Buǵan deıin aýyldaǵy orta mekteptiń bir buryshynda eleýsizdeý qalyp kelgen ólke tarıhynyń tábárigi endi keń de, jaryq baspana ishinde kelýshilerdiń kózaıymy bolmaq. Jańa murajaıǵa segiz júzden astam eksponat jınalyp, saqtaýǵa berilipti. Al mýzeı irgetasynyń qalanýyna Májilis depýtaty Berik Ábdiǵalıuly, belgili mesenat Baýyrjan Ospanov jáne jergilikti tarıhshy, ólketanýshy Muharram Haıbýllın óz úlesterin qosqan.
– Jetisýdyń bul aımaǵy tarıhı jáne mádenı muraǵa baı ekeni belgili. Aldaǵy ýaqytta Alakólge keletin týrıster shıpaly sýdyń emdik qasıetimen qatar, óńirdiń tarıhymen de tanysa alatyn bolady. Bir kezderi jergilikti mektep kabınetinde ornalasqan qundy tarıhı eksponattar búgingi kúni keń murajaı zaldaryna ornalastyryldy, – dedi oblystyq mádenıet basqarmasynyń basshysy Márlen Kólbaev aýyldaǵy murajaıdyń ashylý saltanatynda.
Búginde murajaıda 781 eksponat bar. Tarıhı-ólketaný murajaıynda ólkeniń ejelgi tarıhy, turmys-tirshiligi, mádenıeti men shyǵarmashylyǵy usynylǵan. Sondaı-aq munda Keńes Odaǵy, azamattyq jáne Uly Otan soǵysy kezindegi eksponattary saqtalǵan. Olardyń barlyǵy 30 jyl boıy jergilikti turǵyndardyń kúshimen jınalǵan eken.
– Lepsi aýyly Qazaqstan tarıhynda, ásirese Jetisý ólkesinde mańyzdy ról atqardy. Bul aımaqta jyl saıyn aǵylyp keletin týrısterdiń qyzyǵýshylyǵyn oıatatyn erekshe oryndar barshylyq. Murajaıǵa kelgen árbir demalýshy Lepsi aýylynyń tarıhynan syr shertip qana qoımaı, elimizdiń ártúrli kezeńdegi geosaıası jaǵdaıy týraly qyzyqty málimetterden habardar bola alady. Aldaǵy ýaqytta murajaı Lepsi aýylynyń odan ári sharyqtap, damýyna ózindik úlesin qosady dep úmittenemiz, – deıdi Májilisiniń depýtaty Berik Ábdiǵalıuly.
Aıtpaqshy, aýyldaǵy mýzeıdiń biregeı eksponatynyń qatarynda «Túrki obatasy» atalatyn bitik tas bar. VI-VIII ǵasyrdyń aralyǵyn qamtıtyn tańbaly tas Lepsi aımaǵynyń janynan tabylǵan desedi. Sonymen qatar el ishinen jınalǵan Alash polki sarbazdarynyń kıimderi de elimizdiń basqa murajaılarynda kezdese bermeıtin teńdesi joq jádigerler sanatynda.
Almaty oblysy
