Al indet qaıdan taraıdy deımiz? Qoǵamdyq kólikterde kúrk-kúrk jótelgenderge seziktene ári qorqyp qaraısyz. Júrgizýshiler de betperdesiz. Baqylaý da, tekserý de joq deýge bolar.Tipti zararsyzdandyratyn suıyqtyqsyz bos qalǵan qutylar ábden eskirip, ishke kire berer jerde ilinip turady.
Oblystyq sanıtarlyq-epıdemııalyq baqylaý departamentiniń ókili Ǵızat Ábishevtiń málimetinshe, óńirdegi epıdemııalyq ahýal áli de turaqsyz. Qazirge deıin oblysta koronavırýsty juqtyrýdyń 50 844 myń jaǵdaıy tirkeldi. Olardyń 41 530-y sımptomdy, 9 314-i – sımptomsyz. Osyǵan oraı endi Ashyq júıesi boıynsha jumys isteıtin nysandardyń jumysyna ózgeris engizilýde.
– 29 qazannan bastap 12 qarashaǵa deıin Ashyq arqyly jumys isteıtin nysandarǵa jumys kúnderi tek «jasyl» mártebesi bar adamdar kire alady, – deıdi Ǵızat Ábishev. – Jeti kúnnen aspaǵan PTR-testiniń nátıjesi teris jáne vaksınalaýdan ótkender óte alady.
Budan bólek, aýyl-qala turǵyndarynyń karantındik rejimdi jıi buzýy alańdatýda. Shekteýlerge qaramastan saýda úılerine, dámhanalarǵa, Ashyq baǵdarlamasy ornatylǵan oryndarǵa barýda. Mysaly, departament ókili usynǵan 26 qazandaǵy málimetke saı, óńirdegi 337 nysanǵa 2 myńǵa jýyq turǵyn, «qyzyl» tirkeýindegi
1 400, «sary» belgisindegi 600-deı turǵyn jiberilgen joq.
Qazir barlyq qalalar men aýdandarda 24 monıtorıngtik top jumys isteıdi. Ekibastuz qalasynda 10 aıdyń ishinde karantındik talaptardy buzǵan 96 adam anyqtalǵan. Osy qazan aıynda 85 reıd júrgizilip, 279 bıznes nysanyna karantın talaptaryn saqtap, indet taratpaý jaıyndaǵy túsiniktemeler tapsyrylǵan. Qalada 1 236 bıznes nysany Ashyq júıesine tirkelgen. Sondyqtan, óńirde bas sanıtar dárigerdiń sheshimimen jańa talaptar engizildi. Iаǵnı epıdemııalyq ahýaldyń turaqsyzdyǵy, indet juqtyrǵan naýqastardyń kóbeıýi jańa talaptar qabyldaýǵa májbúr etkeni belgili. Endi 29 qazan men 12 qarasha aralyǵynda Ashyq jobasyna qatysýshy nysandardyń kúndelikti jumysyna tolyqtyrýlarmen birge, ózgerister de engiziledi.
Búginde oblys kóleminde 6 830 áleýmettik jáne bıznes nysany Ashyq boıynsha jumys isteıdi. Jalpy esep boıynsha «qyzyl» statýsy bar 2 myń adam Ashyq boıynsha keri qaıtarylǵan. Ashyq jobasyn buzýshylar Pavlodar, Ekibastuz jáne Aqsý qalalarynda anyqtalǵan. О́ńir boıynsha, 18 mamyr men 26 qazan aralyǵynda monıtorıngtik toptar 3 274 nysannyń 114-ine shekteý sharalaryn buzý faktisin anyqtady. Olardyń barlyǵy Ashyq jobasynyń qatysýshylary bolǵan. Jalpy, jobaǵa 2,5 myńǵa jýyq qatysýshy anyqtaldy, olardyń 467-si memlekettik mekemeler. Monıtorıngtik toptardyń músheleri Ashyq jobasynyń qatysýshylarymen túsindirý jumystaryn júrgizýde.
Tártip buzýshylarǵa ákimshilik quqyq buzý jónindegi zań talaptary boıynsha quny 8 mln teńgeden astam 63 ákimshilik quqyq buzýshylyq týraly hattama toltyrylsa, qalǵany sotqa joldanǵan.
Oblystyq sanıtarlyq-epıdemııalyq baqylaý departamentiniń málimetinshe, qazan aıynyń sońǵy kúnderi óńirde indet juqtyrǵan 49 331 naýqas tirkelse, 27 035 naýqas oblys ortalyǵynyń turǵyndary. Epıdemıologterdiń baǵalaýynsha, indet ınfeksııasy boıynsha óńirde jaǵdaı áli turaqsyz.
Pavlodar oblysy
