan saýalynda Mańǵystaý oblysynyń týrıstik aımaqtarynda 1100 shaqyrymnan astam joldy kúrdeli jóndeý jáne qaıta jańartý qajet ekenin atap ótti. Sonymen qatar óńirde qurǵaq júkter men munaı ónimderin tasymaldaýǵa arnalǵan «Aqtaý teńiz saýda porty» jáne «Quryq» porttary bar. Olardyń ekeýi de el ekonomıkasy úshin mańyzdy ról atqarady. Alaıda olar tek júk tasymaldaý baǵytyna arnalǵan. Al jolaýshy kemelerin qabyldaýdyń múmkindikteri qarastyrylmaǵan.

«О́ńirde týrızmdi odan ári damytýǵa serpin berý úshin jolaýshylar teńiz vok­zalyn salý qajet. Jalpy, teńiz vokza­lynyń salynýy týrızmmen birge, óńirdiń ekonomıkasyna jańa serpin beretini sózsiz», dedi senator Narıman Tóreǵalıev.

Senator Murat Baqtııaruly elimizdiń Premer-Mınıstriniń atyna joldaǵan depýtattyq saýalynda Qyzylorda oblysyndaǵy sý tapshylyǵy máselesin kóterdi. Onyń aıtýynsha, Qyzylorda oblysynyń áleýmettik-ekonomıkalyq jaǵdaıy Syrdarııa ózeni basseınin sýmen qamtamasyz etýge jáne sýarma­ly jerlerdiń melıorasııalyq jaǵ­daıy­na tikeleı baılanysty. Oblys trans­shekaralyq ózenniń tómengi aǵysynda ornalasqan, sondyqtan onyń joǵarǵy aǵysynan keletin sý kólemine táýeldi.

Osyǵan baılanysty Syrdarııa ózeni­niń joǵarǵy aǵysynda ornalasqan mem­leket­terge sý táýeldiliginiń tómen­deýi óńir úshin óte mańyzdy. Depýtattyń piki­rin­she, Qaraózek jáne Kúmisketken sý qoıma­laryn salý bul máseleni sheshýge kómektesedi.

«2022 jylǵa arnalǵan respýblı­kalyq bıýdjettiń parametrlerinde Kúmis­ketken sý qoımasyna jáne Qaraózek sý qoıma­synyń qurylysyn bastaýǵa 500 mln teńge qarjy qarasty­rylýyna jáne sonymen qatar 30 myń gektar sýarmaly egistik jerlerin sýmen qamtamasyz etý maqsatynda, Ekologııa, geologııa jáne tabıǵı resýrstar mınıstrliginiń «Qazsýshar» RMK sý jetkizip berý qyzmeti esebinen Qyzylorda oblysy, Jańaqorǵan aýdanynda sý tospasyn qaıta salýǵa yqpal jasaýyńyzdy suraımyn», dedi depýtat.

Baýyrjan Qanıev Úkimettiń negizgi azyq-túlik ónimderiniń baǵasyn ustap turý boıynsha qabyldaǵan sharalaryn synǵa alyp, Premer-Mınıstrdiń atyna joldaǵan depýtattyq saýalynda jaǵdaıdy jaqsartýǵa yqpal etetin birqatar qadamdar usyndy.

Senatordyń aıtýynsha, ishki jalpy ónimniń quramyndaǵy otandyq taýar óndirýshilerdiń úlesi shamamen 30 pa­ıyzdy quraıdy, al azyq-túliktiń 70%-y elge ımporttalady, bul baǵanyń ósýine yqpal etpeı qoımaıdy.

Depýtat Ulttyq statıstıka bıýro­synyń 2021 jyldyń basynan bastap sábiz 45 paıyzǵa, kartop 38,5 paıyzǵa, kúnbaǵys maıy 16,7 paıyzǵa, pııaz 10,9 paıyzǵa jáne qant 9,2 paıyzǵa qymbattaǵanyn jetkizdi.

«Úkimet baǵany eki tásilmen turaq­tandyrýǵa tyrysyp jatyr, biraq aıtar­lyqtaı nátıje joq. Birinshisi – 6 paıyzben  kásipkerlerge nesıe berý. Oǵan kóp kásipkerlerdiń jáne sharýa qojalyqtarynyń qoly jet­peı otyr. Ekinshisi – azyq-túlik­ti tómen­detil­gen baǵamen satatyn áleýmettik dú­ken­­der. Bul dúkenderdiń sany az, ishki naryqty tolyǵymen qamta­­­ma­syz ete almaıdy. Bul tásilder naryqtaǵy baǵaǵa kóp áserin tıgize almaı otyr. Sondyqtan Úki­­­met, eń al­dymen, áleýmettik mańyzy bar ta­ýar­­larǵa qatysty shekti baǵany beki­­tip, óki­let­ti organ baǵanyń ózgerýin qatań túr­de baqylaýy tıis», dedi depýtat.

Baýyrjan Qanıev, sondaı-aq Senat­tyń Ekonomıkalyq saıasat, ınno­va­sııa­lyq damý jáne kásipkerlik komıteti Mem­leket basshysynyń Joldaýyn iske asyrý aıasynda kóterme saýda orta­lyq­tary jelisin damytý jáne baǵa bel­gileýdi jetildirý máseleleri boıynsha ýákiletti memlekettik organdarmen jáne múddeli uıymdarmen kezdesý ótkizgenin atap ótti. Kezdesý qorytyndysy bo­ıynsha arnaıy ázirlengen usynystar Úkimettiń atyna joldandy.

Sońǵy jańalyqtar

Belarýssııa referendým ótkizedi

Álem • Búgin, 13:05

30 soqqy – 1 gol

Fýtbol • Búgin, 12:51

Mýngııanyń armany – Golovkın

Kásipqoı boks • Búgin, 10:35

QazUÝ-da Táýelsizdiktiń onkúndigi bastaldy

Táýelsizdiktiń 30 jyldyǵy • Búgin, 09:55

«Qyzyl» aımaqta qalǵan jalǵyz-aq oblys

Koronavırýs • Búgin, 09:50

Qazaqstanda qansha adam vaksına saldyrdy

Koronavırýs • Búgin, 09:45

1137 adam koronavırýs indetinen saýyqty

Koronavırýs • Búgin, 09:30

Omıkron álemniń 20 memleketinen tabyldy

Koronavırýs • Búgin, 00:00

Altaı úzdikteri anyqtaldy

Aımaqtar • Keshe

Uqsas jańalyqtar